Rritja e taksës për hotelet në komisionin parlamentar, Shoqata e Turizmit kundërshton

Qeveria ka propozuar rritjen nga 6% në 10% të Tatimit mbi Vlerën e Shtuar (TVSH), që paguhet për qëndrimin në hotele dhe struktura të tjera akomodimi. Propozimi është pjesë e ndryshimeve të taksave për vitin 2027, të cilat u diskutuan më 4 nëntor në komisionin parlamentar, ku ministri i Financave, Petrit Malaj, iu përgjigj pyetjeve të deputetëve.

Sipas propozimit, Tatimi mbi Vlerën e Shtuar (TVSH) për shërbimet e akomodimit do të rritet nga 6% në 10%. Ndryshimi nuk është miratuar ende përfundimisht nga Kuvendi.

Ministri i Financave e kishte paraqitur paketën në komision më 30 tetor, duke shpjeguar se qeveria synon të ndryshojë mënyrën e shpërndarjes së taksave dhe të mbledhë të ardhura për financimin e shërbimeve publike. 

Kundër rritjes së taksës është shprehur Shoqata Shqiptare e Turizmit (ATA), e cila në një deklaratë publike kërkoi tërheqjen e propozimit dhe nisjen e konsultimeve me bizneset e sektorit.

Shoqata argumenton se hotelet dhe bizneset e tjera të akomodimit po përballen me rritjen e shpenzimeve dhe se një taksë më e lartë do t’ua vështirësonte konkurrencën me vendet e rajonit.

“Ky projekt vendim, i ndërmarrë pa asnjë konsultim paraprak me grupet e interesit dhe pa një analizë të mirëfilltë ndikimi, përbën një goditje të drejtpërdrejtë ndaj qëndrueshmërisë dhe konkurrueshmërisë së turizmit shqiptar në rajon”, shkruhej në deklaratën e shoqatës.

Sipas përfaqësuesve të sektorit, bizneset janë goditur nga zhvlerësimi i euros, rritja e pagave për punonjësit dhe shtrenjtimi i produkteve që përdorin për shërbimet e tyre.

Shoqata paralajmëroi se rritja e TVSH-së do të rëndojë më shumë mbi bizneset që paguajnë rregullisht taksat, ndërsa një pjesë e tregut të akomodimit vazhdon të funksionojë pa deklaruar të ardhurat.

“Zgjidhja nuk është taksimi i biznesit formal, por formalizimi i tregut”, theksohej në deklaratë.

Sipas shoqatës, një pjesë e madhe e kapaciteteve të akomodimit përbëhet nga apartamente që jepen me qira ditore. Ajo pretendon se shumë prej tyre veprojnë jashtë sistemit të deklarimit të të ardhurave, duke krijuar konkurrencë të pabarabartë me hotelet.

Për këtë arsye, Shoqata Shqiptare e Turizmit kërkon që qeveria të përqendrohet te kontrolli i bizneseve informale, në vend që të rrisë taksën për sipërmarrjet që i paguajnë detyrimet.

“Në vend që të ndëshkohen sipërmarrjet që paguajnë rregullisht taksat, vëmendja e qeverisë duhet të orientohet drejt informalitetit”, shkruhej në reagim.

Shoqata kërkoi gjithashtu pezullimin e propozimit dhe zhvillimin e konsultimeve me përfaqësuesit e turizmit përpara marrjes së një vendimi.

Paketa Fiskale 2027 përfshin edhe ndryshime të tjera, si rritjen e TVSH-së së përgjithshme nga 20% në 21% dhe uljen e saj për disa produkte ushqimore. Qeveria argumenton se këto masa synojnë një shpërndarje më të drejtë të barrës së taksave.

Ndërkohë, propozimi për rritjen e taksës së akomodimit mbetet në procesin e shqyrtimit parlamentar. Për t’u zbatuar, ndryshimi duhet të miratohet nga Kuvendi.