Gjykata e Posaçme dënoi 29 të pandehurit e akuzuar për trafikim emigrantësh
Gjykata e Posaçme shpalli fajtorë 29 persona të akuzuar si pjesë e një grupi kriminal që organizonte kalimin e paligjshëm të emigrantëve drejt Mbretërisë së Bashkuar, Shteteve të Bashkuara dhe Kanadasë. Sipas hetimeve, rrjeti veproi për rreth dy vjet, duke përdorur dokumente të falsifikuara dhe itinerare të ndryshme.
Godina e SPAK dhe Gjykatës së Posaçme në Rrugën "Jordan Misja", Tiranë. Foto: Media Amfora
Gjykata e Posaçme kundër Korrupsionit dhe Krimit të Organizuar dënoi të hënën 29 të pandehur, të akuzuar për ndihmë për kalim të paligjshëm të kufijve dhe pjesëmarrje në grup të strukturuar kriminal, duke mbyllur me gjykim të shkurtuar një proces që lidhej me një rrjet që organizonte kalimin e paligjshëm të emigrantëve drejt Mbretërisë së Bashkuar, Shteteve të Bashkuara dhe Kanadasë.
Sipas dispozitivit, të gjithë të pandehurit u deklaruan fajtorë për akuza që lidhen me ndihmën për kalim të paligjshëm të kufijve, pjesëmarrjen në grup të strukturuar kriminal, falsifikimin e dokumenteve dhe, në raste të veçanta, edhe për vepra të tjera penale, sipas rolit të secilit në skemë.
Sipas hetimeve të Prokurorisë së Posaçme, veprimtaria e grupit është zhvilluar gjatë viteve 2022-2024. Anëtarët e grupit organizonin kalimin e paligjshëm të emigrantëve kundrejt pagesave, duke përdorur dokumente identifikimi dhe udhëtimi të falsifikuara. Destinacionet kryesore ishin Mbretëria e Bashkuar, Shtetet e Bashkuara të Amerikës dhe Kanadaja, ndërsa udhëtimet realizoheshin përmes rrugëve tokësore, ajrore dhe detare.
Në njoftimin e saj, Gjykata e Posaçme bën me dije se procesi penal u zhvillua ndaj 29 të pandehurve, mes tyre Njazi Ademaj, Ylli Brahimaj, Rrezart Domi, Osman Luca, Xhelal Krasniqi dhe Ylli Çaushaj, ndërsa çështja u shqyrtua me rregullat e gjykimit të shkurtuar.
Sipas vendimit, dënimet më të larta, pas aplikimit të gjykimit të shkurtuar, arritën në 7 vjet e 4 muaj burg, ndërsa për të pandehurit e tjerë gjykata caktoi dënime që variojnë nga 1 vit e 8 muaj deri në 7 vjet e 4 muaj burg, në varësi të akuzave dhe rolit të secilit në skemë.
Ndaj të pandehurve u ngritën akuza për “Ndihmë për kalim të paligjshëm të kufijve”, “Falsifikim të letërnjoftimeve, pasaportave ose vizave”, “Grup të strukturuar kriminal”, “Kryerje të veprës penale nga organizata kriminale dhe grupi i strukturuar kriminal”, si dhe “Shpërdorim detyre” për një prej të pandehurve. Gjykata vendosi gjithashtu konfiskimin ose asgjësimin e provave materiale të përdorura në aktivitetin kriminal, përfshirë dokumente të falsifikuara, pajisje dhe shuma parash.
