Më 22 prill, gjykata arriti në përfundimin se gazetari legjitimohet dhe ka shteruar mjetet juridike në dispozicion vetëm për kundërshtimin e vendimit që ka lejuar sekuestrimin e të dhënave kompjuterike, që është kundërshtuar prej tij deri në Gjykatën e Lartë.

“E drejta e gazetarit për të ruajtur burimin e informacionit dhe për të mos e zbuluar atë është një nga kushtet e lirisë së medias. Mbrojtja e burimeve të gazetarëve është një prej garancive kryesore të lirisë së medias, si pjesë e lirisë kushtetuese të shprehjes, ndaj urdhërimi i gazetarit për të zbuluar burimet e tij mund të jetë në kundërshtim me Kushtetutën, përveçse kur ekziston një bazë e qartë ligjore që e autorizon atë dhe një interes publik mbizotërues që e dikton atë”, argumenton Gjykata Kushtetuese. 

Sipas gjykatës, e drejta e gazetarit për të mos zbuluar burimet e tyre nuk është privilegj, pasi në thelb mbron jo vetëm lirinë e medias në kuadër të lirisë së shprehjes, por edhe të drejtën e informimit të publikut.

Në lidhje me këtë vendim që u shpërnda mbrëmjen e së martës, gazetari Elton Qyno u shpreh se ka fituar betejën dhe se kjo periudhë nuk ka qenë e lehtë për të. 

“Ishte dhe vijon të jetë për mua, një periudhë jo e mirë që më hoqi totalisht vëmendjen time nga krijimtaria profesionale, pasi i gjithë fokusimi u përqendrua në kalvarin ligjor të seancave gjyqësore, ku më duhet të mbroj veten dhe profesionin, me një palë jo të lehtë për ta kundërshtuar”, u shpreh Qyno në një postim në rrjetet e tij sociale. 

Në trajtimin e themelit të çështjes, gjykata argumentoi se është ndalur në analizën e pretendimit për cenimin e lirisë së shprehjes të garantuar nga Neni 22 i Kushtetutës dhe Neni 10 i Konventës Evropiane për të Drejtat e Njeriut, KEDNJ-së, duke arritur në përfundimin se liria e shprehjes përfshin ndër të tjera edhe lirinë e shtypit. 

Vendimet gjyqësore të Gjykatave të Posaçme dhe Gjykatës së Lartë, që kanë kanë lejuar sekuestrimin e të dhënave kompjuterike të gazetarit, çmohen se kanë ndërhyrë në lirinë e shprehjes së tij.

Duke u shprehur për vendimin e gjykatës, gazetari theksoi se përveç raportimit të drejtë dhe profesional, s’ka kryer asnjë krim tjetër, ndaj drejtësia u vendos në vend. 

“Nëse quhet krim, për një gazetar kronike se jep një mendim kritik apo sjell në publik detaje dhe fakte të vërteta nga dosjet hetimore, që ka në gjykim SPAK apo qoftë dhe prokurori të tjera, atëherë duhet ta pranojmë se jetojmë në kohën e Koçi Xoxes dhe jo në kohën, kur trumbetohet liria e shprehjes dhe aderimi në BE”, u shpreh Qyno. 

Ndërhyrja në lirinë e shprehjes në këtë rast vlerësohet se nuk është proporcionale sipas Gjykatës Kushtetuese dhe se gjykatat e zakonshme nuk kanë arsyetuar në lidhje me faktin se përse marrja e të dhënave të nevojshme për hetimin mund të realizohej vetëm nëpërmjet identifikimit të burimit të gazetarit, si mjeti i fundit, si edhe përse nuk ekzistonin mjete të tjera alternative për të arritur të njëjtin qëllim. Po ashtu, çmohet se gjykatat nuk kanë arsyetuar në lidhje me urgjencën në sekuestrimin e të dhënave kompjuterike të Qynos.

Bazuar në këto arsye, Gjykata Kushtetuese ka vendosur shfuqizimin e vendimit të Gjykatës së Posaçme të Shkallës së Parë të dhjetorit të vitit 2023, për sekuestrimin e të dhënave kompjuterike, si edhe vendimet e gjykatave më të larta që e kanë lënë në fuqi.

Gjithashtu është është pranuar kërkesa e Qynos për asgjësimin e të gjitha të dhënave kompjuterike të sekuestruara me vendimet e mësipërme të shfuqizuara.

Gazetari Elton Qyno u mor në pyetje në dhjetor 2023 për rrjedhje informacioni në media të materialeve nga një dosje hetimore për një sërë krimesh të rënda, ndërsa pas një kontrolli në shtëpinë e tij dhe në zyrë, Prokuroria e Posaçme sekuestroi celularët dhe mjetet elektronike. 

Gazetari Qyno e kundërshtoi vendimmarrjen si shkelje e të drejtave të tij si gazetar dhe vijoi betejën ligjore për disa muaj.  

Pretendimi për cenimin e së drejtës për jetë private nuk është trajtuar, për sa kohë është gjetur shkelje në lirinë e shprehjes së Qynos, duke shfuqizuar vendimet e Gjykatave të Posaçme dhe Gjyaktës të Lartë.

