Turistja sllovake humbi jetën në plazhin e Golemit, rasti i dytë për këtë sezon veror
Një turiste nga Sllovakia ka humbur jetën në plazhin e Golemit, duke shënuar rastin e dytë të ngjarjeve aksidentale të cilat përfundojnë me viktima në Durrës, ndërsa siguria në plazhe ka ende problematika.
Ambulancë gjatë një shërbimi urgjence në Durrës. Foto: Media Amfora
Një 79 vjeçare nga Sllovakia që kishte ardhur me pushime në vendin tonë ka humbur jetën. Policia Vendore e Durrësit tha se guaja është mbytur aksidentalish duke u larë në det.
“Rreth orës 19:30, te Shkëmbi i Kavajës, duke u larë në det, është mbytur aksidentalisht shtetasja M. R., 79 vjeçe, banuese në Sllovaki”, tha Policia e Durrësit në një njoftim për shtyp të shpërndarë të martën.
Sipas informacionit grupi hetimor po kryen hetimet për sqarimin edhe dokumentimin e plotë të rrethanave të ngjarjes dhe shkakut të mbytjes.
Ky është rasti i dytë i ngjarjeve aksidentale brenda muajit qershor që u marrin jetën pushuesve në plazhet e Durrësit. Në datën 12 një burrë 73 vjeçar nga Kavaja humbi jetën në plazhin e Qerretit pasi pësoi arrest kardiak në momentetin kur u fut në det për tu larë.
Këto ngjarje nxjerrin në pah problematikën me sigurinë në plazhe, ku rojet bregdetare dhe shërbimi që ofrohet në kullat e vrojtimit apo masa të tjera të nevojshme ende nuk plotësojnë kushtet në shumë hapësira private e publike.
