Parkimet me pagesë në Durrës, 100 sheshe për rezidentët dhe 20 policë më shumë për kontrollin

Këshilli Bashkiak i Durrësit miratoi të mërkurën ndryshimet në skemën e parkimeve me pagesë, duke përcaktuar përdorimin e kartës së rezidentit dhe vende të rezervuara në rreth 100 sheshe brenda blloqeve të banimit, ndërsa për kontrollin e skemës miratoi edhe shtimin me 20 punonjës të Policisë Bashkiake.

“Janë 100 sheshe brenda blloqeve të banimit, të cilat do të pajisen me sinjalistikën përkatëse, ku do të jenë vendet e rezervuara për banorët”, tha Sako.

Sipas saj, për të përdorur parkimet e rezidentëve dhe për të mos u penalizuar nga Policia Bashkiake, banorët duhet të pajisen me kartën e rezidentit. Karta do të ketë numër serial dhe do të lidhet me lagjen ku banon qytetari, ndërsa ndarja e mëparshme sipas rajoneve është detajuar në nivel lagjeje.

Pjesa më e madhe e rrugëve të përfshira në skemën me pagesë, sipas Sakos, ndodhen në lagjet nr. 1, 2 dhe 3.

Ndryshimet u miratuan me 29 vota pro dhe 7 kundër. 

Kundër tyre u pozicionua grupi i këshilltarëve demokratë. Kreu i grupit, Ardian Muka, tha se materiali i paraqitur këtë herë kishte korrigjuar një pjesë të mangësive të projektit të mëparshëm, por argumentoi se Bashkia nuk është ende gati për zbatimin e skemës.

“Nuk mund të fillosh nga tarifa dhe pastaj të mendosh për shërbimin. Përpara se qytetarëve t’u kërkohet të paguajnë, Bashkia duhet të bëjë transparencë për kapacitetet reale të parkimit, mënyrën e funksionimit të skemës dhe ku do të shkojnë të ardhurat e mbledhura”, tha Muka.

Ai kërkoi që fillimisht të shtohen kapacitetet e parkimit dhe më pas të përcaktohet kostoja për qytetarët, duke konfirmuar votën kundër të grupit që drejton.

Skema e miratuar në vitin 2024 bën dallim mes parkimeve për rezidentët brenda blloqeve të banimit dhe parkimeve me pagesë në rrugë.

Hapësirat publike dhe rrugëkalimet e mjeteve mes pallateve, përfshirë ato brenda zonave A dhe B, janë përcaktuar për parkimin e rezidentëve pa pagesë. Ndërsa për rrugët e përcaktuara si parkim publik me pagesë, paketa fiskale e vitit 2026 parashikon për rezidentët e zonave A dhe B një tarifë fikse prej 10 mijë lekësh në vit. 

Për përdoruesit e tjerë, vendimi i vitit 2024 përcakton tarifën prej 100 lekësh në orë në Zonën A dhe 40 lekësh në orë në Zonën B. Mes rrugëve të Zonës A janë “Taulantia”, “Currilat”, bulevardet “Epidamn” dhe “Dyrrah”, “Egnatia”, “Adria” dhe “Pavarësia”, ndërsa Zona B përfshin ndër të tjera rrugët “Mujo Ulqinaku”, “Stefan Kaculini”, “Glaukia” dhe “Hysen Kërtusha”. 

Në të njëjtën mbledhje, Këshilli Bashkiak miratoi edhe shtimin me 20 punonjës të Policisë Bashkiake. Sako e lidhi shtimin e personelit kryesisht me hyrjen në fuqi të skemës së parkimeve me pagesë dhe nevojën për kontrollin e saj.

Vendimi për shtimin e punonjësve mori 29 vota pro, 7 kundër dhe 1 abstenim. Sipas të dhënave të paraqitura gjatë mbledhjes, Policia Bashkiake ka rreth 80 punonjës, ndërsa disa këshilltarë e konsideruan të pamjaftueshme shtesën prej 20 vetash për territorin e bashkisë dhe fluksin që Durrësi përballon gjatë sezonit turistik.

Raporti mes kostos dhe shërbimit u ngrit edhe nga këshilltari Dritan Burgija, i cili iu referua zgjerimit të kontrollit të parkimeve dhe masave administrative.

“Kur qytetarit i shtojmë tarifë, kontroll apo kosto publike, a po i japim në të njëjtën masë një shërbim më të mirë?”, tha Burgija.

Kryebashkiakja njoftoi gjithashtu se për vitet në vijim parashikohet ndërtimi i dy parkimeve nëntokësore, një pranë Muzeut të Dëshmorëve dhe një në shëtitoren “Taulantia”.

Skema e parkimeve me pagesë është miratuar që në vitin 2024, ndërsa ndryshimet e fundit detajojnë mënyrën e përdorimit të kartës së rezidentit dhe administrimin e saj. Teksti i zbardhur i vendimit të miratuar më 16 shtator nuk rezulton ende i publikuar në seksionin e vendimeve të Këshillit Bashkiak të kontrolluar të enjten.