Kompani që kanë fituar tendera pa plotësuar kriteret, pagesa për punime të pakryera dhe ndërtime pa leje që nuk janë referuar në prokurori janë disa nga gjetjet e auditimit të Bashkisë Durrës. KLSH ka konstatuar mbi 30 milionë lekë dëm ekonomik dhe i ka kërkuar bashkisë të marrë masa për rikuperimin e parave dhe nxjerrjen e përgjegjësive.
Dy vjet pas kthimit në Durrës të 102 kontejnerëve me mbetje të rrezikshme, të nisur drejt Tajlandës, kompania “Kurum International” ka humbur lejen mjedisore për veprimtarinë e saj në Elbasan. Mbetjet, të prodhuara nga aktiviteti industrial i kësaj kompanie, vijojnë të qëndrojnë të depozituara në Shënavlash, pa një zgjidhje për trajtimin e tyre.
Bashkia Durrës ka nisur rikonstruksionin e Mauzoleumit të Dëshmorëve, me një investim prej rreth 35 milionë lekësh. Dokumentet zyrtare tregojnë se Mauzoleumi është propozuar për mbrojtje si Monument Kulture i Kategorisë I, ndërkohë që në zonë vijon të jetë i planifikuar ndërtimi i një parkimi nëntokësor, aty ku janë zbuluar gjurmë të qytetit antik.
Miratimi i kompleksit “Pine Residences” në Kodër Vilë të Durrësit rrezikon trashëgiminë arkeologjike të zonës, ku më herët janë zbuluar varre romake dhe ndodhen monumente historike. Ndërtimi ngre shqetësime edhe për humbjen e gjelbërimit në një nga kodrat e pakta të mbetura me pisha në brendësi të qytetit dhe atij që dikur njihej si “Parku Rinia”.
Mungesa e ndriçimit publik vijon të vështirësojë lëvizjen e këmbësorëve në disa lagje të qytetit, ndërsa problematika ka nxitur reagime edhe në rrjetet sociale. Shqetësimet shtrihen edhe te investimet e bashkisë dhe mungesa e ndriçimit në rrugë ku janë kryer ose po kryhen punime.
Muzeu Arkeologjik i Durrësit u rikonstruktua me miliona euro, por emërtimet problematike të vendosura gjatë punimeve vazhdojnë të qëndrojnë në vitrina. Busti i Kleitias ende prezantohet si “Aristomena”, ndërsa objekte të tjera, me histori mijëravjeçare, shoqërohen me përshkrime që tregojnë pak për rëndësinë e tyre.
Mungesa e Xhamisë së Madhe në një reklamë që paraqet sheshin “Iliria” në Durrës ka nxitur debat në rrjetet sociale. Rasti ka ngritur shqetësime për mënyrën se si paraqiten objektet fetare dhe trashëgimia kulturore në materialet e krijuara me inteligjencë artificiale.
Galeria e Artit Pamor “Nikolet Vasia”, Muzeu Arkeologjik dhe disa prej monumenteve të kulturës në Durrës vijojnë të presin ekspozitat e Bienales Ndërkombëtare të Artit Bashkëkohor. Përmes pikturave, instalacioneve dhe veprave të realizuara me materiale të ndryshme, artistë nga disa vende të botës prezantojnë krijimet e tyre për publikun deri më 31 tetor.
Pamjet e zjarrit në Gjykatën e Lartë u përhapën në rrjetet sociale me pretendime se institucioni ishte shkatërruar tërësisht ose ishte sulmuar për vendime në favor të Jared Kushnerit. Publikime të tjera vunë në shënjestër SPAK-un dhe pavarësinë e drejtësisë.
Gjykata e Durrësit ka vlerësuar të paligjshëm arrestimin e një të mituri gjatë ditës së parë të protestave, duke vendosur ndaj tij masën e detyrimit për t’u paraqitur. Ndërkohë, këtë të diel, 22 protestues të arrestuar dalin para gjykatës, ndërsa për shtatë prej tyre Prokuroria ka kërkuar masën “arrest në burg”.
