SPAK dërgon për gjykim të akuzuarin për trafik armësh 

Prokuroria e Posaçme (SPAK) dërgoi të mërkurën, më 28 tetor 2026, në Gjykatën e Posaçme kërkesën për gjykimin e Eugert Sinos, të akuzuar si drejtues dhe financues i një grupi të strukturuar kriminal që siguronte armë zjarri dhe municione. Sipas hetimeve, ai dyshohet se ka bashkëpunuar me persona të tjerë për sigurimin e 23 armëve dhe mijëra fishekëve luftarakë.

Sino ishte arrestuar në tetor të vitit 2025, pas zbulimit të një sasie armësh në një furgon në rrugën “Myslym Shyri”, në Tiranë. Në atë kohë ai mohoi lidhjen me armët, duke pretenduar se nuk kishte dijeni se kush i kishte vendosur në automjet.

Sipas njoftimit të SPAK-ut, grupi kishte siguruar pesë armë të gjata ose snajperë, gjashtë armë automatike, 12 pistoleta, 17 krehra, katër tyta armësh dhe 7820 fishekë luftarakë të kalibrave të ndryshëm.

“Sipas akt-ekspertimeve respektive ka rezultuar se armët e zjarrit dhe municionet luftarake janë në gjendje të rregullt teknike dhe mund realizojnë qitje”, shkruhet në njoftimin e Prokurorisë së Posaçme.

Ekspertimet tregojnë se armët dhe municionet ishin funksionale. SPAK e akuzon Sinon për mbajtje dhe prodhim të paligjshëm të armëve dhe municioneve, si dhe për drejtimin e një grupi të strukturuar kriminal.

“Në përfundim të hetimeve është konkluduar se i pandehuri Eugert Sino ka pasur rolin e drejtuesit dhe financuesit në këtë veprimtari të paligjshme kriminale”, njoftoi SPAK.

Prokuroria e Posaçme ka veçuar një pjesë të dosjes për të vijuar hetimet ndaj personave të tjerë që dyshohet se kanë bashkëpunuar me Sinon. Hetimi i mëtejshëm do të përqendrohet në identifikimin e tyre dhe sqarimin e rolit që mund të kenë pasur në veprimtarinë kriminale.

Hetimet janë zhvilluar në bashkëpunim me autoritetet e drejtësisë së Kosovës, Policinë e Shtetit dhe Byronë Kombëtare të Hetimit. Eugert Sino tashmë do të përballet me akuzat në Gjykatën e Posaçme.