Nga 33 masa sigurie të kërkuara nga Prokuroria e Durrësit për çështjen e mbetjeve të rrezikshme janë ekzekutuar 20, ndërsa 13 persona u shpallën në kërkim. Arrestimet tregojnë se hetimi nuk prek një hallkë të izoluar, por të gjithë sistemin e menaxhimit, kontrollit dhe mbikëqyrjes së mbetjeve, nga vendimmarrja te zbatimi.
Në Samitin e Zgjerimit të BE-së në Bruksel, Komisioni Evropian prezantoi “Paketën e Zgjerimit 2025”, duke vlerësuar progresin e vendeve të Ballkanit Perëndimor drejt anëtarësimit. Lidhur me Shqipërinë raporti evidentoi sfida serioze për lirinë e medias, të drejtat e njeriut dhe funksionimin e shoqërisë civile. Pavarësisht progresit të kufizuar në disa fusha, BE thekson se rruga e Shqipërisë drejt integrimit mbetet e qëndrueshme.
Në një rezolutë për Ballkanin Perëndimor, Parlamenti Evropian theksoi se mbrojtja e mjedisit dhe biodiversitetit në Shqipëri është thelbësore për integrimin në BE. Eurodeputetët kërkuan zbatimin e konventave ndërkombëtare dhe ndërprerjen e projekteve që sjellin pasoja të thella në mjedis.
