“1 Shkollë, 1 Artikull”: Fushata që çon nxënësit drejt dijes së lirë

Fushata e organizuar nga Wikimedianët e Gjuhës Shqipe, që zhvillohet nga 5 shkurti deri më 20 mars në shkollat 9-vjeçare dhe të mesme në Shqipëri e Kosovë, fton komunitetin shkollor të krijojë ose përmirësojë artikuj për institucionet e tyre në Wikipedia për të rritur cilësinë e informacionit dhe kulturën e burimeve të besueshme.

“Ftojmë drejtorët, mësuesit dhe nxënësit që të bëhen pjesë e enciklopedisë së lirë, duke përmirësuar artikujt për shkollat e tyre dhe duke promovuar përdorimin e burimeve të besueshme”, thuhet në njoftimin e organizatorëve, të shpërndarë për mediat të shtunën.

Fushata synon të përfshijë shkollat në krijimin ose përmirësimin e artikujve me burime të verifikueshme, duke i nxitur nxënësit të zhvillojnë aftësi kërkimore dhe digjitale përmes kontributit në Wikipedia.

“Në Wikipedia mund të shkruhet për një shkollë vetëm kur informacioni mbështetet në burime të besueshme dhe të pavarura, që e trajtojnë atë në mënyrë domethënëse”, sqaroi njoftimi.

Fushata ndërmerret nga Wikimedianët e Gjuhës Shqipe, një komunitet vullnetarësh që punon për zhvillimin dhe përmirësimin e përmbajtjes në gjuhën shqipe në projektet e Wikipedia-s dhe platformat e tjera të dijes së lirë, duke nxitur përfshirjen e shkollave në krijimin e artikujve me burime të besueshme.

Sipas organizatorëve, iniciativa synon të promovojë përdorimin e burimeve të besueshme dhe shkrimin enciklopedik me fakte të verifikuara, duke ndihmuar njëkohësisht në zhvillimin e aftësive kërkimore, teknike dhe të buta të nxënësve.

Fushata është e hapur për shkollat 9-vjeçare dhe të mesme, ndërsa organizatorët rekomandojnë krijimin e ekipeve me rreth pesë nxënës të udhëhequr nga një mësues ose pjesëtar i stafit, që do të punojnë për përgatitjen e artikullit për shkollën e tyre; në përfundim të saj, kontribuuesit do të pajisen me certifikata dhe dhurata simbolike, ndërsa regjistrimi bëhet përmes formularit online dhe informacionet e plota janë të publikuara në faqen përkatëse të fushatës në Wikipedia.

Nisma vjen në një kohë kur të rinjtë përdorin internetin kryesisht si konsumues informacioni, pa zhvilluar aftësi për të verifikuar burimet apo për të krijuar përmbajtje cilësore në gjuhën shqipe. Përmes kësaj fushate, organizatorët synojnë t’i kthejnë nxënësit nga përdorues pasivë në kontribuues aktivë të dijes së lirë, duke rritur njëkohësisht cilësinë e informacionit për shkollat në Wikipedia.