Adi Çoba u arrestua në Shkozet, në qendrën e grupit kriminal Troplini-Doçi
Byroja Kombëtare e Hetimit dhe autoritetet italiane arrestuan në Shkozet Adi Çobën, një nga personat e shpallur në kërkim ndërkombëtar në kuadër të operacionit “Ura”, që goditi një grup të dyshuar të trafikut ndërkombëtar të drogës. Sipas SPAK, ai u lokalizua në Shkozet, zonë që institucioni e identifikon si qendrën kryesore të grupit kriminal Troplini-Doçi.
Arrestimi i Adi Çobës nga agjentët e BKH në Shkozet. Foto e shpërndarë nga autoritet
Më 2 korrik, Byroja Kombëtare e Hetimit (BKH), në bashkëpunim me Qendrën Operative DIA të Barit, arrestoi në lagjen Shkozet të Durrësit Adi Çobën, të shpallur në kërkim ndërkombëtar në kuadër të operacionit “Ura”, i dyshuar për trafik ndërkombëtar të lëndëve narkotike.
“Pas konfirmimit se disa shtetas shqiptarë kishin arritur t’i shpëtonin operacionit ‘URA’, SPAK dhe autoritetet italiane i shtrinë hetimet në Durrës dhe në disa qytete në veri dhe jug të Italisë duke bërë të mundur lokalizimin e tij”, njoftoi SPAK.
Prokuroria e Posaçme identifikoi të arrestuarin si Adi Çoba, i cili u lokalizua në një lokal të vogël në lagjen e tij në Shkozet, ku dyshohet se qëndronte prej tre ditësh. Operacioni u zhvillua nga një skuadër e përbashkët hetimore mes SPAK dhe Drejtorisë Hetimore Antimafia të Barit, ndërsa pas arrestimit ai u shoqërua në ambientet e paraburgimit të Durrësit, në pritje të procedurave të ekstradimit.
“Në momentin e kapjes, ai kishte në zotërim një pistoletë automatike me dy karikatorë, si dhe katër dokumente të falsifikuara, mes të cilëve një kartë identiteti dhe një patentë italiane”, njoftoi SPAK.
Sipas Prokurorisë së Posaçme, arma dhe dokumentet e falsifikuara u sekuestruan si prova materiale. Institucioni vlerëson se këto elemente tregojnë lëvizjen e shpeshtë të të dyshuarit dhe lidhjen e tij me Italinë.
Operacioni “Ura” u zhvillua më 21 maj 2025 nga SPAK dhe Drejtoria Hetimore Antimafia e Barit, me mbështetjen e Interpolit, Zyrës së Ekspertit të Sigurisë pranë Ambasadës Italiane në Tiranë dhe Policisë së Shtetit. Gjatë operacionit u ekzekutuan 52 urdhërarreste, përfshirë dy të lëshuara nga Gjykata e Posaçme, ndaj personave të dyshuar për trafik ndërkombëtar të sasive të mëdha të lëndëve narkotike, pastrim të produkteve të veprës penale dhe vepra të tjera penale të lidhura me to. Autoritetet sekuestruan gjithashtu pasuri të luajtshme dhe të paluajtshme me vlerë disa milionë euro në Shqipëri dhe Itali.
Adi Çoba dyshohet si organizator dhe drejtues i një grupi kriminal të trafikut të drogës. Grupi kriminal Troplini-Doçi, me të cilin ai dyshohet se ishte i lidhur, vepronte mes rajonit italian të Puglias, Shqipërisë dhe Holandës.
Gjatë operacionit “Ura” u krye edhe sekuestrimi i pasurive të paluajtshme dhe të luajtshme në Shqipëri dhe Itali, në vlerën e disa miliona eurove.
