“Buzëqesh me 2022”, nisma e bamirësisë në Durrës

Për të pestin vit radhazi të rinjtë, organizatat, qytetarët dhe bizneset në qytetin e Durrësit i janë bashkuar kauzës për të ndihmuar personat në nevojë ekonomike. 

Fokusi i nismës së bamirësisë ishte tek familjet në të gjithë qytetin, duke nisur pranë qendrës dhe deri në periferi, në zonën e Spitallës, Porto-Romanos, Ish-Kënetës, Shkozetit dhe Plazhit.

47 familje u ndihmuan me pako ushqimore dhe fruta, si edhe me veshje të dhuruara dhe aksesorë të tjerë. 

Nismës ju bashkuan qytetarë, aktivistë, Organizata të Shoqërisë Civile dhe biznese, duke dhuruar ushqime ose rroba. Dhurimet monetare ishin në vlerën 100 mijë lekë dhe u konvertuan në ushqime dhe fruta, që ju shpërndanë familjeve në nevojë.

Nisma e bamirësisë u ndërmor nga Organizatat Jo-fitimprurëse dhe aktorët e tjerë, si Media Amfora, Grupimi “Bicycle Durrës”, “Albanian Centre for Education, Tourism and Entrepreneurship – CEAPAL”, CSDC Durrës (Qendra e Zhvillimit të Shoqërisë Civile), Qendra Durrësi Aktiv, Organizata “JETA Tier und Mensch” (JETA Kafshët dhe Njerëzit), Ofiçina e Turizmit dhe biznesi “Gerti Decoration”.

Ata falënderuan të gjithë qytetarët dhe bizneset që ju përgjigjën thirrjes së tyre, duke dhuruar shpresë dhe ngrohtësi në fund vit për familjet në nevojë.

________

________

Foto në krye: Fëmijë pranë pakove ushqimore që u shpërndanë në fund vit. Foto: Griseld Hoxha