35 vatra zjarri në 24 orë, situata mbetet e vështirë në territorin e Pukës

Situata e zjarreve vijon të mbajë të angazhuara qindra forca në disa zona të vendit, ndërsa në territorin e Pukës operacionet përqendrohen në Malin e Tërbunit, Gojan dhe Gjegjan.

Në Gojan të Vogël, Gojan të Madh dhe Gjegjan, sipas informacionit institucional, situata mbetet dinamike për shkak të erës së fortë. Deri tani nuk raportohet avancim i zjarrit drejt banesave, ndërsa forcat në terren po mbështeten nga ajri me dy helikopterë.

Në Malin e Tërbunit situata raportohet nën kontroll, por puna vijon nga forcat tokësore.

Në operacionet në territorin e Pukës janë angazhuar tre mjete dhe 15 efektivë të MZSH Pukë, një mjet dhe shtatë efektivë nga Fushë-Arrëzi, një mjet dhe tre efektivë nga Bashkia Shkodër, 50 forca bashkiake, 40 efektivë të Forcave të Armatosura, efektivë të Policisë së Shtetit dhe 50 vullnetarë.

Në rang vendi, Agjencia Kombëtare e Mbrojtjes Civile raportoi 35 vatra gjatë 24 orëve të fundit, prej të cilave pesë aktive dhe tre nën kontroll.

Në terren janë angazhuar 382 forca operacionale dhe 40 automjete zjarrfikëse, ndërsa Forcat e Armatosura po mbështesin operacionet me 90 efektivë dhe tre helikopterë.

Operacionet vijojnë në Dajt, Lufaj, Tërbun-Gjegjan-Gojan, Gjorm të Sipërm dhe Tunjë të Re. Sipas AKMC-së, në zonat e prekura nuk raportohet rrezik për banesat, ndërsa Gurë-Lura mbetet nën kontroll.

Krahas operacioneve për shuarjen e vatrave, ka nisur edhe evidentimi i dëmeve që zjarret kanë shkaktuar në territor.

Autoriteti Shtetëror për Informacionin Gjeohapësinor bëri të ditur se ekspertët e tij, përmes analizimit në distancë të imazheve satelitore (“Remote Sensing”), kanë realizuar harta tematike dhe analiza gjeohapësinore për disa prej zonave të prekura nga zjarret, në mbështetje të AKMC.

Analizat janë kryer për Krujën, Halilin në Krujë, Malin e Dardhës në Librazhd, Ribën në Mallakastër, Lurën në Dibër dhe Kavajën.

“Nëpërmjet krahasimit të imazheve satelitore dhe të dhënave të mbulesës së tokës para dhe pas zjarrit, janë evidentuar sipërfaqet e dëmtuara dhe kategoritë kryesore të prekura nga zjarri”, njoftoi ASIG.

Për secilën zonë janë përgatitur harta tematike, statistika të sipërfaqeve të prekura dhe analiza krahasuese para dhe pas zjarrit. Sipas ASIG-ut, të dhënat synojnë monitorimin dhe vlerësimin e dëmeve në territor dhe mbështetjen e vendimmarrjes institucionale në situata emergjente.

Në informacionin e publikuar nga ASIG nuk jepet një shifër e përgjithshme për sipërfaqen e dëmtuar nga zjarret në të gjithë vendin. Analizat e bëra publike përfshijnë zona të caktuara dhe nuk përbëjnë një bilanc kombëtar të sipërfaqeve të prekura.

Ndërkohë, situata në Gojan të Vogël, Gojan të Madh dhe Gjegjan mbetet dinamike për shkak të erës së fortë. Operacionet vijojnë nga toka dhe ajri, ndërsa deri tani institucionet nuk raportojnë avancim të zjarrit drejt banesave.