Ndërron jetë ikona e kinematografisë dhe teatrit shqiptar, Margarita Xhepa 

E cilësuar si një nga ikonat e teatrit dhe të filmit shqiptar, Margarita Xhepa mbylli sytë më 3 prill të këtij viti, ndërsa 2 prilli shënon ditëlindjen e saj që këtë herë ishte e fundit, duke mbushur plot 91 vjeçe.

“Vlerat kombëtare janë të përjeteshme. Udhëtim të mbarë në parajsë…”, shkroi artisti Devis Xherahu, në faqen e Facebook të Ndriçim Xhepa, djalit të artistes së shquar.

E vlerësuar edhe me titullin “Nderi i Kombit”, ajo numëron 182 role, mes të cilave 32 në kinematografi dhe 150 në skenën e teatrit. Artistja vijonte të ishte e angazhuar në skenën publike, duke mbështetur aktivitetet sociale dhe shfaqjet që syonin fuqizimin e grave dhe të vajzave.

Më 12 qershor të vitit 2022 Margarita Xhepa interpretoi për herë të fundit për publikun e Durrësit në shfaqjen teatrale “Këpucët e kuqe”, në Universitetin “Aleksandër Moisiu” Durrës, duke emocionuar pjesëmarrësit përmes përcjelljes së mesazheve kundër dhunës me bazë gjinore. 

Ministria e Ekonomisë, Kulturës dhe Inovacionit njoftoi se homazhet në nder të ikonës së kinematografisë dhe teatrit shqiptar do të mbahen nesër, në orën 10:00-13:00, në hollin e Teatrit Kombëtar të Operas dhe Baletit.

Margarita Xhepa, jeta artistike e një ikone 

Në vitin 1950 ajo u aktivizua si artiste probiste në Teatrin Popullor (sot Teatri Kombëtar) dhe njëkohësisht studioi në Liceun Artistik, dega e Dramës.

Ka luajtur mbi 150 role në teatër, midis të cilëve mund të përmendim: Majlindën tek filmi “Majlinda” (Xh. Broja), Dafina tek Lumi i vdekur (dramatizim nga K. Velça i romanit me të njëjtin titull të Jakov Xoxës), Filja tek Cuca e maleve (Loni Papa), Zonja Mëmë tek Kush e solli Doruntinën (dramatizim nga Edmond Budina e Pirro Mani i romanit me të njëjtin titull të Ismail Kadaresë), Nëna tek Përballë vetes (Ruzhdi Pulaha) dhe të tjera role.

Ka qenë njësoj e suksesshme në rolet e dramaturgjisë botërore, si Ofelia tek Hamleti, vajza e dytë tek Mbreti Lir, dado tek Romeo e Xhulieta, Mbretëresha Margaret tek Rikardi III, të Shekspirit.

Në rolet e tjera nga dramaturgjia botërore spikasin Klea tek Dhelpra dhe rrushtë (Figereido), Lena tek Xhaxha Vanja (Çehov), Ledi Milford tek Luiza Miler (Shiler), Zonja Berling tek Vizita e inspektorit (Pristli), Zonja Lomen tek Vdekja e një komisioneri (A. Miller) dhe të tjera role në shfaqjet artistike brenda dhe jashtë vendit.

Veç roleve në teatër, ajo ka realizuar edhe 32 role në kinematografi, duke punuar me shumicën e regjisorëve shqiptarë. Nga “Vitet e para” dhe “Gjurmët”, tek “Dimri i fundit”, e “Tokë e përgjakur”, ajo ka qenë e pranishme në filmin shqiptar.

Në vitin 1997, interpretoi në filmin grek “Mirupafshim”, i cili u vlerësua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa me Çmimin e Nderit. Në maj të vitit 2004, ajo u rikthye në skenën e Teatrit Kombëtar për të shkëlqyer në dramën “Streha e të harruarve”, një tjetër sukses në karrierën e saj 50-vjecare.