Rasti lidhet me 102 kontejnerë me mbetje industriale të rrezikshme, të cilat u nisën për eksport dhe u ndaluan pasi u kthyen në Shqipëri, duke u vendosur më pas nën sekuestro.

Gjatë ditës së martë janë kryer veprime procedurale në kuadër të këtij hetimi, përfshirë ekzekutimin e masave të sigurisë dhe veprime të tjera hetimore të lidhura me rastin.

Masat e sigurisë u ekzekutuan ndaj zyrtarëve dhe përfaqësuesve të subjekteve private të përfshira në prodhimin, certifikimin dhe eksportimin e mbetjeve, në kuadër të hetimit të ndjekur nga Prokuroria e Durrësit.

Masat e sigurisë janë firmosur ndaj personave të dyshuar për përfshirje në këtë çështje, mes tyre administratori dhe drejtues drejtorish të “Kurum International”, pronarja dhe drejtues të kompanisë “Sokolaj”, punonjës të Doganës së Durrësit, si dhe zyrtarë të sektorit të monitorimit të lejeve mjedisore dhe të Drejtorisë së Inspektimit në Agjencinë Kombëtare të Mjedisit. Në listën e të dyshuarve përfshihen gjithashtu ish-drejtoresha e AKM-së, Arta Dollani, si dhe drejtoresha aktuale e kësaj agjencie, Marjeta Përlala.

Nga totali i masave të vendosura, 26 janë “arrest me burg”, ndërsa shtatë janë “arrest shtëpie”.

Çështja lidhet me një ngarkesë prej 102 kontejnerësh me mbetje industriale që u nisën nga porti i Durrësit në vitin 2024 për eksport drejt Tajlandës. Pas ndalimit në destinacion, ngarkesa u kthye sërish në Durrës, ku u vendos nën sekuestro për shkak të dyshimeve se mbetjet ishin të klasifikuara si të rrezikshme.

Në mars të vitit 2025, “Basel Action Network”, organizatë mjedisore ndërkombëtare me bazë në Seattle të SHBA-së, e fokusuar në parandalimin e tregtisë ndërkombëtare të mbetjeve të rrezikshme, dorëzoi pranë autoriteteve shqiptare një dëshmi mbi dyshimet për përmbajtjen e kontejnerëve dhe procedurat e ndjekura për eksportimin e tyre.

Pas kthimit në Shqipëri, kontejnerët me mbetje u zhvendosën dhe u depozituan në zonën e Porto Romanos, një proces që u shoqërua edhe me protesta nga banorët e zonës për shkak të shqetësimeve mjedisore dhe shëndetësore.

Më 9 tetor 2025 nisi marrja e mostrave nga 102 kontejnerët e vendosur në zonën industriale të Porto Romanos, të cilat u dërguan për analiza në Itali për të përcaktuar përbërjen e mbetjeve.

Nisja e marrjes së mostrave dhe dërgimi i tyre për analiza jashtë vendit shënoi një fazë kyçe të hetimit, duke u dhënë autoriteteve bazën teknike për të përcaktuar natyrën e mbetjeve dhe vijimin e procedurave penale.

Hetimi ka zbuluar se mbetjet e rrezikshme janë nxjerrë jashtë vendit përmes falsifikimit të klasifikimit të tyre, duke u paraqitur në dokumentacion herë si oksid hekuri dhe herë si oksid zinku, pa kodet përkatëse të mbetjeve.

Në këtë skemë përfshihet bashkëpunimi mes “Kurum International” dhe kompanisë “Sokolaj”, e cila kishte marrë përsipër blerjen dhe eksportimin e mbetjeve drejt Tajlandës, pavarësisht mungesës së autorizimit mjedisor.

Sipas hetimit, mbetjet janë tregtuar më pas përmes kompanisë “GS Minerals d.o.o.”, e përdorur për të ndërmjetësuar shitjen dhe për të fshehur origjinën e tyre.

Hetimi vijon, ndërsa autoritetet po verifikojnë të gjithë zinxhirin e prodhimit, menaxhimit dhe eksportimit të mbetjeve të përfshira në këtë çështje.

