“Po, ka regjistruar një procedim, e kam pohuar edhe në komisionin e ligjeve, por është bërë deklarim publik nga SPAK në hetim dhe po bashkëpunohet ngushtë me OLAF dhe zyrën e prokurorit publik europian, por me OLAF kryesisht si iniciues i këtij procedimi”, deklaroi Dumani. 

Hetimi vjen në një moment kur debati për fondet e programit IPARD rrjedh në nivele politike dhe institucionale, ku më 16 tetor Kuvendi i Shqipërisë rrëzoi një mocion të opozitës për ngritjen e një komisioni hetimor parlamentar lidhur me këtë çështje.

Opozita akuzoi shumicën në parlament se shmangi transparencën dhe nuk i kanë dhënë llogari për fondet e Bashkimit Evropian  dedikuar fermerëve shqiptarë.

E pyetur nga deputetja e Partisë Demokratike, Elda Hoti, nëse në hetim përfshihet edhe ish-ministrja e Bujqësisë Frida Krifca, Dumani theksoi se procedimi penal përfshin çdo person që dyshohet për veprime të kundërligjshme gjatë ushtrimit të detyrës.

“Në atë procedim penal hetohet çdo person që dyshohet se gjatë kryerjes së detyrës ka kryer veprime të kundërligjshme. Është çështje prioritare, pasi bashkëpunimi me autoritetet e huaja është vendimtar”, tha kreu i SPAK përpara deputetëve.

Në investigimin e Medias Amfora u zbuluan raste konkrete ku kompani dhe persona me lidhje të ngushta politike pa eksperiencë bujqësore përfituan nga subvencionet në mënyrë të dyshimtë. Por, tashmë kjo histori ka kaluar përtejë shqetësimeve për bujqësinë duke u bërë çështje besimi institucional dhe përmbushjeje e angazhimeve europiane për Shqipërinë.

Sipas të dhënave dhe dokumenteve të siguruara gjatë investigimit, ekzistojnë prova të shumta që tregojnë për abuzime sistematike me fondet IPARD, nga procesi i përzgjedhjes së projekteve deri te monitorimi i tyre. Megjithatë, pavarësisht volumit të fakteve, hetimet e SPAK mbeten në fazën paraprake, pa asnjë person të akuzuar deri më tani.

 Pyetjes se përse nuk ka veprime të menjëhershëm kur rastet lidhen me qeverinë, përkundër rasteve të opozitës, Dumani iu përgjigj se SPAK është i ftohtë në çështjet penale dhe nuk ka rëndësi se nga cili kamp politik vjen subjekti i veprës penale.

“Ky është vlerësim i juaj zonja deputete. Ne jemi të ftohtë në hetimin e çështjeve penale. Nuk na intereson se nga cili kamp politik vjen subjekti i veprës penale. E rëndësishme është të sigurohen provat dhe të ngrihet akuzë e suksesshme. Jemi në fazën e hetimeve paraprake”, tha Dumani.

Burime nga institucionet europiane kanë konfirmuar më herët se Zyra Evropiane Kundër Mashtrimit (OLAF) ka ndjekur me vëmendje zbatimin e programeve IPARD në disa vende të Ballkanit Perëndimor, përfshirë Shqipërinë dhe Maqedoninë e Veriut.

Sipas të dhënave të raportuara OLAF nisi verifikimet paraprake pas një sërë sinjalizimesh mbi mënyrën si janë përdorur fondet e Bashkimit Europian për investime bujqësore dhe rurale.

Në rastin e Shqipërisë, dyshimet për parregullsi lidhen me mospërputhje mes projekteve të paraqitura dhe atyre të zbatuara realisht, si dhe me përfitimin e fondeve nga kompani të lidhura me zyrtarë publikë.

Hetimeve të SPAK i është përfshirë edhe Zyra Evropiane Kundër Mashtrimit (OLAF), që po bashkëpunon me autoritetet shqiptare për verifikimin e përdorimit të fondeve IPARD dhe të mundësive për abuzim me skemat e subvencioneve bujqësore.

Hetimi i përbashkët është në fazën e shkëmbimit të informacionit dhe synon të përcaktojë nëse fondet e BE-së janë përdorur në përputhje me kriteret e programit IPARD, apo në kundërshtim me to.

The post Pas tre vitesh hetime, IPARD mbetet në fazën paraprake first appeared on Amfora.

