Aktivistët në Tiranë nuk kanë marrë një zgjidhje konkrete për kërkesën e tyre për shtimin e koshave në zonat ku zhvillohen protestat, ndërsa mbetjet vijojnë të grumbullohen rreth pikave ekzistuese. Ndryshimet në tarifën e pastrimit për familjet në kryeqytet dhe problematikat me menaxhimin e mbetjeve në qytete të tjera tregojnë sfidat e vazhdueshme të këtij shërbimi.
Ndërsa në Durrës kanë nisur gjobat për depozitimin e parregullt të mbetjeve, në disa zona të qytetit kontejnerët vijojnë të jenë të tejmbushur dhe mbetjet përfundojnë në rrugë. Për menaxhimin e mbetjeve bashkia ka në buxhet mbi 950 milionë lekë për vitin 2026, ndërsa problematika nxiti së fundmi edhe protestën e banorëve të Spitallës për grumbullimin e tyre pranë banesave.
Banorët e Spitallës protestuan të enjten dhe denoncuan se prej vitesh jetojnë mes erës së rëndë dhe mbetjeve të grumbulluara pranë banesave të tyre, në ish-Parkun e Autobusëve. Hapësira është kthyer në një “vendgrumbullim” provizor, megjithëse Bashkia Durrës ka në buxhet mbi 950 milionë lekë për menaxhimin e mbetjeve dhe sipas parashikimeve, duhej të kishte ndërtuar një stacion transferimi.
