Dy punonjës humbin jetën gjatë shërbimit në Burgun 313

Brenda pak më shumë se tre orësh, dy punonjës të Institucionit të Ekzekutimit të Vendimeve Penale “Jordan Misja” në Tiranë humbën jetën gjatë ushtrimit të detyrës, mes mbrëmjes së 29 qershorit dhe orëve të para të 30 qershorit, ndërsa autoritetet nuk kanë bërë ende publik shkakun mjekësor të vdekjeve.

“Gjatë ushtrimit të detyrës, dy punonjës të IEVP “Jordan Misja”, Zog Muhametaj, Specialist i Informacionit me gradën Komisar, dhe Pëllumb Vrana, Teknik i Kamerave, me gradën Kryeinspektor, humbën jetën si pasojë e gjendjeve të papritura shëndetësore”, shkroi Drejtoria e Përgjithshme e Burgjeve në njoftimin zyrtar.

Sipas kronologjisë së publikuar nga Drejtoria e Përgjithshme e Burgjeve, rasti i parë u regjistrua në mbrëmjen e 29 qershorit, kur Zog Muhametaj u ndje keq gjatë instruktazhit të stafit për ndërrimin e shërbimit.

“Rreth orës 21:36 të datës 29 qershor, Zog Muhametaj, gjatë instruktazhit të stafit për ndërrimin e shërbimit, pësoi një gjendje të rëndë shëndetësore”, shkroi institucioni.

Kolegët dhe personeli shëndetësor i institucionit ndërhynë menjëherë, duke i dhënë ndihmën e parë dhe duke e transportuar me urgjencë drejt Spitalit Ushtarak. Pavarësisht përpjekjeve të ekipit mjekësor, ai nuk arriti të mbijetojë.

Pak orë më vonë, rreth mesnatës së 30 qershorit, edhe Pëllumb Vrana pësoi një gjendje të rëndë shëndetësore gjatë ushtrimit të detyrës. Sipas njoftimit zyrtar, atij iu dha ndihma e parë nga kolegët dhe infermierja e institucionit, ndërsa më pas u transportua me urgjencë drejt Qendrës Spitalore Universitare “Nënë Tereza”, ku ndërroi jetë rreth orës 01:00.

Ndonëse kronologjia e publikuar nga institucioni i atribuon të dy rastet një gjendjeje të papritur shëndetësore, në njoftim nuk jepet asnjë informacion nëse punonjësit kishin probleme të mëparshme shëndetësore apo faktorë të tjerë që mund të kenë ndikuar në vdekjen e tyre.

Në njoftimin e saj, Drejtoria e Përgjithshme e Burgjeve e vlerësoi kontributin e dy punonjësve në sistemin penitenciar shqiptar, duke theksuar angazhimin e tyre ndër vite.

“Profesionalizmi dhe përkushtimi i tyre në ushtrimin e detyrës do të mbeten një shembull për institucionin dhe për të gjithë punonjësit e tij”, shkroi njoftimi.

Zog Muhametaj ishte pjesë e sistemit penitenciar që prej vitit 2015 dhe, që nga viti 2023, shërbente në IEVP “Jordan Misja”. Pëllumb Vrana ushtronte detyrën e Teknikut të Kamerave, duke kontribuar në funksionimin e sistemeve të sigurisë së institucionit.

Ngjarja në Burgun 313 pason një tjetër rast me pasojë vdekjen në sistemin penitenciar. Më 28 qershor, një i paraburgosur 62-vjeçar humbi jetën në IEVP Shkodër, pasi pësoi një përkeqësim të papritur të gjendjes shëndetësore. Ai u transportua drejt Spitalit të Koplikut, por nuk arriti të mbijetonte.

Deri tani, autoritetet nuk kanë bërë publik zyrtarisht shkakun mjekësor të vdekjes së dy punonjësve të IEVP “Jordan Misja”. Në njoftimin e Drejtorisë së Përgjithshme të Burgjeve thuhet vetëm se të dy pësuan gjendje të papritura shëndetësore gjatë ushtrimit të detyrës.