“Kurum” humbet lejen mjedisore, 2.800 tonë mbetje të rrezikshme mbeten në Durrës

Dy vite pas nisjes së 102 kontejnerëve me mbetje të rrezikshme nga Porti i Durrësit drejt Tajlandës, kompania “Kurum International”, nga aktiviteti i së cilës u prodhuan këto mbetje, ka humbur lejen mjedisore për veprimtarinë e saj në Elbasan.

Ministri i Mjedisit, Sofjan Jaupaj, firmosi më 3 nëntor 2026 urdhrin për shfuqizimin e lejes mjedisore të tipit A, që kompania dispononte prej vitit 2016 për prodhimin dhe përpunimin e çelikut dhe veprimtari të tjera në Kombinatin Metalurgjik, në Bradashesh.

“Shfuqizimin e lejes së mjedisit me PN-3843-09-2016, të subjektit ‘KURUM INTERNATIONAL’”, shrkuhet në urdhrin e ministrit, i cili hyn në fuqi menjëherë.

Vendimi vjen pas një inspektimi të zhvilluar më 15 qershor të këtij viti nga Agjencia Kombëtare e Mjedisit (AKM), ku u konstatuan shkelje në mënyrën se si kompania administronte dhe transferonte mbetjet e prodhuara nga aktiviteti i saj.

Sipas vendimit përfundimtar të inspektimit, të datës 25 qershor, kompania kishte transferuar mbetje skoriesh te një subjekt tregtar, në kundërshtim me kushtet e lejes mjedisore. Në një tjetër rast, mbetjet ishin transferuar te një kompani që nuk ishte e licencuar për trajtimin e tyre.

Për këto shkelje, AKM-ja vendosi një gjobë prej 2,6 milionë lekësh ndaj “Kurum International”, si dhe pezullimin e aktivitetit.

Kompania e ankimoi vendimin, por më 15 shtator Komisioni i Shqyrtimit të Ankimit pranë Inspektoratit të Përgjithshëm e la në fuqi vendimin e inspektimit.

Më 21 tetor, komisioni pranë AKM-së propozoi shfuqizimin e lejes mjedisore, propozim që u miratua nga ministri i Mjedisit në fillim të nëntorit.

Ndërsa kompania humbet lejen për aktivitetin industrial në Elbasan, fati i rreth 2.800 tonëve mbetje të rrezikshme, të prodhuara prej saj dhe të rikthyera në Shqipëri në tetor të vitit 2024, mbetet i pazgjidhur.

Siç ka raportuar më herët Media Amfora, hetimi i Prokurorisë së Durrësit zbuloi se mbetjet ishin paraqitur në dokumentacionin e eksportit si mall tregtar industrial, pa iu nënshtruar verifikimeve që do të përcaktonin rrezikshmërinë e tyre.

Hetimi përfshiu përfaqësues të kompanisë “Kurum International”, subjekte të tjera private të përfshira në eksportin e mbetjeve, si dhe punonjës e drejtues të doganës, portit dhe Agjencisë Kombëtare të Mjedisit.

Në shkurt të këtij viti, Gjykata e Durrësit caktoi masat e sigurisë për 20 nga 33 personat e dyshuar, ndërsa administratorët dhe drejtuesit e kompanive private, të dyshuar si organizatorë të transportit të paligjshëm të mbetjeve, ishin shpallur në kërkim.

“Kurum International” ka mohuar përfshirjen në eksportin e mbetjeve të rrezikshme.

Pas kthimit në Portin e Durrësit, kontejnerët u sekuestruan në nëntor të vitit 2024 dhe u zhvendosën në Porto-Romano, ku qëndruan për rreth një vit. Në mars të këtij viti, ato u transportuan në Shënavlash, pranë banesave, bizneseve dhe Universitetit “Aleksandër Moisiu”.

Në një reportazh të publikuar në gusht, Amfora dokumentoi praninë e 102 kontejnerëve në këtë zonë të banuar, ndërsa banorët treguan se nuk ishin informuar nga institucionet për vendosjen e mbetjeve pranë tyre.

“Ne nga televizori e morëm vesh për këto mbetje. Askush nuk na ka thënë gjë”, tregoi një banor i zonës për Amforën.

Agjencia e Administrimit të Pasurive të Sekuestruara dhe të Konfiskuara, që ka në ruajtje kontejnerët, e argumentoi përzgjedhjen e Shënavlashit me arsye “logjistike dhe operacionale”.

Megjithatë, në përgjigjet zyrtare për Amforën, institucionet nuk kishin bërë të ditur një afat për largimin dhe trajtimin përfundimtar të mbetjeve.

Vendimi i Ministrisë së Mjedisit për heqjen e lejes së “Kurum International” nuk përcakton masa për trajtimin e mbetjeve të depozituara në Durrës, të cilat vijojnë të jenë objekt i hetimit penal.