Siguria ushqimore, ambasadori i BE-së thirrje për forcimin e kontrollit dhe standardeve

Në Tiranë, të martën gjatë takimit “Siguria Ushqimore – Prioritet Kombëtar dhe Përgjegjësi e Përbashkët për Integrimin në BE”, me operatorë të biznesit ushqimor, ambasadori i Bashkimi Evropian në Shqipëri, Silvio Gonzato, bëri thirrje për forcimin e kontrollit dhe standardeve, duke theksuar se funksionimi real i sistemeve është thelbësor për përmbushjen e kërkesave dhe avancimin e integrimit në BE.

“Trajtimi i papërshtatshëm i qumështit, investimet në sistemet e grumbullimit dhe forcimi i kontrollit të cilësisë nuk janë opsionale, por hapa thelbësorë në procesin e anëtarësimit të Shqipërisë në BE”,  tha ambasadori Silvio Gonzato në fjalën e tij. 

Gonzato theksoi se përmbushja e standardeve në sigurinë ushqimore nuk është vetëm një kërkesë formale, por një kusht real për ndërtimin e një zinxhiri vlere që përputhet me kërkesat e tregut evropian. Sipas tij, pa cilësi të qëndrueshme në prodhimin primar, është e pamundur të garantohet përputhshmëria me standardet e BE-së.

Në të njëjtën kohë, Gonzato vuri në dukje se ky proces përfaqëson një mundësi të rëndësishme për bizneset shqiptare, duke hapur akses në një nga tregjet më të mëdha në botë, por njëkohësisht paraqet edhe sfida të konsiderueshme, veçanërisht për operatorët e vegjël.

“Harmonizimi me standardet e BE-së forcon besimin e konsumatorëve, përmirëson reputacionin e produkteve shqiptare dhe krijon mundësi të reja për investime dhe eksporte”,  u shpreh ai, duke shtuar se kjo kërkon investime në infrastrukturë, pajisje, standarde më të rrepta të higjenës dhe përmirësim të gjurmueshmërisë.

Takimi u zhvillua me pjesëmarrjen e përfaqësuesve të sektorit ushqimor, institucioneve shtetërore dhe aktorëve të tjerë të përfshirë në zinxhirin e sigurisë ushqimore, duke synuar rritjen e ndërgjegjësimit dhe koordinimit mes palëve për përmbushjen e standardeve të kërkuara.

Gonzato theksoi se përmbushja e këtyre standardeve kërkon jo vetëm angazhim nga biznesi, por edhe mbështetje të qartë nga institucionet, veçanërisht në drejtim të transparencës dhe zbatimit të drejtë të rregullave.

“Procesi duhet të jetë transparent, i drejtë dhe i bazuar në kritere të qarta teknike. Pa besim dhe transparencë, as reformat më të mirëprojektuara nuk mund të kenë sukses”,  tha ai.

Në fjalën e tij, ambasadori nënvizoi gjithashtu rolin e mbështetjes së Bashkimi Evropian për Shqipërinë në këtë proces, duke përmendur financimin prej rreth 12.5 milionë eurosh në sektorin e sigurisë ushqimore.

Sipas tij, kjo mbështetje synon forcimin e kapaciteteve institucionale dhe sjelljen e praktikave më të mira europiane në vend, përmes bashkëpunimit me partnerë ndërkombëtarë dhe ekspertizës së vendeve anëtare.

Ambasadori theksoi se integrimi europian nuk është një proces i njëanshëm, por një përpjekje e përbashkët që kërkon bashkëpunim të ngushtë mes institucioneve dhe sektorit privat.

Në takim morën pjesë edhe kryeministri Edi Rama dhe përfaqësues të Autoritetit Kombëtar të Ushqimit, të cilët diskutuan mbi sfidat dhe hapat e nevojshëm për përmirësimin e standardeve në sektor.

Në përfundim, u theksua se përmbushja e kushteve për Kapitullin 12 të negociatave, që lidhet me sigurinë ushqimore, mbetet një nga prioritetet kryesore në rrugën e Shqipërisë drejt anëtarësimit në BE.