Ngjarja është cilësuar nga e përditshmja franceze Le Monde si ‘një ndër vjedhjet më të guximshme të viteve të fundit që trondit jo vetëm një muze, por vetë besimin te mbrojtja e trashëgimisë kulturore’.

Sipas informacioneve të publikuara nga mediat franceze, vjedhja ndodhi rreth orës 9:30 të mëngjesit së të dielës, vetëm pak minuta pasi muzeu hapi dyert për vizitorët.

Autorët vepruan me një nivel të lartë organizimi dhe shpejtësie. Sipas televizionit francez BFMTV, “autorët, të maskuar dhe të pajisur me doreza, vepruan me shpejtësi kirurgjikale, duke çmontuar kasetat e xhamit ku ekspozoheshin bizhuteritë, pa aktivizuar menjëherë sistemin e alarmit”. 

Detajet e para të hetimit tregojnë se autorët shfrytëzuan një zonë të jashtme të muzeut që nuk është e aksesueshme për vizitorët. Le Monde shkruan se ‘autorët kanë përdorur një akses të rrallë logjistik pranë Lumit Sena, duke vepruar në mënyrë të heshtur për të shmangur vëmendjen e rojeve’.

Objektet e vjedhura nuk janë thjesht bizhuteri me vlerë materiale, por pjesë e historisë së Francës. 

Sipas revistës franceze La Tribune de l’Art, ‘koleksioni i marrë përfshin disa prej bizhuterive më të rëndësishme të periudhës perandorake, si një diademë me diamante, një gjerdan ceremonial dhe unaza që i përkisnin Eugénie de Montijo’.  Eugénie de Montijo (1826–1920) ishte perandoresha e fundit e Francës dhe bashkëshortja e Napoleonit III, figura e cila luajti një rol të rëndësishëm në jetën kulturore dhe oborrtare të shekullit XIX.

Muzeu u mbyll menjëherë, ndërsa policia franceze nisi hetimet me pjesëmarrjen e njësisë speciale për krime ndaj artit.

Presidenti francez reagoi menjëherë pas ngjarjes duke dënuar vjedhjen dhe duke kërkuar masa urgjente sigurie. Në një postim në platformën X, Emmanuel Macron deklaroi se “kjo është një goditje ndaj historisë sonë të përbashkët dhe trashëgimisë kulturore që duhet mbrojtur me çdo kusht”. 

Ngjarja ka ngritur dyshime serioze mbi sigurinë e trashëgimisë kulturore në Francë dhe masat e mbrojtjes së muzeve kombëtare. Ky incident është përkufizuar nga Le Monde si ‘vjedhja që theu iluzionin e paprekshmërisë së Luvrit’-një paralajmërim se as institucionet më prestigjioze botërore nuk janë të mbrojtura.

Një ditë pas ngjarjes, sipas mediave franzece Luvri mbetet i mbyllur për vizitorët, ndërsa hetimet vazhdojnë. Bizhuteritë e Kurorës, që dikur ndriçonin sallën dedikuar perandorisë, tani përfaqësojnë një plagë të hapur në kujtesën kulturore të Evropës si një kujtesë se pasuria më e madhe e një kombi nuk është ari, por historia që di ta mbrojë. 

Përtej kufijve francezë, rasti i Luvrit ka rikthyer vëmendjen te vlera e sigurisë kulturore si pjesë e trashëgimisë njerëzore. Në vende si Shqipëria dhe rajoni i Ballkanit Perëndimor, ku muzetë publikë shpesh përballen me mungesë fondesh dhe teknologjie, kjo ngjarje shërben si kambanë paralajmëruese.

Në Shqipëri, pasuritë muzeale kanë qenë shpesh të pambrojtura, dhe vjedhjet e objekteve me vlerë historike kanë mbetur të pazbardhura. Media Amfora ka raportuar më herët për zhdukjen e mbi një mijë artefakteve në muzetë e vendit, një fenomen që dëshmon se mungesa e sigurisë kulturore është problem i përbashkët evropian.

The post Vjedhja në Muzeun e Luvrit, kambanë alarmi për mbrojtjen e trashëgimisë kulturore botërore first appeared on Amfora.

“Nuk doni të flisni pse Bashkimi Evropian ka bllokuar fondet IPARD, miliona euro që ishin destinuar për fermerët shqiptarë. Shqipëria është i vetmi vend ku ka ndodhur një gjë e tillë, sepse kjo qeveri nuk vjedh vetëm taksapaguesit shqiptarë, por edhe ata europianë,” deklaroi Gazment Bardhi, kryetar i Grupit Parlamentar opozitar gjatë fjalës së tij në Kuvend.