Masat e sigurisë u ekzekutuan për ish-drejtoreshën e Përgjithshme të Agjencisë Kombëtare të Mjedisit (AKM), asaj aktuale, si edhe punonjës AKM-së, të Degës së Doganës Durrës, të Autoritetit Portual Durrës drejtuesit dhe punonjësit e kompanive “Kurum International”, “D.o.o Minerals”, “Sokolaj”, “Joti Spedition”, “Alliance Resource”, “Bajrami N” dhe të “EMS APO”, të renditur si më poshtë:

The post 33 masa sigurie në Durrës për kontrabandën e mbetjeve të rrezikshme first appeared on Amfora.

Pas pezullimit të zgjerimit të BE-së në vitin 2014, u krijua Procesi i Berlinit, si urë lidhëse midis unionit dhe vendeve të Ballkanit Perëndimor, duke përfshirë Shqipërinë, Kosovën, Maqedoninë e Veriut, Malin e Zi, Serbinë dhe Bosnje-Hercegovinën.

Për këto vende, studimi ka vlerësuar progresin drejt BE-së në raport me 8 fusha, si: Ekonomia, zhvillimi social, shëndetësia, arsimi, mjedisi, qeverisja, digjitalizimi e infrastruktura. Të dhënat e këtij studimi u paraqitën në forumin ‘Ignita’, të mbajtur në Prizren të Kosovës tetorin e këtij viti.

Studimi gjithashtu u kujdes të jepte rekomandime në raport me fokusin e ardhshëm të vendeve të Ballkanit Perëndimor si kusht për anëtarësim në BE. Instituti i Vjenës thekson se mjedisi, arsimi e infrastruktura duhet të jenë fokusi kryesor i politikëbërësve në të gjashta vendet. Nga ana tjetër, studimi thekson se i vetmi aspekt ku të gjitha vendet kanë përparim të dukshëm e afërsi me standardet e BE-së, është digjitalizimi. Në këtë kategori, studimi e vlerëson Shqipërinë me vetëm 9 vite diferencë nga vendet e Bashkimit Evropian.

Sipas ekonomistit të Institutit të Vjenës, Branimir Jovanoviç, “‘Converge2eu’ synon të riformulojë konceptin e përputhshmërisë me standardet e BE-së, duke u fokusuar te mënyra se si njerëzit në rajon jetojnë realisht, si krahasohet kjo me Bashkimin Evropian dhe nëse këto kushte po përmirësohen apo jo” – duke nënvizuar edhe njëherë thellësinë e rëndësinë e këtij studimi.

Renditja e 6 vendeve të Ballkanit Perëndimor

Në aspektin ekonomik, Shqipëria renditet e dyta për nga afërsia me standardet e BE-së. Serbia renditet e para me 35 vite larg BE-së, Shqipëria e dyta me 53 vite, të ndjekura nga Maqedonia e Veriut 59 vite, e Mali i Zi me 72 vite. Studimi vlerëson më tej se Kosova dhe Bosnje-Hercegovina janë të dyja mbi 100 vite larg standardit ekonomik të BE-së.

Por e kundërta vlerësohet në aspektin social, ku Kosova renditet e para. Sipas studimit sistemi i mbështetjes sociale të Kosovës është 19 vite larg atij të Bashkimit Evropian, ndërsa e dyta renditet Serbia me 51 vite largësi nga BE-ja. Renditja më pas vijon me Malin e Zi me një diferencë prej 59 vitesh dhe nga Shqipëria, që sipas studimit ka 71 vite diferencë me BE-në kur vjen puna te mbrojtja sociale. Në fund ndodhet Maqedonia e Veriut me mbi 100 vite diferencë nga standardet e BE-së, ndërsa sistemi social boshnjak gjykohet nga Instituti si në largim nga standardet e BE-së.

