Bledi Kasmi mori pjesë në protestën e opozitës më 26 maj të vitit 2018 dhe tregoi se ishte atje në cilësinë e kryeredaktorit të gazetës opozitare, “Rilindja Demokratike”, për të realizuar foto dhe video. 

Nga pamjet e publikuara dhe nga pretendimi i Kasmit ai dallohet në vijën e parë të protestuesve teksa turma po mbante disa kangjella metalike me qëllim pengimin e policisë që t’i zbrapste. Para kordonit të policisë dallohet një oficer që godet me shkop gome, prej të cilit Kasmi pretendon se mbeti i plagosur në kokë dhe u lëndua në pjesë të tjera të trupit.

Pavarësisht pamjeve filmike, reagimit të Kasmit, organizatave ndërkombëtare të medias dhe të opozitës së kohës, policia nuk i referoi rastin prokurorisë dhe kjo e fundit konfirmoi se nuk nisi asnjë hetim me iniciativën e saj. Ndërsa Kasmi pretendon se edhe Spitali i Traumës e mohoi shërbimin mjekësor që i ofroi.

Kasmi kujtoi se menjëherë sapo gjendja e tij shëndetsore u përmirësua pasi u trajtua në spital, kishte nisur që të ndiqte çështjen e tij nëpërmjet organeve përgjegjëse.  

“Pas dy ditësh kam shkuar në Mjekësinë Ligjore për të evidentuar dhunën e ushtruar nga dëmtimet që kisha në kokë dhe disa pjesë të tjera të trupit. Mjeku bëri raportin e plotë”, kujtoi Kasmi për Median Amfora. 

Përmes avokatit ai i ishte drejtuar më pas Policisë Gjyqësore me qëllim dokumentimin e dhunës dhe të referimit në prokurori.

“Sipas procedurës kërkohej dëshmia e Policisë Gjyqësore. I kam kërkuar Policisë Gjyqësore që të bëja dëshminë dhe nuk më kthyen përgjigje, duke refuzuar ta marrin dëshminë”, tregoi Kasmi. 

Gjendur përballë mos marrjes së dëshmisë na ana e oficerëve të Policisë Gjyqësore, avokati kërkoi nga Spitali i Traumës që t’i vendosnin në dispozicion kartelën mjekësore.

“I kërkova spitalit ku bëra ndërhyrjen që të më jepnin katelën për atë që kishin bërë dhe ata nuk e jepnin dhe çudia arriti deri atje sa të mohonin që kisha bërë ndërhyrjen tek ai spital, megjithëse gjithçka ishte e dokumentuar nga mediat”, tha Kasmi. 

Në mungesë të marrjes së dëshmisë nga oficeri i Policisë Gjyqësore dhe pa kartelën mjekësore të spitalit, mjeku ligjor sipas Kasmit e kishte të pamundur të jepte zyrtarisht raportin e konstatimit të dhunës, pasi i kërkohej një konfirmim nga ana e tyre.

“Pak pasi jam shtruar në pavijon ka ardhur Policia Gjyqësore për të marrë dëshminë. Në kushtet që e kisha të pamundur të jepja dëshmi, i thashë se për momentin nuk jam në gjendje”, sqaroi Kasmi për Median Amfora. 

Kryeredaktori i RD-së theksoi se më pas nuk i është marrë më kurrë dëshmia dhe nuk arriti të siguronte dosjen e trajtimit në spital, ku morri ndihmën e parë, ju nënshtrua ndërhyrjes kirurgjikale dhe qëndroi i shtruar në pavijon. 

“Në lidhje me rastin e shtetasit Bledi Kasmi, ju lutemi të na saktësoni të dhënat, pasi në datën që ju i referoheni nuk rezulton material kallëzues ku të përmendet ky shtetas”, u përgjigj zyrtarisht Prokuroria e Tiranës.

Pasi Media Amfora specifikoi të dhënat e Bledi Kasmit, të dhunuar gjatë protestës të opozitës dhe datën e saktë të ngjarjes, nuk mori më asnjë përgjigje nga Prokuroria e Tiranës.

“E gjitha ishte një skemë proceduriale për të bërë të pamundur penalizimin e policisë përmes padisë nga ana ime. Pasi të dy institucionet, Policia Gjyqësore dhe Spitali i Traumës ishin bërë palë me dhunuesin dhe mohonin atë që kishte ndodhur dhe bënin të pavlerë kështu çdo padi që mund të ngrihej ndaj Policisë së Shtetit”, komentoi Kasmi. 

Sulmi i policisë ndaj kryeredaktorit të gazetës “Rilindja Demokratike” gjatë protestës së opozitës është një ndër shumë rastet e dhunës së oficerëve të policisë ndaj gazetarëve, të cilat mbeten të pandëshkuara. E njëjta sjellje nga Prokuroria e Tiranës është përsëritur edhe kur gazetarët janë sulmuar nga persona civilë.

The post Rrahja e gazetarit Bledi Kasmi, nuk ju mor dëshmia dhe ju “fsheh” kartela mjekësore first appeared on Amfora.