Vatra të reja dhe riaktivizime, zjarret vijojnë në disa zona të vendit
Zjarre të reja janë shfaqur në disa zona të vendit, ndërsa vatra të tjera janë riaktivizuar pas ndërhyrjeve të ditëve të fundit. Situata vijon të kërkojë ndërhyrje në Pukë, Dibër, Mirditë dhe në Malin e Dajtit, ndërsa strukturat e emergjencave po mbajnë nën monitorim edhe zona ku zjarret janë izoluar.
Zjarrfikësit duke shuar zjarrin në pyjet e Pukës. Foto: AKMC
Vatrat e zjarrit vijojnë të prekin disa zona të vendit, pas ditësh operacionesh të strukturave të emergjencave dhe Forcave të Armatosura.
Në Pukë, zona Gojan-Gjegjan ka qenë ndër më problematiket gjatë ditëve të fundit. Zjarret kanë prekur sipërfaqet pyjore në Kurorën e Tërbunit dhe zonat përreth, ndërsa ndërhyrjet janë vështirësuar nga terreni i thyer dhe era.
Situata në këtë zonë ka kërkuar ndërhyrjen e strukturave vendore dhe mbështetjen e Forcave të Armatosura. Në fazën më problematike të zjarrit u krye edhe evakuimi i banorëve për shkak të afrimit të flakëve pranë zonave të banuara.
Forcat e Armatosura kanë qenë të angazhuara gjatë ditëve të fundit edhe në zona të tjera të vendit. Ministria e Mbrojtjes e ka vendosur përballimin e zjarreve në fokus të operacioneve të saj gjatë gushtit, ndërsa botimi zyrtar i institucionit i 21 gushtit e përshkruan angazhimin si ndërhyrje “në mbrojtje të jetës dhe natyrës”.
Operacionet zhvillohen në koordinim me Agjencinë Kombëtare të Mbrojtjes Civile, prefekturat dhe njësitë e qeverisjes vendore, strukturë koordinimi që konfirmohet edhe në raportimet zyrtare të ministrisë për zjarret gjatë këtij muaji.
