Një bretkosë politike në Kënetën e Durrësit të Vjetër

Duke rrëshqitur si gjithnjë në murin e rrjeteve të mia sociale, më dolën me përdhunë video-replikat e shëmtuara që znj. Sako kishte bërë fillimisht me z. Berisha dhe më pas me z. Bylykbashi. E rehatuar në karrigen e pushtetit, me gushën në plan të parë, me gjestet dhe fjalorin e një laci spitalle, qurret që detyrohej t’i tërhiqte herë pas here dhe mprehtësinë intelektuale të një fëmije të shkollës fillore, znj. Sako me një vetëbesim kozmik të bazuar kushedi se ku, tentonte t’i jepte përgjigje B&B-së me përgjigje pa përgjigje.

E dëgjoja dhe nuk dija nëse duhej t’i qaja hallin atyre 48.512 qytetarëve që e kanë votuar për kryetare Bashkie apo atyre 110.000 të tjerëve që s’duan ta shohin me sy, por janë të detyruar ta kenë në krye. Mendoja se jemi fatkeq, por edhe pak derdimen si popull. Fatkeq sepse na ka qëlluar një opozitë që për inat të Iglit shkon edhe me Gjushin – dhe derdimen sepse nuk pushojmë së ngrëni rrenat vit pas viti, me krenarinë tipike pellazgjike. 

Por le t’i rikthehemi video-replikave tona. Sako akuzonte Berishën se e kishte lënë Durrësin e Ri kënetë. Në fakt Sako harron se në 35 vite tranzicion Sali Berisha ka pasur efektivisht pushtetin në atë zonë vetëm 5 vjet, mes viteve 1992-1997. Nëse padrejtësisht numërojmë këtu edhe pushtetin qëndror, të mes viteve 2005-2013, atëherë maksimumi shkojmë në 13 vite. Përkundrejt kësaj, Partia Socialiste ka pasur pushtet mbi atë territor nga viti 2000 deri aktualisht që flasim, pra për plot 25 vite, nga të cilat 17 në mënyrë absolute, pasi zotëronte edhe pushtetin lokal dhe atë qëndror. Edhe znj. Sako nuk është më e re, numëron mbi 15 vite në detyra drejtuese në bashki.

Është pra e pakrahasueshme ajo që mund të bënte Partia Socialiste në zonën e Durrësit të Ri dhe herën e fundit që kam kaluar aty para se të nisesha përfundimisht për në emigrim, nuk kujtoj asnjë kullë “Eiffel” apo “Coloseum” të ndërtuar. Kujtoj një erë të rëndë që vinte nga kanalet, kujtoj rrugët e paasfaltuara, kujtoj pluhurin e ngritur, derrat që zhgërryeshin nëpër plehra, shtëpitë pa ujë. Kujtoj një zonë me vetëm një shkollë dhe një qendër shëndetësore edhe pse kishte (asokohe!) më shumë se 50.000 banorë. 

Pra imagjinoni pak, në 25 vjet pushtet – nga të cilat 17 absolut, bilanci që mund të rreshtojë kryetarja e bashkisë për zonën e Durrësit të Ri është se ka ndërtuar pas tërmetit 1761 shtëpi në të gjithë Durrësin. Bravo! Po meqenëse (pa asnjë lidhje) dole tek i gjithë Durrësi (!!!) me Velierën e KazamontGjushit, e cila na mori 10 milion euro, ça u bë? Se idhulli jot Ed’ Rama na premtoi që do të përfundonte në qershor të vitit 2024! Po me atë ujin 24 orë në ditë ça u bë? Po me 84 milion eurot e investuara për ndërtimin e rrjetit të ri të ujësjellësit ça u bë? Po me Kodrën e Currilave që rrëshqet sa herë frynë erë ça u bë? Po me godinën e Hekurudhës ça do bëhet? Këtu në Bruksel vijnë lajme se do bëhet pulari!

Ja pra znj. Sako që nuk është mirë që ju që pas 25 vitesh në pushtet, nga të cilat 17 absolut në atë qytet, të rendisni bilance sepse gjilpëra e peshores do anojë thellë nga gjërat që ju ose nuk i keni bërë ose i keni bërë gabim. Saliu i ka bërë Gërdecin dhe 1001 të liga atij vendi, por në garën e ligësisë në të cilën jeni futur, ju nuk qëndroni larg tij. Ai ka vrarë njerëz, ju keni vrarë të shkuarën dhe të ardhmen e atij qyteti. Ai ka persekutuar njerëz ndërsa ju modelet e mira. Ai ngriti dhunën në podium, ju i dhatë asaj pushtet. Ai normalizoi korrupsionin, ju e idealizuat. Ai ishte diktator, ju tiranë delirant. Ai përdori bandat, ju përdoreni nga bandat. Ai vidhte pronën publike, ju atë publike dhe atë private.

Evitoini pra video-replikat me alteregon tuaj. Ndoshta ato mobilizojnë mendjet e vogla, por të jeni e sigurt që pështirosin masivisht njerëzit me mendjen në kokë dhe sytë në ballë. Ju nuk keni pse të bëni bretkosën politike të Edi Ramës dhe Vangjush Dakos në Kënetën e Durrësit të vjetër. Ju mund të jeni zefiri i Durrësit të Ri.