Vjedhja e xhamisë së Dragostunjës në Librazhd, policia shpall në kërkim autorin e dyshuar 

Një objekt kulti në fshatin Dragostunjë të Librazhit ra pre e grabitjes, ndërsa policia vendore bëri me dije se identifikoi autorin e dyshuar dhe e shpalli atë në kërkim. Vlera e marrë dyshohet të jetë rreth 5 mijë euro dhe ishte dhuruar gjatë muajit të Ramazanit dhe Fitër Bajramit.

Xhamia e Dragostunjës, e cila ndodhet në fshatin me të njëjtin emër u gjet e grabitur pasditen e së enjtes, pak ditë pas përfundimit të muajit të shenjtë të Ramazanit dhe festimit të Fitër Bajramit.

Shuma e grabitur mendohet se ka kap vlerën rreth 5 mijë euro dhe u mor nga vendi ku mbaheshin të ardhurat e dhuruara nga besimtarët. Sipas burimeve nga vendi i ngjarjes, xhamia është grabitur pak pas faljes së mesditës, ndërkohë që menjëherë është kërkuar ndihma e policisë. 

Policia e Elbasanit, në një informacion të shpërndarë për mediat bëri me dije se identifikoi autorin e dyshuar të grabitjes dhe e shpalli atë në kërkim.  

“Specialistët për Hetimin e Krimeve të Komisariatit të Policisë Librazhd referuan materialet në Prokurori dhe shpallën në kërkim shtetasin E. Sh., 36 vjeç, pasi dyshohet se ka vjedhur para, në arkën e një objekti kulti, në fshatin Dragostunjë”, thuhej në njoftimin për shtyp të policisë. 

Xhamia e Dragostunjës është një nga më të frekuentuarat në zonën e Librazhit dhe u hapi dyert për falje në vitin 2015, si një ndër xhamitë më të mëdha në vend. Sasia e lekëve dhe e eurove të grabitura, mendohet se shkonte në rreth 5 mijë euro dhe ishte grumbulluar në arkën e xhamisë gjatë ditëve të shenjta të muajit të Ramazanit dhe në ditën e Fitër Bajramit.