Kur flitet për shëndetësinë, Instituti gjykon se progresin më të ndjeshëm e ka bërë Maqedonia e Veriut, ku sistemi shëndetësor ka 7 vite diferencë nga ai i BE-së. Mali i Zi renditet i dyti me 17 vite, ndërkaq që Shqipëria renditet e treta me 39 vite diferencë nga standardi shëndetësor i BE-së. Kosova renditet e katërta me 41 vite nga BE. Raporti vë në fund të klasifikimit Bosnje-Hercegovinën me 89 vite diferencë nga BE-ja dhe Serbinë si të fundit, me mbi 100 vite diferencë nga standardet e BE-së për sistemin shëndetësor.

Arsimi, i cili u përmend në raport si pikë e veçantë tek e cila të gjitha vendet duhet të investojnë, renditet si fusha më e dobët e pothuajse të gjitha vendeve. Me përjashtim të Bosnje-Hercegovinës, sistemi arsimor i së cilës ka 18 vite diferencë me standardet e BE-së, vendet e tjera, duke përfshirë dhe Shqipërinë, vlerësohen si në largim nga standardet e BE-së.

E njëjta situatë paraqitet në aspektin e politikave mjedisore, ku të gjitha vendet paraqiten me problematika të thella. Shqipëria sipas studimit është të paktën 100 vite larg BE-së në këtë aspekt, e po ashtu dhe Kosova. Të gjitha vendet e tjera nga ana tjetër vlerësohen si në largim nga standardet e Bashkimit Evropian.

Cilësia e qeverisjes për të gjashta vendet ishte gjithashtu objekt studimi. Kosova vlerësohet si me qeverisje më afër Unionit në raport me vendet e tjera, 26 vite larg standardit të BE-së. Renditja vijon me Maqedoninë e Veriut me cilësi qeverisjeje 40 vite larg BE-së, të ndjekura nga Mali i Zi me një diferencë prej 57 vitesh, e Shqipëria që ndodhet 64 vite larg BE-së në qeverisje. Serbia renditet e parafundit me mbi 100 vite diferencë në qeverisje nga standardi i BE-së, ndërkaq që Bosnje-Hercegovina është i vetmi vend i renditur si në largim nga standardet e BE-së në fushën e qeverisjes.

Raporti i Institutit vëren arritje nga Ballkani Perëndimor në digjitalizim, ku në Serbi është 4 vite larg atij të BE-së, ndërkaq që në Shqipëri diferenca me BE-në është 9 vite. Serbia e Shqipëria ndiqen nga Maqedonia e Veriut me 16 vite larg nga niveli i digjitalizimit të Unionit, e nga Mali i Zi me 63 vite. Bosnje-Hercegovina vlerësohet si në largim nga standardet e BE-së.

Infrastruktura e vendeve të Ballkanit Perëndimor lë për të dëshiruar në raport me standardet e BE-së. Kjo konfirmohet edhe nga studimi që vlerëson se infrastruktura e Shqipërisë, Serbisë, Maqedonisë së Veriut, Malit të Zi e Bosnje-Hercegovinës është mbi 100 vite larg BE-së, me Kosovën që renditet edhe më ulët, me cilësi infrastrukture në largim nga standardet e BE-së.

Renditja e secilit vend

Ekipi i Amforës përpunoi renditjen e përgjithshëm të vendeve në një tabelë të pikëzuar, e cila ka për qëllim të tregojë afërsinë dhe largësinë e vendeve të Ballkanit Perëindor në raport me standardet e BE-së.

Si metodologji është përdorur një rankim sasior e cilësor i të gjitha kategorive. Rankimi cilësor i ponderuar 60% për nga rëndësia, ndërkaq që rankimi sasior 40%. Për rankimin sasior, kategori të ndryshme largësish nga standardi i BE-së pikëzohen si më poshtë: 0–10 vjet → 5 pikë, 11–30 vjet → 4 pikë, 31–60 vjet → 3 pikë, 61–100 vjet → 2 pikë, mbi 100 vjet → 1 pikë, “Diverging” (duke u larguar) → 0 pikë.

Në total, maksimalja që Amfora i jep një shteti të Ballkanit Perëndimor është 40 pikë e minimalja zero. Ndërkaq metoda cilësore vë si më të rëndësishme digjitalizimin, ekonominë, qeverisjen e mjedisin, duke bërë një rankim në bazë të këtyre kritereve. Të dyja metodat e përmbledhura japin grafikën e mëposhtme.