Në vijim të fjalës së tij, Bardhi shtoi se mazhoranca po refuzon transparencën për një çështje që, sipas tij, prek interesat publike dhe fondet e BE-së në Shqipëri.

“Ju po shmangni debatin për këtë çështje, ndërsa është detyrë e Kuvendit të sqarojë përgjegjësitë për bllokimin e fondeve IPARD. Dyshimet për abuzim me fondet e BE-së nuk i ka ngritur opozita, por institucionet europiane,” u shpreh ai.

Kërkesa e Partisë Demokratike për mocion me debat dhe ngritjen e një komisioni parlamentar u rrëzua me 72 vota kundër nga shumica socialiste, ndërsa deputetët e opozitës votuan pro.

Në kushtet e refuzimit të debatit parlamentar, opozita paralajmëroi përshkallëzim institucional. Kreu i grupit parlamentar të PD, Gazment Bardhi, deklaroi se brenda një jave partia që ai përfaqëson do të depozitojë kërkesën për ngritjen e një Komisioni Hetimor parlamentar për fondet e Bashkimit Europian, duke e cilësuar transparencën mbi programin IPARD “detyrim ndaj fermerëve dhe interesit publik”.

Ky zhvillim politik vjen pas një përpjekjeje të mëparshme të opozitës për ta futur në rend dite mocionin me debat. Më 8 tetor, Konferenca e Kryetarëve rrëzoi kërkesën e Partisë Demokratike për diskutim parlamentar mbi gjetjet e OLAF për fondet IPARD dhe për ngritjen e një komisioni të posaçëm.

Mazhoranca argumentoi se çështja “është kompetencë e organeve të drejtësisë”, ndërsa opozita e konsideroi vendimin “bllokim të transparencës dhe shmangie të përgjegjësisë politike”.

Media Amfora arriti që të investigoi dy vite më parë se si Programi IPARD u kthye në një “klub ekskluziv” për kompanitë e mëdha dhe ato të lidhura me politikën dhe krimin. Subjekte të hapura rishtazi dhe të tjerë pa eksperiencë në bujqësi, u ekspozuan në disa raste, duke krijuar skema familjare përfitimi apo duke mashtruar për destinacionin e investimeve.

Më 12 shtator përfaqësues të “Nismës Thurje” depozituan në SPAK një kallëzim penal për zyrtarët e Agjencisë për Bujqësinë (AZHBR) dhe për ish-ministren e bujqësisë Frida Krifca, me dyshimet se kanë shpërdoruar detyrën dhe janë korruptuar. Kjo është hera e dytë që zyrtarisht Programi IPARD shkon në SPAK, i cili herën e parë shpalli moskompetencën. 

Çështja e fondeve IPARD mbetet e hapur si në drejtësi ashtu edhe në politikë, ndërsa shuma të mëdha financimesh të BE mbeten të bllokuara për Shqipërinë.

The post Rrëzohet mocioni për IPARD, Kuvendi shmang transparencën për fondet e fermerëve shqiptarë first appeared on Amfora.

Vendi ynë është njohur me programet e BE-së që ofrojnë mundësi për zhvillimin e profesionistëve të rinj dhe të sipërmarrjes, por ajo ende numëron një numër të ulët nismash të miratuara. 

“Përfitimi real nga programet si ‘Horizon 2020’ dhe ‘Horizon Europe’ mbetet i kufizuar. Shqipëria ka një numër shumë të ulët projektesh të fituara krahasuar me vendet e tjera të Ballkanit Perëndimor”, konstatoi Dorina Gjipali, pedagoge dhe kërkuese shkencore.

Sipas ekspertes zhvillimet janë inkurajuese dhe megjithëse tregohet vullnet institucional për të ndërtuar ura bashkëpunimi me komunitetin shkencor evropian, përfitimet mbeten minimale. 

“Shqipëria ka ndërmarrë disa hapa pozitivë drejt forcimit të përfshirjes në Hapësirën Evropiane të Kërkimit dhe Arsimit të Lartë, duke shënuar përfshirje në rrjete dhe aleanca universitare evropiane që synojnë ndërkombëtarizimin e arsimit, shkëmbimin akademik dhe bashkëpunimin në projekte kërkimore”, shpjegoi për Amforën Gjipali.

