Sulmet ndaj gazetarëve që mbulojnë SPAK-un alarmojnë organizatat e medias
Sulmet në internet ndaj gazetarëve Anila Hoxha dhe Klodiana Lala, për shkak të raportimeve të tyre mbi SPAK-un, korrupsionin dhe krimin e organizuar, kanë nxitur reagim rajonal nga organizatat për mbrojtjen e gazetarëve. “SafeJournalists” paralajmëroi se fushatat diskredituese dhe sulmet me bazë gjinore mund të ndikojnë në lirinë e raportimit për çështje të sundimit të ligjit.
Gazetarët e televizioneve gjatë një konference për shtyp. Foto ilustruese Amfora.al
Rrjeti rajonal “SafeJournalists” publikoi të enjten një deklaratë ku dënoi fushatën e vazhdueshme të sulmeve dhe ngacmimeve në internet ndaj gazetareve Anila Hoxha dhe Klodiana Lala, të njohura për raportimet mbi hetimet e Struktura e Posaçme Kundër Korrupsionit dhe Krimit të Organizuar, korrupsionin në nivele të larta dhe krimin e organizuar në Shqipëri.
“Sulmet me përmbajtje degraduese dhe me bazë gjinore tejkalojnë kufijtë e kritikës legjitime dhe rrezikojnë të krijojnë një efekt frikësues ndaj gazetarisë investigative dhe raportimit mbi çështje të sundimit të ligjit”, thuhet në reagimin e rrjetit.
Në deklaratë theksohet gjithashtu solidariteti me gazetaret dhe me gazetarët që raportojnë në interes publik, duke vlerësuar rolin e gazetarisë investigative në mbajtjen e institucioneve përgjegjëse përpara publikut.
SafeJournalists është një rrjet rajonal organizatash dhe shoqatash profesionale të gazetarëve në Ballkanin Perëndimor që monitoron rastet e kërcënimeve, presionit dhe sulmeve ndaj mediave dhe reagon publikisht kur cenohen standardet e sigurisë së gazetarëve.
Në këtë kontekst, organizata u bëri thirrje aktorëve publikë dhe institucioneve që të shmangin gjuhën që mund të nxisë sulme ndaj gazetarëve.
“Figurat publike, profesionistët e medias dhe institucionet përkatëse duhet të distancohen nga retorika që nxit sulme apo linçim dhe të kontribuojnë në krijimin e një mjedisi të sigurt dhe mundësues për gazetari të pavarur”, theksoi më tej deklarata.
Për shkak të raportimeve të tyre mbi çështje që lidhen me hetimet e Struktura e Posaçme Kundër Korrupsionit dhe Krimit të Organizuar, gazetaret u bënë objekt i një serie sulmesh dhe komentesh denigruese në rrjetet sociale dhe në hapësirën në internet, përfshirë gjuhë fyese dhe sulme personale. Sipas reagimit të SafeJournalists një pjesë e këtyre sulmeve përmbanin edhe elemente me bazë gjinore.