Metodologjia e studimit të Institutit të Vjenës

Për secilën nga 8 fushat e përzgjedhura të studimit – ekonomia, shëndetësia, arsimi, mbrojtja sociale, digjitalizimi, mjedisi, qeverisja e infrastruktura – studiuesit e Institutit të Vjenës kanë përzgjedhur disa kategori që janë përdorur për t’i vlerësuar këto fusha. Për ekonominë, studimi ka përdorur kategori si prodhimi për frymë, të ardhurat mesatare bruto, paga minimale, pensionet mesatare dhe produktiviteti për punëtor.

Për shembull, paga minimale në Shqipëri është 385 euro, e cila sipas studimit është 40 vite larg pagës minimale të BE-së. Në Serbi, paga minimale është 544 euro, të cilën studimi e vlerëson si 25 vite larg pagës minimale të BE-së. Ky krahasim është bërë për të gjashta vendet, në tetë fushat objekt të këtij studimi, duke përdorur nënkategoritë e mësipërme për të nxjerrë konkluzionet.

Në aspektin social, studimi ka përdorur metrika si papunësia, punësimi, varfëria, pabarazia dhe pabarazia gjinore në punësim. Për shëndetësinë, janë përdorur si indikatorë shpenzimi publik për shëndetësinë, jetëgjatësia, vdekshmëria e të vegjëlve, numri i krevateve të spitaleve dhe numri i mjekëve. Niveli i arsimit është vlerësuar në gjashtë vendet duke përdorur fusha studimi si shpenzimet publike për arsimin, pikët në PISA, regjistrimi e diplomimi në dhe nga shkolla e lartë, fuqia punëtore me arsim të lartë dhe norma NEET (individët që nuk janë as në punë, as në shkollë e as nuk po trajnohen).

Cilësia mjedisore në gjashtë vendet bazohet në tregues si vdekja e parakohshme, përqindja e energjisë së rinovueshme në treg, intensiteti energjetik, intensiteti i përdorimit të karbonit dhe ripërdorimi i mbetjeve.

Qeverisja, një aspekt shumë i rëndësishëm për çdo vend, është matur nga studimi duke përdorur metrika si zëri dhe llogaridhënia, stabiliteti politik, efikasiteti qeverisës, cilësia rregullatore, rendi ligjor dhe korrupsioni. Studimi e mat shkallën e digjitalizimit të vendeve nëpërmjet numrit të banesave me akses në internet, përdorimit të shërbimeve online të shtetit, sipërmarrjeve me website, eksporteve të shërbimeve me ICT (Teknologjia e Informimit dhe Komunikimit), vlerave të shtuara e punësimit në ICT. Së fundmi, studimi vlerëson infrastrukturën e të gjashta vendeve duke marrë parasysh tregues si gjatësia e rrugëve, numri i shinave hekurudhore, numri i aeroporteve dhe kapaciteti i elektricitetit të instaluar.

Rankimi i Shqipërisë

Sipas studimit ka një numër të lartë fushash në të cilat Shqipëria po largohet nga standardi i BE-së. Kjo përfshin pensionin mesatar, shpenzimin publik për shëndetësinë, numrin e mjekëve, hapësirën gjinore në punësim, shpenzimin publik për arsimin, pikët mesatare të PISA-s, intensitetin e karbonit, rikuperimin e mbeturinave, zërin e llogaridhënies, stabilitetin politik, cilësinë rregullatore, eksportet në shërbimet ICT dhe numrin e shinave hekurudhore.

Ndërkaq, Shqipëria është mbi 30 vite larg BE-së në fusha si norma e arsimimit të lartë (47 vite larg), vdekjet e parakohshme (60 vite larg), intensiteti energjetik (84 vite larg), kontrolli i korrupsionit (31 vite larg), vlera e shtuar në shërbimet ICT (56 vite larg), punësimi në sektorin ICT (44 vite larg) dhe numri i aeroporteve (33 vite larg). Po ashtu, studimi e rendit Shqipërinë si mbi 100 vite larg BE-së në tregues si numri i individëve që nuk janë në shkollë, punë apo trajnim (norma NEET), si edhe në gjatësinë e rrugëve dhe kapacitetin e instalimeve elektrike.