“Këto zhvillime janë inkurajuese dhe tregojnë vullnet institucional për të ndërtuar ura me komunitetin shkencor evropian”, komentoi më tej Gjipali, pedagoge në Universitetin “Aleksandër Moisiu” dhe anëtare e Komitetit Drejtues të Aleancës Universitare Evropiane “STARS EU”.

Shqipëria dhe potencialet e pashfrytëzuara në programet e BE-së

Bashkimi Evropian ofron prej vitesh një sërë fondesh dhe programesh mbështetëse për vendet e Ballkanit Perëndimor në fushën e kërkimit shkencor dhe inovacionit, të cilat janë pjesë e përpjekjeve për të afruar këto vende me BE-në dhe për të forcuar bashkëpunimin në fusha të rëndësishme, si shkenca, arsimi dhe teknologjia. 

Programi “Horizon Europe” ka nisur në vitin 2021 dhe parashikohet që të përfundojë në vitin 2027, mbetet programi kryesor i BE-së për kërkimin dhe inovacionin, me një buxhet mbi 95 miliardë euro.  

Shqipëria është pjesëmarrëse e njohur në këtë program që prej nisjes së zbatimit të tij në vitin 2021, por me një numër shumë të ulët projektesh të zbatuara krahasuar me vendet e tjera të Ballkanit Perëndimor. 

Në vitin 2023 vendi ynë mori pjesë në 15 projekte me një financim rreth 2 milionë Euro. Ndërsa nga ana tjetër, Serbia vlerësohet si lideri rajonal për sa i përket këtij programi dhe numëron mbi 130 projekte, që kapin një financim mbi 35 milionë Euro.

Maqedonia e Veriut është përfituese e mbi 50 projekteve, me rreth 10 milionë Euro, ndërsa Mali i Zi dhe Bosnja-Hercegovina kanë më pak projekte se Serbia, por më shumë se Shqipëria në vlerë financimi. Kosova mund të krahasohet me Shqipërinë për sa i përket numërit të projekteve, por me financim edhe më të ulët. 

Sipas ekspertëve kjo lidhet me faktin se Shqipëria vazhdon që të ketë mungesë kapacitetesh për tu përfshirë në programe të tilla ndërkombëtare, që lidhet me planifikimin, aplikimin dhe zbatimin e këtyre projekteve.

“Shpesh mungon kapaciteti për të marrë pjesë si koordinator ose partner të barabartë në konsorciume ndërkombëtare”, analizoi Gjipali. Sipas saj kjo mungesë kapacitetesh pasqyron mungesën e përvojës në hartimin dhe menaxhimin e projekteve, por dhe mungesën e infrastrukturës së qëndrueshme kërkimore.  

“Kjo pasqyron ende mungesën e përvojës në hartimin dhe menaxhimin e projekteve, por mbi të gjitha mungesën e kapacitetve dhe të një infrastrukture të qëndrueshme kërkimore të njësive mbështetëse brenda universiteteve, siç janë zyrat për transferimin e teknologjisë apo për menaxhimin e pronësisë intelektuale”, shtoi ajo. 

Ndërsa referuar shpenzimeve qeveritare për shkencën dhe kërkimin, Shqipëria renditet në vendin e parafundit në Evropë, duke lënë pas vetëm Rumaninë. Referuar të dhënave të Eurostat për vitin 2024, buxheti i alokuar nga qeveria shqiptare për kërkim-zhvillimin ishte 0.19% e Prodhimit të Brendshëm Bruto ose 40.9 milionë euro në vlerë absolute – Dhe nëse do i referohemi vetëm Serbisë në rajonin tonë, treguesi është 0.4% e PBB-së.

Sipas ekspertëve një tjetër sfidë e rëndësishme lidhet me faktin që rezultatet e kërkimit të studiuesve shqiptarë nuk përkthehen në produkte të aplikueshme sepse mungojnë strukturat që ndihmojnë këtë proces – si zyrat për inovacion, inkubatorët e teknologjisë apo platformat për komercializimin e ideve. 

“Kjo vjen për shkak të fragmentimit të kërkimit, mungesës së financimit të qëndrueshëm dhe boshllëqeve në politikat e inovacionit”, analizoi Gjipali.  

Filli i këputur me projektet e BE-së 

Alba Brojka, një tjetër hulumtuese që ka përgatitur një studim për “Qendrën Shkencë dhe Inovacion për Zhvillim (SCiDEV)”, shpjegoi se lidhjet e dobëta midis sektorit privat dhe insitucioneve kërkimore në Shqipëri bëjnë që vendi ynë të përfitojë më pak nga programet e Bashkimit Evropian.  

