Zjarre të reja janë shfaqur në disa zona të vendit, ndërsa vatra të tjera janë riaktivizuar pas ndërhyrjeve të ditëve të fundit. Situata vijon të kërkojë ndërhyrje në Pukë, Dibër, Mirditë dhe në Malin e Dajtit, ndërsa strukturat e emergjencave po mbajnë nën monitorim edhe zona ku zjarret janë izoluar.
Banorët në zonën Gojan-Gjegjan në Pukë u evakuuan, ndërsa era e fortë dhe terreni i thyer po vështirësojnë ndërhyrjen për shuarjen e zjarreve. Organizata për mbrojtjen e mjedisit, PPNEA, paralajmëroi për rrezikun ndaj familjeve, si edhe për dëmtimin e pyjeve dhe habitateve. Situata mbetet e vështirë edhe në Dukat të Vlorës.
Gjatë 24 orëve të fundit janë raportuar 35 vatra zjarri në vend, nga të cilat pesë mbeten aktive dhe tre janë nën kontroll. Situata mbetet dinamike në Gojan të Vogël, Gojan të Madh dhe Gjegjan, për shkak të erës së fortë, ndërsa ndërhyrja po mbështetet edhe nga ajri me dy helikopterë.
Policia e Shtetit do të ketë një strukturë të specializuar për krimet mjedisore, ndërsa ministri i Punëve të Brendshme, Besfort Lamallari, e cilësoi të pallogaritshëm dëmin e shkaktuar nga zjarret e këtij viti në fondin pyjor. Agjencia Kombëtare e Mbrojtjes Civile raportoi të hënën 33 vatra zjarri në 24 orët e fundit, nga të cilat 8 mbeten aktive dhe 5 në monitorim.
Nëntë nga 25 vatrat e zjarrit të raportuara gjatë 24 orëve të fundit mbeten aktive në vend, ndërsa situata më problematike paraqitet në Lurë, ku flakët janë afruar pranë disa banesave. Rreth 220 forca dhe efektivë janë angazhuar në operacion, ndërsa ndërhyrjet po vijojnë edhe nga ajri.
Situata nga zjarret mbetet problematike në disa zona të vendit, ndërsa autoritetet vijojnë operacionet nga toka dhe ajri për vënien e flakëve nën kontroll. Në Finiq dhe Delvinë zjarri rrezikoi zonat e banuara, ndërsa vatra të tjera janë regjistruar edhe në Mallakastër.