Studimi gjithashtu nxjerr në pah edhe fusha ku standardi i Shqipërisë është në përputhje me atë të Bashkimit Evropian. Këto kategori përfshijnë fuqinë punëtore me arsimim të përparuar, përqindjen në treg të energjisë së rinovueshme, numrin e familjeve me akses në internet dhe përdorimin e shërbimeve qeveritare digjitale.

Së fundmi, duket se Shqipëria ka bërë progres në një sërë fushash, por ka mangësi të theksuara në arsim, mjedis, infrastrukturë e qeverisje. Reformat e qenësishme institucionale por edhe shoqërore mbeten kyçe për arritjen e standardeve të BE-së edhe në këto fusha.

The post Shqipëria e suksesshme “online”, por mbi 100 vite larg BE-së në mjedis dhe infrastrukturë first appeared on Amfora.

Aktivistë nga Qendra për Ruajtjen dhe Mbrojtjen e Mjedisit Natyror në Shqipëri (PPNEA), dhe Shoqata Ornitologjike e Shqipërisë (AOS), qytetarët të Vlorës akuzuan autoritetet shtetërore dhe gjykatat për zvarritjen e kësaj çështjeje me rëndësi kombëtare. 

“Ka kaluar më shumë se një vit që kur Gjykata e Lartë vendosi që çështja e ndërtimit të aeroportit të kalojë për shqyrtim në Gjykatën e Apelit. Por arsyetimi i këtij vendimi ende nuk është bërë publik, duke bllokuar vazhdimin e proçesit gjyqësor’, thanë aktivistët në protestë. 

Sipas tyre rasti përbën një precedent të rrezikshëm për të drejtat e qytetarëve, ndërsa brenda zonës së mbrojtur punohet. 

“Ky është një precedent i rrezikshëm që mohon të drejtën e qytetarëve për drejtësi dhe për një proces të ndershëm gjyqësor ndërkohë, brenda një zone të bbrojtur derdhet beton çdo ditë”, u shprehën protestuesit. 

Në verën e vitit 2023 Gjykata Administrative e Apelit e ktheu për gjykim çështjen e ndërtimit të Aeroportit të Vlorës, që ishte depozituar nga organizatat mjedisore PPNEA dhe shoqata OAOS kundër parregullsive dhe shkeljeve ligjore në projektin e qeverisë për të ndërtuar Aeroportin e Vlorës. 

Sipas protestuesve gjykata ka shkelur afatet e arsyeshme për të trajtuar këtë çështje jetike për natyrën dhe për të ardhmen e vendit, në mënyrë të qëllimshme. 

“Ndërkohë që autoritetet premtojnë hapjen e aeroportit të Vlorës vitin që vjen, gjykatat vazhdojnë të zvarrisin këtë çështje jashtë afatit të përgjithshëm. Ne kemi të drejtë të besojmë që autoritetet dhe gjykata po e zvarrisin këtë çështje duke e vonuar vendimin dhe zhvillimin e saj”, thanë protestuesit. 

Protestuesit ngritën pikëpyetje se nëse ndodh kështu me një çështje me interes kombëtar, çfarë ndodh me çështje të tjera. 

“Nëse gjykata e lartë sillet kështu me një çështje që ka profil të lartë kombëtar dhe ndërkombëtar, atëherë çfarë ndodh me çështjet e tjera”, pyetën ata.  

Protestuesit u shprehën se ndërsa banorët e zonës së Nartës ku ndërtohet aeroporti presin vendimin e drejtësisë mjedisi po shkatërohet. 

“Sa shpresë ka që qytetarët e lagunave dhe liqeneve tona të marrin një vendim nga drejtësia, pa pasur një aeroport që fluturon mbi to ose pa një gurore që po shkatërron mjedisin”, pyetën ata. 

