SPAK arreston administratorin e inceneratorit të Elbasanit, nën dyshime për korrupsion
Administratori i kompanisë që merret me trajtimin e mbetjeve në qarkun e Elbasanit, Leli Kaja, u arrestua në flagrancë. Sipas SPAK-ut, ai dyshohet se kërkoi dhe mori 400 mijë lekë nga administratori i një biznesi, në këmbim të moskryerjes së detyrave.
Godina e SPAK dhe Gjykatës së Posaçme në Rrugën "Jordan Misja", Tiranë. Foto ilustruse Media Amfora.
Hetuesit e Byrosë Kombëtare të Hetimit arrestuan më 5 tetor administratorin e shoqërisë “ECO-ELB”, Leli Kaja, i dyshuar për marrjen e 400 mijë lekëve ryshfet nga administratori i një biznesi, gjatë një hetimi të drejtuar nga Prokuroria e Posaçme.
Sipas SPAK-ut, paratë ishin kërkuar dhe marrë “në këmbim të moskryerjes së detyrave që i ngarkon ligji si administrator i shoqërisë ‘ECO-ELB’ sh.a.”, shkruhej në njoftimin e SPAK.
“ECO-ELB” është një kompani publike në pronësi të bashkive të qarkut Elbasan. Sipas ekstraktit të regjistrit tregtar, Bashkia Elbasan zotëron 52% të aksioneve, ndërsa Cërriku, Prrenjasi, Gramshi, Peqini, Belshi dhe Librazhdi zotërojnë nga 8% secila.
Veprimtaria e shoqërisë përfshin grumbullimin dhe përpunimin e mbetjeve të këtyre bashkive, si dhe trajtimin e tyre me djegie.
Hetimi u regjistrua më 1 tetor 2026, pas referimit të BKH-së. Prokuroria njoftoi se gjatë tij ishin përdorur metoda speciale hetimi dhe veprime të simuluara, pa dhënë hollësi mbi mënyrën e zhvillimit të operacionit.
“Gjatë kontrollit personal, iu gjet dhe iu sekuestrua shuma e sipërpërmendur”, shkruhet në njoftim.
Kaja dyshohet për veprën penale “Korrupsioni pasiv i personave që ushtrojnë funksione publike”. Sipas përshkrimit të prokurorisë, dyshimi lidhet me kërkimin dhe marrjen e parave për të mos përmbushur detyrimet e funksionit të tij.
“Hetimet vijojnë për zbardhjen e plotë të rrethanave të rastit dhe identifikimin e personave të tjerë të përfshirë”, njoftoi SPAK.
Prokuroria nuk identifikoi persona të tjerë dhe nuk dha hollësi mbi rolin që mund të kenë pasur në këtë rast. Dyshimet ndaj administratorit mbeten objekt hetimi.
