Cenohet fizikisht gazetarja Ambrozia Meta, kryeministri Rama avancoi sjelljen agresive 

Në përmbyllje të fjalës për gazetarët pasi la selinë e Partisë Socialiste paraditen e sotme, kryeministri Edi Rama ju përgjigj me komente nënçmuese pyetjes së gazetares Ambrozia Meta dhe duke e shtyrë fizikisht në zonën e fytyrës.

Ky veprim i kryeministrit ndaj reporteres së Televizionit “Syri”, u dënua menjëherë nga organizatat në mbrojtje të gazetarëve dhe nga kolegët, të cilët e kanë cilësuar si cenim të integritetit fizik dhe sjellje anormale nga ana e Ramës. 

“Prekja fizike e gazetares është cenim i Kodit të Etikës dhe i integritetit fizik, zoti Kryeministër”, shkroi i Unioni i Gazetarëve Shqiptarë, në një deklaratë të shpërndarë në “Facebook”.

“Kryeministri jo vetëm që nuk jepte një përgjigje konkrete për pyetjen specifike, por me një gjuhë replikuese dhe nga pozita e edukuesit moral shmangej nga detyrimi për të dhënë një shifër konkrete për përfitimet e mundshme publike prej njërit nga projektet më të mëdha në fushën e turizmit shqiptar”, shtoi deklarata. 

Kryeministri Rama u prit nga gazetarët pas një takimi me drejtuesit politikë të rretheve në selinë e Partisë Socialiste. Ata e pyetën për projektin e investimit në Ishullin e Sazanit dhe në zonën e Zvërnecit në Vlorë, të lidhura me Jared Kushner, dhëndri i ish-presidentit amerikan, Donald Trump. 

Qendra Evropiane për Shtypin dhe Lirinë e Medias reagoi pas ngjarjes, duke e dënuar sjelljen e kryeministrit. Por thirrjeve për të kërkuar ndjesë ai ju përgjigj në median sociale “X”, pa shfaqur asnjë pendesë, duke e trajtuar si diçka normale dhe duke vijuar me diskursin edukativ për median.

“Më vjen keq që një ‘denoncim’ i tillë nuk nderon vlerat e lirisë dhe as të vërtetën, por më shumë se denoncimi i një agresioni imagjinar nuk respekton viktimat e vërteta të agresioneve të pushtetit ndaj grave gazetare në mbarë botën”, shkruajti Rama.

“Rrjeti i Gazetarëve të Sigurt” e konsideroi sjelljen e Ramës si një kërcënim të drejtpërdrejtë për parimet e transparencës dhe të përgjegjësisë që mbështesin një shoqëri demokratike. 

“Ky incident është pjesë e një modeli shqetësues ku kryeministri Rama ka shfaqur përbuzje ndaj gazetarëve, veçanërisht grave, të cilat paraqesin pyetje sfiduese”, shkroi Rrjeti i Gazetarëve të Sigurt.

“Refuzimi i kryeministrit për t’iu drejtuar këtyre pyetjeve me interes publik, i ndjekur nga komenti i tij nënçmues – ‘injoranca nuk është argument’ – dhe kontakti fizik, duke tentuar të prek faqen e saj është i papranueshëm dhe alarmues”, shtoi deklarata.

Përfaqësues të opozitës dhe politikanë e dënuan këtë sjelljë të kryeministrit, duke e cilësuar si sjellje prej gangsteri dhe jo etike. Megjithatë kjo nuk është hera e parë që kryeministri i vendit ndërmer veprime të qëllimshme ndaj gazetares Ambrozia Meta. 

Më herët ajo është përjashtuar nga konferecat për shtyp të organizuara nga Kryeministria, duke mos u lejuar që të merrte pjesë në to dhe është qortuar nga Rama për pyetjet e saja, që fokusoheshin tek transparenca dhe llogaridhënia.