Protestuesit e cilësuan premtimin për hapjen e aeroportit më datën 8 maj shfaqje elektorale. 

“Nëse ata premtojnë se do ta hapin vitin që vjen, ndërkohë fluturimi i datës 8 është thjesht një shfaqje elektorale, pasi aty nuk ka as energji elektrike” .

The post Mos zbardhja e vendimit për Aeroportin e Vlorës, aktivistët protestojnë para Gjykatës së Lartë  first appeared on Amfora.

Si përgjegjës për lejimin e personave të paautorizuar për shfrytëzimin e gurit dekorativ u gjetën, Fatos Nako, drejtor në Administratën e drejtorisë së Zonave të Mbrojtura (AdZM) Berat, Servet Hoxha dhe Ledjan Hasanaj përgjegjës pranë kësaj drejtorie, të cilët dyshohen për veprën penale “Shpërdorimi i detyrës”, kryer në bashkëpunim.

Për ta gjykata caktoi masën e sigurisë “Arrest në shtëpi”, si përgjegjës për ndërhyrjet e paligjshme në Parkun Kombëtar Mali i Tomorrit. Ndërsa për specialistin policisë së zonës, 58 vjeçarin me iniciale G. Z., që punonte në komisariatin e Skraparit, u caktua masa e “Detyrim paraqitje”. 

Ky rast lidhet me ndalimet në muajin nëntor 2024, ku pas kontrollit në Malin e Tomorrit, policia arrestoi administratorin e një subjekti, vëllain dhe kushëririn e tij, pasi u kapën duke larguar 1 mjet ekskavator me të cilin dyshohet se kishin nxjerrë gurë dekorativë. Gjithashtu u shpallën në kërkim 5 administratorë të tjerë subjektesh dhe u referuan materialet në Prokurori për drejtorin dhe një përgjegjës të AdZM Berat.

The post Nxjerrja e gurëve dekorativë në Tomorr, masa sigurie për zyrtarët e mjedisit dhe të policisë first appeared on Amfora.

Pasditen e 22 prillit dhjetra të rinj pedaluan në kuadër të Ditës së Tokës, e cila shënon përvjetorin e lindjes së lëvizjes moderne mjedisore në vitin 1970.

Në Durrës u bashkuan aktivistë dhe dashamirës të biçikletës që pedaluan në rrugët e qytetit, duke shpërndarë mesazhin për lëvizjen e gjelbër, një rikthim i sensibilizimit ndaj mjedisit, në qytetin që përballet ende me pasojat e tërmetit të nëntorit.

“Të rinjtë duhet të aktivizohen më shumë për komunitetin dhe qytetin e tyre, për punët vullnetare sepse të bën të ndihesh mirë shpirtërisht dhe të japësh nga vetja”, komentoi për Median Amfora, Monika Zyka.

Ajo është pjesë e grupit të të rinjve që iniciuan pedalimin, Klubi i të Rinjve në Angazhimin Komunitar (KRAK), që mblodhi në shesh edhe përfaqësues të nismave të tjera për mbrojten e mjedisit.

“Duhet të promovohet lëvizja me biçikletë sepse është një ndër mjetet më ekologjike të transportit sidomos në kohët që ne po jetojmë”, u shpreh Iden Petraj, “kryebashkiakia e biçikletave në qytetin e Tiranës”.

Pedalimi mblodhi dhjetra të rinj në sheshin qendror të qytetit, të cilët pedaluan më pas përgjatë akseve kryesore, përfshirë Bulevardin Epidamn dhe sheshin përpara Mauzoleumit të Dëshmorëve.

“Është shumë e rëndësishme që të gjithë të rinjtë e Durrësit të aktivizohen dhe të kërkojnë të drejtat e veta që kanë si çiklist”, tha për Median Amfora, Iden Petraj, “Kryebashkiakia e biçikletave në qytetin e Tiranës”.

“Durrësi ka shumë pak korsi biçikletash dhe kjo e vë në rrezik jetën e çiklistit, kështu që është shumë e nevojshme që këto atkivitete të bëhen jo vetëm një herë në muaj, por një herë në javë”, përfundoi Petraj.