“Në nivel institucional, hulumtimi nxjerr në pah gjithashtu lidhjet e dobëta midis sektorit privat dhe institucioneve kërkimore siç është akademia”, konstatoi Brojka, analiste e politikave digjitale.  

Raporti – i përgatitur në kuadër të projektit “Përmirësimi i kërkimit dhe inovacionit të drejtuar nga lëvizshmëria në Ballkanin Perëndimor për rritje ekonomike të qëndrueshme dhe përshtatje me Bashkimin Evropian”, udhëhequr nga ekspertët dhe ekipi i organizatës zbatuese të projektit, “SCiDEV”, si pjesë e iniciativës “Ignita” – theksoi nevojën për reformë strukturore në arsimin e lartë, përmirësimin e infrastrukturës kërkimore, koordinimin më të mirë rajonal dhe ndërkombëtar, si edhe krijimin e programeve të lëvizshmërisë të përshtatura për kontekstin lokal. 

Gjithashtu më tej ai rekomandoi rritjen e angazhimit të institucioneve rajonale dhe mbështetjen e diasporës për të nxitur kthimin e njohurive dhe ekspertizës në Shqipëri. Ndërsa të tjera programe ku vendi ynë mund të ishte përfitues me më shumë projekte është Instrumenti për Asistencë të Para-Anëtarësimit (IPA III, 2021–2027).

Ndërsa “European Cooperation in Science and Technology”, i njohur si “COST”, është një program që ofron mbështetje për rrjete bashkëpunimi shkencor, përfshirë mobilitetin e studiuesve dhe organizimin e ngjarjeve shkencore.

Shqipëria është pjesë aktive e “COST” dhe programit të lëvizshmërisë së “POLICY ANSWERS”. Në vitin 2024 studentë shqiptarë dhe studiues postdoktoralë morën pjesë në skemat rajonale të shkëmbimit dy javë deri në dy muaj. Por megjithatë niveli i lëvizshmërisë mbetet i ulët krahasuar me Serbinë dhe Maqedoninë e Veriut, që kanë qasje më të strukturuar dhe grante më të mëdha.

Në krahasim me vendet e tjera të Ballkanit Perëndimor, niveli i përfitimeve financiare, kapacitetet kombëtare dhe ndikimi i projekteve në Shqipëri mbeten më të ulëta. 

Ekspertët konfirmojmë se në krahasim me vendet si Serbia, Mali i Zi dhe Maqedonia e Veriut, Shqipëria ndodhet në një pozicion më pak të favorshëm si përfituese e këtyre programeve. 

“Këto vende kanë ndërtuar qendra të ekselencës kërkimore, kanë përfituar më shumë projekte evropiane dhe kanë avancuar në krijimin e mekanizmave për transferimin e teknologjisë në ekonomi reale”, analizoi Gjipali për Amforën. 

“Universitetet shpesh nuk kanë kapacitete të mjaftueshme për të ndërtuar njësi të qëndrueshme kërkimore me fuqi konkurruese ndërkombëtare. Po ashtu, mungojnë strukturat që mund të lidhin kërkimin akademik me industrinë apo shërbimet publike”, shtoi ajo. 

Përftimi nga këto programe nga ana tjetër do të sillte bashkëpunim ndërinstitucional mes shumë akrorësh dhe politikash, me qëllimin mbajtjen e studiuesve të rinj në vendin tonë. 

“Për të kaluar nga një ‘treg i lirë pune’ në një treg që ofron mundësi kuptimplote për studiues/profesionistë të kualifikuar, ekspertët mbështesin bashkëpunimin ndërdisiplinor dhe ndërsektorial midis politikave dhe aktorëve”, analizoi studiuesja Alba Brojka. 

Sipas ekspertëve investimet në ekosisteme kërkimi dhe inovacioni janë të domosdoshme për të ndërtuar një ekonomi të bazuar në dije dhe për të modernizuar sektorë kyç për zhvillimin e vendit, si energjia, shëndetësia, teknologjia digjitale apo drejtësia. 

The post “Shqipëria jashtë loje”: Të fundit në garën për fondet e BE-së për shkencën dhe inovacionin first appeared on Amfora.

Gazetarët Anesti Barjamemaj, Vladimir Karaj, Ola Xama, Geri Emiri, Aida Ciro dhe Aleksandar Dimitrievski, u përzgjodhën midis shumë kolegëve si fituesit e këtij viti për historitë e tyre për krimin mjedisor, ekspozimin rolin të zyrtarëve të lartë, korrupsionit dhe vështirësitë me të cilat përballen fermerët në Ballkan.

