Këshilli Bashkiak i Poliçanit ka kundërshtuar unanimisht propozimin për shkrirjen e bashkisë dhe bashkimin e saj me Beratin. Qëndrimi u formalizua pas dëgjesave me qytetarët, ndërsa 15 këshilltarët kanë paralajmëruar dorëheqjen nëse Kuvendi miraton shkrirjen.
Banorët në zonën Gojan-Gjegjan në Pukë u evakuuan, ndërsa era e fortë dhe terreni i thyer po vështirësojnë ndërhyrjen për shuarjen e zjarreve. Organizata për mbrojtjen e mjedisit, PPNEA, paralajmëroi për rrezikun ndaj familjeve, si edhe për dëmtimin e pyjeve dhe habitateve. Situata mbetet e vështirë edhe në Dukat të Vlorës.
Një konflikt i dyshuar mes disa grupeve të të miturve u parandalua nga policia në zonën e Kombinatit, në Tiranë. Në përfundim të veprimeve u proceduan në gjendje të lirë 28 të mitur të moshave 13-17 vjeç, ndërsa u sekuestruan pesë armë të ftohta dhe mjete të mprehta.
Kontrolli i Lartë i Shtetit evidentoi problematika në politikat, financimet dhe investimet në fushën e kulturës dhe trashëgimisë kulturore, gjatë auditimit të (ish-)Ministrisë së Ekonomisë, Kulturës dhe Inovacionit. Gjetjet prekën nga Strategjia e Kulturës dhe financimi i projekteve artistike, te Bonusi i Rijetëzimit dhe ndërhyrjet në disa objekte të trashëgimisë kulturore.
Lajme që e paraqitën si “shkarkim” transferimin e myftiut të Vlorës, Ardit Hoxhllaku, e lidhën lëvizjen me qëndrimet e tij për hebrenjtë dhe Palestinën, si edhe me presione të pretenduara nga qeveria dhe kërkesa nga Ambasada e Izraelit. Ndërkohë, Komuniteti Mysliman i Shqipërisë e përfshiu Hoxhllakun në një proces më të gjerë lëvizjesh brenda institucionit. Myftiu, i njohur për qëndrimet kritike ndaj çështjeve politike, kombëtare dhe problematikave të komunitetit, u transferua në Peqin.
Policia e Shtetit do të ketë një strukturë të specializuar për krimet mjedisore, ndërsa ministri i Punëve të Brendshme, Besfort Lamallari, e cilësoi të pallogaritshëm dëmin e shkaktuar nga zjarret e këtij viti në fondin pyjor. Agjencia Kombëtare e Mbrojtjes Civile raportoi të hënën 33 vatra zjarri në 24 orët e fundit, nga të cilat 8 mbeten aktive dhe 5 në monitorim.
Rruga “Naim Frashëri” në Pogradec u përmbyt të premten pas reshjeve të shiut, pak kohë pas ndërhyrjes për restaurimin dhe rikualifikimin e zonës historike. Projekti ishte përballur më herët me kritika për mënyrën se si ndërhyrja kishte trajtuar identitetin arkitekturor të rrugës, ndërsa përmbytja riktheu vëmendjen te infrastruktura e zonës.
Policia e Durrësit arrestoi dy persona në Maminas, pasi në automjetin ku udhëtonin u gjetën 3 pistoleta dhe 34 fishekë. Armët dyshohet se u trafikuan nga Kosova me qëllim shitjen te grupet kriminale në Shqipëri, ndërsa hetimet vijojnë për identifikimin e personave të tjerë të përfshirë.
14 shtetas nga Maqedonia e Veriut dhe Kosova u refuzuan në kufirin shqiptar në tre vitet e fundit. Raste të tjera në kufi dhe shpalljet “non grata” nxitën debat publik, duke u lidhur me protestat e “Revolucionit të Flamingove”, por asnjë prej 14 refuzimeve nuk kishte si shkak kërcënimin ndaj sigurisë kombëtare apo rendit publik.
Nëntë nga 25 vatrat e zjarrit të raportuara gjatë 24 orëve të fundit mbeten aktive në vend, ndërsa situata më problematike paraqitet në Lurë, ku flakët janë afruar pranë disa banesave. Rreth 220 forca dhe efektivë janë angazhuar në operacion, ndërsa ndërhyrjet po vijojnë edhe nga ajri.