Të rinjtë përgjatë 2 orëve shpalosën studime dhe broshura informuese për qytetarët, me qëllim njohjen e ndryshimeve klimatike dhe kontributin e secilit për zbutjen e pasojave.

Aktiviteti u realizua nga Qendra Durrësi Aktiv, Grupimi Informal Bicycle Durrës, Bashkia Durrës, BYCS Durrës (“Kryebashkiaku i Biçikletave në Qytetin e Durrësit”), me mbështetjen e UNDP Albania, në kuadër të programit “Reagimi i Mbrojtjes Sociale ndaj Tërmeteve” (ESPR).

Nisma e Ditës së Tokës ndërmerret çdo 22 prill dhe angazhon rreth 1 miliard njerëz në më shumë se 193 vende. Moto e këtij viti ishte, “Investo në planetin tonë”, me fokus në uljen e emetimeve të gazrave serë deri në mesin e shekullit, për të mbajtur temperaturën globale nën 1.5 °C.

Klubi i të Rinjve në Angazhimin Komunitar (KRAK) gjithashtu synon ndërmarrjen e iniciativave të vogla në komunitetin e tyre për reduktimin e rrezikut nga fatkeqësitë natyrore, menaxhimin e mjedisit dhe rimëkëmbjes në nivel lokal.

Ata kanë në fokus promovimin e vullnetarizmit të të rinjve pas tërmetit dhe adresimin e nevojave të komuniteteve të caktuara dhe ata me vështirësi social-ekonomike.

Ky shkrim synon njohjen me angazhimin e të rinjve dhe reagimin pas fatkeqësive natyrore. Ai u përgatit me mbështetjen e Qendrës Durrësi Aktiv, në kuadër të projektit “Angazhimi i vullnetarëve të rinj në aktivizimin e komunitetit dhe reagimit ndaj fatkeqësive”, si pjesë e programit të “Reagimit të Mbrojtjes Sociale ndaj Tërmeteve” (ESPR), një projekt i zbatuar nga UNDP Albania dhe i financuar nga Qeveria e Mbretërisë së Bashkuar, Qeveria e Finlandës dhe Qeveria e Norvegjisë. Mendimet dhe opinionet e shprehura në artikull i përkasin autorit dhe nuk përkojnë domosdoshmërisht me qëndrimet e donatorit.

Foto në krye: Monika Zyka duke pedaluar me mesazhe sensibilizuese për mbrojtjen e mjedisit. Foto: Geri Emiri/ Media Amfora.

The post Të rinjtë rikthejnë vëmendjen ndaj mjedisit, në Durrësin që përballet me pasojat e tërmetit first appeared on Amfora.

Kjo është seria e parë nga 3 video-dokumentar të shkurtër, me karakter gazetaresk, realizuar në kuadër të projektit “Qytetarët e Durrësit aktorë dhe faktorë në vendimmarrjen lokale”, që po zbatohet nga Qendra Durrësi Aktiv, përmes mbështetjes së “Lëviz Albania”, një projekt i Agjencisë Zvicerane për Zhvillim dhe Bashkëpunim, SDC.

Video-dokumentari i shkurtër sjell rrëfimet e banorëve që prej vitesh përballen me infeksionet dhe aromën mbytëse, teksa mjekët tregojnë pasojat në shëndet dhe specialistët e mjedisit theksojnë ndikimet negative në ekosistem, si edhe nevojën për marrjen e masave në 3 zonat urbane dhe industriale, Shkozet, Ish-Kënetë dhe Porto-Romano.

Producent dokumentari: Geri Emiri

Amfora Production – Pjesë e AMFORA MEDIA GROUP

The post Kanalet e ‘ujërave të zeza’, vatër sëmundjesh dhe ndotës të mjedisit first appeared on Amfora.

Ky është reportazhi i pestë, i realizuar në kuadër të projektit “Durrësi aktiv për një bregdet të pastër”, zhvilluar nga Qendra Durrësi Aktiv dhe mbështetur nga “Lëviz Albania”.