Kreu i Seksionit Politik të Delegacionit të Bashkimit Evropian në Shqipëri, André Rizzo, foli për rolin e gazetarisë investigative në kontrollin e pushtetit dhe nxitjen e llogaridhënies si pjesë e demokracisë.

“Në një botë ku ritmi i ciklit të lajmeve dhe konsumi i lajmeve është kaq i shpejtë, këto çmime synojnë të promovojnë përsosmërinë në gazetarinë investigative që u mundëson qytetarëve të kuptojnë më thellë lajmet”, tregoi Rizzo.

Gazetarët Anesti Barjamemaj dhe Vladimir Karaj nga Reporter.al dhe Zëri i Amerikës, u vlerësuan me vendin e parë për hetimin e tyre për krimin mjedisor në Landfillin e Sharrës, duke ekspozuar derdhjet e mbetjeve toksike në Lumin Erzen.

Gazetarja Ola Xama nga Reporter.al u vlerësua me vendin e dytë për zbulimin e rolit të Kryetarit të Bashkisë së Tiranës, Erion Veliaj, në projektin e diskutueshëm të Inceneratorit të Tiranës.

Gazetarët nga Amfora.al, Geri Emiri dhe Aida Ciro nga Shqipëria dhe gazetari Aleksandar Dimitrievski, nga Maqedonia e Veriut,  u vlerësuan me vendin e tretë për artikullin që tregoi sfidat me të cilat përballen fermerët në Ballkan për aksesin në fondet e programit IPARD. 

Investigimi i publikuar nga Amfora zbuloi se pezullimi i përkohshëm për Shqipërinë i programit për bujqësinë IPARD II, pas dyshimeve të Bashkimit Evropian për korrupsion, është vetëm maja e ajsbergut të paketës së granteve 94.6 milionë euro. 

Sipas gjetjeve të hulumtimit, programi në Shqipëri u kthye në një “klub ekskluziv” për kompanitë e mëdha dhe ato të lidhura me politikën dhe krimin. Ndërsa në Maqedoninë e Veriut programi ekspozoi lidhje të ngjashme, por sporadike dhe më minimale krahasur me vendin tonë. 

“Investigimi ynë më shumë se abuzimit me ndihmën e Bashkimit Evropian dhe korrupsionit të të niveleve të ndryshme kryesisht në Shqipëri, i dedikohet një prej grupeve më vurnerabël të shoqërisë, bujqve dhe blegtorëve”, shpjegoi bashkëautori i investigimit, Geri Emiri.

“Ndërsa në aspektin profesional, çmimi i sotëm mendoj se i dedikohet gazetarisë së vërtetë, asaj parimore, që verifikon çdo detaj, që nuk tërhiqet përballë presioneve dhe që nuk rend pas “scoop”-it”, shtoi Emiri, duke theksuar se rezultati erdhi pas përkushtimit dhe punës në ekip.

Juria me 3 anëtarë që përzgjodhi fituesit në Shqipëri, përbëhej nga Ilda Londo, e cila është koordinatore kërkimore në Institutin Shqiptar të Medias që nga viti 2001 dhe e specializuar në lirinë e medias, performancën rregullatore dhe zhvillimin e saj.

Anëtarja tjetër ishte Albana Kasapi, gazetare e lartë dhe redaktore e programit “Weekend”, në BBC World Service Radio. E vendosur në Mbretërinë e Bashkuar, ajo ka raportuar për ngjarje të mëdha në të gjithë Ballkanin, Moskë, Kiev dhe më gjerë.

Elira Çanga ishte anëtarja tjetër e jurisë dhe eksperte për zhvillimin e medias, me role të ndryshme ndër vite në OSBE, British Council dhe USAID. Ajo është edhe një pioniere në verifikimin e fakteve dhe modernizimin e medias në Shqipëri.

Çmimet e Bashkimit Evropian për Gazetarinë Investigative jepen nga Bashkimi Evropian në bashkëpunim me “Thomson Media”, në vendet e Ballkanit Perëndimor dhe në Turqi, për të fuqizuar dhe mbështetur gazetarinë e pavarur dhe gazetarët investigativë.  

The post Bashkimi Evropian vlerëson me çmime gazetarët investigativ në Shqipëri first appeared on Amfora.