Prokuroria e Posaçme kërkoi kalimin për gjykim të ish-kryebashkiakut të Divjakës, Fredi Kokoneshi, dhe tre ish-zyrtarëve të bashkisë, të akuzuar për shpërdorim detyre në procedurat e dhënies me qira të tokave bujqësore për ndërtimin e impianteve fotovoltaike.
Prokuroria e Durrësit kërkoi masa sigurimi për 12 persona, mes tyre punonjës të Agjencisë Shtetërore të Kadastrës (ASHK), të dyshuar për falsifikimin e dokumenteve të pronësisë dhe tjetërsimin e tokave në zonën bregdetare të qytetit. Sipas hetimit, skema çoi në regjistrimin e paligjshëm të pronave shtetërore dhe sekuestrimin e rreth 53 mijë metrave katrorë tokë.
Projekti për ndërtimin e një resorti në Plazhin e Pasqyrave ka krijuar pasiguri për dhjetëra familje që prej vitesh kanë legalizuar banesat dhe bizneset e tyre. Banorët e fshatit Manastir pranë Ksamilit, pretendojnë se një “hartë e kuqe” e cila qarkullon në mënyrë informale, ka bllokuar legalizimet dhe investimet, ndërsa projekti turistik parashikon ndërhyrje që do të rrafshonin një pjesë të konsiderueshme të fshatit.