Projekti synon nxitjen e aktivizmit qytetar në vendimmarrjen e pushtetit lokal, për të sjellë zgjidhjen e problemit të derdhjes së ujërave të zeza në lagjen numër 1 të qytetit, përgjatë shëtitores “Taulantia” dhe plazhit të Currilave.

Video-reportazhi u realizua nga Amfora Production.

Ideja dhe zbatimi: Geri Emiri, producent.

Narratore dhe përkthyese: Livia Kreko.

 Ai u realizua më datë 17 janar 2019.

Amfora Production – Pjesë e AMFORA MEDIA GROUP.

The post Qytetarët dokumentojnë ndotjen e bregdetit dhe dorëzojnë rekomandime tek Bashkia Durrës first appeared on Amfora.

Ky është reportazhi i katërt nga pesë të tillë, të realizuar në kuadër të projektit “Durrësi aktiv për një bregdet të pastër”, zhvilluar nga Qendra Durrësi Aktiv dhe mbështetur nga “Lëviz Albania”.

Projekti synon nxitjen e aktivizmit qytetar në vendimmarrjen e pushtetit lokal, për të sjellë zgjidhjen e problemit të derdhjes së ujërave të zeza në lagjen numër 1 të qytetit, përgjatë shëtitores “Taulantia” dhe plazhit të Currilave.

Në reportazh do të njiheni me: 1. Prezantimi dhe diskutimi për projektin; 2. Diskutimi me anëtarët e Këshillit Bashkiak Durrës; 3. Dërgimi i kërkesës tek Këshilli Bashkiak Durrës; 4. Dorëzimi i peticionit në Bashkinë Durrës.

Video-reportazhi u realizua nga Amfora Production.

Ideja dhe zbatimi: Geri Emiri, producent.

Narratore dhe përkthyese: Livia Kreko.

 Ai u realizua më datë 17 janar 2019.

Amfora Production – Pjesë e AMFORA MEDIA GROUP.

The post Ballafaqimi me anëtarët e Këshillit Bashkiak dhe peticioni rrit transparencën në Bashkinë Durrës first appeared on Amfora.

Ky është reportazhi i tretë nga pesë të tillë, të realizuar në kuadër të projektit “Durrësi aktiv për një bregdet të pastër”, zhvilluar nga Qendra Durrësi Aktiv dhe mbështetur nga “Lëviz Albania”.

Projekti synon nxitjen e aktivizmit qytetar në vendimmarrjen e pushtetit lokal, për të sjellë zgjidhjen e problemit të derdhjes së ujërave të zeza në lagjen numër 1 të qytetit, përgjatë shëtitores “Taulantia” dhe plazhit të Currilave.

Video-reportazhi u realizua nga Amfora Production.

Ideja dhe zbatimi: Geri Emiri, producent.

Narratore dhe përkthyese: Livia Kreko.

Ai u realizua më datë 1 nëntor 2018.

Amfora Production – Pjesë e AMFORA MEDIA.

The post Pasojat shëndetësore nga derdhja në det e ujërave të zeza” – Shëtitorja “Taulantia”–Currila, Durrës first appeared on Amfora.

Ky është reportazhi i dytë nga pesë të tillë, të realizuar në kuadër të projektit “Durrësi aktiv për një bregdet të pastër”, zhvilluar nga Qendra Durrësi Aktiv dhe mbështetur nga “Lëviz Albania”.

Projekti synon nxitjen e aktivizmit qytetar në vendimmarrjen e pushtetit lokal, për të sjellë zgjidhjen e problemit të derdhjes së ujërave të zeza në lagjen numër 1 të qytetit, përgjatë shëtitores “Taulantia” dhe plazhit të Currilave.

Video-reportazhi u realizua nga Amfora Production.

Ideja dhe zbatimi: Geri Emiri, producent.

Narratore dhe përkthyese: Livia Kreko.

Ai u realizua më datë 1 tetor 2018.

Amfora Production – Pjesë e AMFORA MEDIA GROUP.

The post Faktet dhe kontradiktat e institucioneve mbi derdhjen e ujërave të zeza në det, Durrës first appeared on Amfora.