Shuhet Rexhep Qosja, një nga figurat më të rëndësishme të mendimit shqiptar
Akademiku Rexhep Qosja u nda nga jeta më 23 prill në Prishtinë, ndërsa u varros në një ceremoni private. Ikja e tij ka nxitur reagime në Shqipëri dhe Kosovë, ku vlerësohet si një nga figurat më ndikues të mendimit, letërsisë dhe debatit kombëtar shqiptar.
Rexhep Qosja në studion e tij. Foto: Marrë nga faqja e tij zyrtare në Facebook
Është ndarë nga jeta më 23 prill 2026 në moshën 89-vjeçare në Prishtinë akademiku Rexhep Qosja, ndërsa varrimi u zhvillua në rreth të ngushtë familjar, sipas dëshirës së tij.
“Njoftojmë se sot, më datë 23.4.2026 është ndarë nga jeta dhe është varrosur Rexhep Qosja”.
Njoftimi u bë publik nga nipi i tij, Valjet Rexhepi, përmes një reagimi në rrjetet sociale, ku konfirmohet se ceremonia u zhvillua pa praninë e publikut dhe pa organizime zyrtare.
Në të njëjtin reagim, familja thekson se kjo ishte një zgjedhje e vetë akademikut dhe kërkon respektimin e privatësisë.
“Lusim që privatësia jonë të respektohet dhe të na mundësohet të mbajmë zi në qetësi”, shkoi nipi i tij Valjet Rexhepi.
Rexhep Qosja ishte ndër intelektualët që nuk synoi të ishte neutral. Në dekada aktiviteti akademik dhe publik, ai ndërtoi një profil që sfidonte narrativat dominuese, nga historia e letërsisë shqipe, te mënyra si artikulohet çështja kombëtare.
Pas lajmit për ndarjen nga jeta të Rexhep Qosja, figura politike dhe institucionale në Kosovë dhe Shqipëri e cilësuan atë si një nga shtyllat e mendimit akademik shqiptar, duke vlerësuar kontributin e tij në kulturë dhe identitet kombëtar.
Mesazhe ngushëllimi erdhën nga drejtues institucionesh dhe liderë politikë, të cilët theksuan se trashëgimia e tij intelektuale do të mbetet referencë për brezat e ardhshëm dhe pjesë e kujtesës kolektive shqiptare.
Kush ishte Rexhep Qosja
Rexhep Qosja (1936-2026) ishte historian i letërsisë, kritik letrar, shkrimtar dhe publicist, një nga figurat më të rëndësishme të albanologjisë moderne.
I lindur në Vuthaj, ai u formua në Prishtinë dhe Beograd, ku edhe doktoroi për letërsinë shqipe. Për dekada ishte pjesë e Institutit Albanologjik dhe Universitetit të Prishtinës.
Autor i mbi 30 veprave, ai trajtoi historinë e letërsisë, kulturën dhe çështjet kombëtare, duke mbetur një nga zërat më ndikues dhe njëkohësisht më të debatueshëm në hapësirën shqiptare.
