Qendra e Shirokës, e rikualifikuar me një investim prej rreth 410 milionë lekësh paraqitet me kalldrëm të dëmtuar dhe pllaka të thyera. Sipas Bashkisë Shkodër dëmtimet janë shkaktuar nga kalimi i mjeteve të tonazhit të rëndë gjatë punimeve në aksin Shirokë-Zogaj, ndërsa riparimi do të kryhet vetëm pas përfundimit të tyre.
Pas një tjetër debati në Këshillin Bashkiak të Durrësit, plani për barazinë gjinore u miratua me 27 vota pro dhe 6 kundër, pasi në relacionin shoqërues u bënë ndryshime në terminologjinë që kishte penguar miratimin e tij në mbledhjen e kaluar.
Kuvendi miratoi ndryshimet ligjore që lejojnë vendosjen e parqeve eolike në toka bujqësore, me argumentin se do të nxisin zhvillimin e bujqësisë moderne dhe përdorimin e energjisë së rinovueshme. Deputeti socialist Erion Braçe votoi kundër, duke argumentuar se toka bujqësore duhet të përdoret për prodhim ushqimor dhe jo për aktivitete industriale.
Organizatat e medias ngritën shqetësime për përkeqësimin e klimës së lirisë së medias në Shqipëri. Sipas tyre, janë shtuar presioni, linçimi publik dhe përpjekjet për delegjitimimin e mediave, ndërsa shënjestrimi i gazetarit Gjergj Erebara dhe BIRN Albania përmendet si një rast ilustrues.
Hetimet në filialin e Postës Shqiptare në Durrës çuan në ndalimin e drejtoreshës, shefes së financës dhe arkëtares së institucionit. Sipas Policisë, ato dyshohen se kanë përvetësuar 69 milionë lekë të destinuara për shpërndarjen e pensioneve dhe ndihmave sociale, ndërsa Posta Shqiptare kishte deklaruar më herët se rasti i konstatuara nuk kishte lidhje me fondet e pensioneve apo me pagesat e pensionistëve.
Qeveria do të shfuqizojë ligjin për Investimet Strategjike dhe do të ndryshojë ligjin për Zonat e Mbrojtura, pas kërkesave të Bashkimit Evropian për përafrimin e legjislacionit me standardet evropiane. Deklaratat u bënë nga kryeministri Edi Rama dhe komisionerja për Zgjerimin, Marta Kos, ndërsa aktivistët i cilësuan ato si rezultat të protestave kundër projektit turistik në Zvërnec.
Ajo që nisi si një reagim kundër ndërhyrjeve në zonën e mbrojtur të Zvërnecit, brenda pak javësh u shndërrua në një lëvizje qytetare që mblodhi aktivistë, të rinj, familje, organizata dhe qytetarë nga e gjithë Shqipëria. Në ditën e 45-të të protestave, Amfora sjell kronologjinë dhe evolucionin e protestës të pagëzuar si “Revolucioni i Flamingove”, si një simbol i mbrojtjes së natyrës dhe pjesëmarrjes qytetare.
Posta Shqiptare njoftoi se ka kallëzuar në Prokurori një rast të dyshuar abuzimi me fondet në filialin e Durrësit, pas evidentimit të parregullsive gjatë një kontrolli të brendshëm.
Qëndresa Qytetare i është drejtuar Kontrollit të Lartë të Shtetit me kërkesë për auditimin e 4.2 milionë eurove të akorduara nga fondi rezervë i buxhetit të shtetit për financimin e pjesshëm të koncertit të Kanye West. Organizata kërkon verifikimin e ligjshmërisë së procesit të vendimmarrjes dhe përdorimit të fondeve publike.
Ishulli i Sazanit është destinacioni më i madh ishullor i Shqipërisë, ku natyra, peizazhi dhe gjurmët e së kaluarës bashkëjetojnë në një hapësirë të vetme. I hapur për vizitorët që prej vitit 2015, ai është kthyer në një nga ndalesat më të veçanta të turizmit detar në vend.