The post Mbrojtja e burimeve, Gjykata Kushtetuese njeh të drejtën e gazetarit Qyno  first appeared on Amfora.

Gazetari Elton Qyno i Televizionit “Ora News”, përfaqësohej nga avokati Dorian Matlija, në padinë për sekuestrimin e pajisjeve elektronike në pronësi të tij, kontrollin në banesë dhe atë personal, pas një hetimi të nisur nga SPAK për nxjerrjen e sekretit hetimor.

Sipas padisë gazetari Qyno kërkon shfuqizimin e vendimmarrjeve që sollën këto vendime, duke i cilësuar ato në shkelje të lirive dhe të drejtave të njeriut. Avokati Matlija tha se mbajtja në sekuestro e mjeteve elektronike dhe kopjeve virtuale të tyre cenonte lirinë e gazetarit dhe rrezikonte ekspozimin e burimeve. 

Në seancë, Matlija paraqiti kërkesën për ndryshim të objektit duke shtuar se pasi ishin vënë në dijeni të ekzistencës së kopjeve virtuale të të dhënave në telefona, kërkohej edhe shkatërrimi i tyre.

Gjykata pas një ndërprerje të shkurtër e pranoi këtë kërkesë, duke e cilësuar të lidhur me kërkesat e mëhershme për shfuqizim të vendimeve gjyqësore që sollën sekuestron. Përfaqësuesit e Prokurorisë së Posaçme, 2 prokurorët Bledar Maksuti dhe Olsi Dado, kërkuan kohë për t’iu përgjigjur kërkesës së re. 

Gjykata Kushtetuese e pranoi kërkesën e tyre dhe e shtyu seancën për në datën 2 prill, ndërsa u dha kohë palëve për të paraqitur përgjigjet me shkrim deri më 26 mars.

Gazetari Elton Qyno u mor në pyetje në dhjetor 2023 për rrjedhjen në media të materialeve nga një dosje hetimore për një sërë krimesh të rënda, ndërsa pas një kontrolli në banesën e tij Prokuroria sekuestroi celularët dhe mjetet elektronike. Qyno e ka kundërshtuar vendimmarrjen si një shkelje e të drejtave të tij si gazetar.

Në nëntor të vitit 2024 Gjykata e Posaçme vendosi masën e detyrimit për paraqitje për gazetarin Qyno, si i dyshuar për veprën e korrupsionit pasiv në sektorin privat, mbi bazën e një procedimi të regjistruar nga Prokuroria e Posaçme për organizatën kriminale të drejtuar nga Suel Çela. Ndërsa në janar të këtij viti, Gjykata e Posaçme e Apelit e rrëzoi masën e sigurisë të vendosur nga shkalla e parë.

The post Rasti i gazetarit Elton Qyno, Kushtetuesja pranoi kërkesën për objektin e padisë first appeared on Amfora.

Gazetari i kronikës për institucionet ligjzbatuese në Tiranë u mor në pyetje për gati 7 orë të mërkurën dhe sipas një deklarate të tij për televizionin ku punon, Ora News, atij i ishte bërë presion për të treguar burimin, në vijim të hetimit të nisur nga Prokuroria e Posaçme, nën dyshimin e nxjerrjes së sekretit hetimor.

Në një lidhje direkte me emisionin “Wake Up” ditën e sotme, Qynoi shpjegoi se SPAK i kishte kërkuar që të dorëzonte telefonat dhe megjithëse ai e kishte kundërshtuar agjentët ja kishin sekuestruar. Sipas tij kontrollet kishin vijuar në banesë, automjet dhe në zyrë, deri në orën një të mëngjesit të së enjtes.

Qyno e cilësoi ngjarjen si të “paligjshme” dhe marrja e tij në pyetje nga SPAK-u krijoi një fortunë me shqetësime nga gazetarët që raportojnë ngjarjet e kronikës dhe ata që mbulojnë institucionin e prokurorisë dhe të gjykatës.

Gazetarët e njohur që punojnë çdo ditë me raportimet e ngjarjeve të kronikës, Anila Hoxha, Dorjana Bezat, Basir Çollaku dhe të tjerë, shkruajtën mesazhe mbështetëse për kolegun e tyre, duke theksuar se burimi duhet mbrojtur dhe jo të dekonspirohet nga gazetarët.
Jam me Elton Qynon dhe me çdo gazetar që i shërben publikut dhe të vërtetës”, shkruajti në mesazhin e saj në “Facebook”, Anila Hoxha.

“Kërkojnë të dinë përse ka publikuar pjesë të dëshmisë së të penduarit Nuredin Dumani, pasi më herët kishin kërkuar me shkrim çuditërisht mospublikimin”, shkruajti në “Facebook” gazetari Basir Çollaku.
Elton Qyno është gazetar me një eksperiencë të gjatë në shtypin e shkruar dhe aktualisht punon si gazetar që mbulon fushën e krimit dhe të drejtësisë në televizionin Ora News.

Në një njoftim për mediat pasditen e së enjtes, SPAK sqaroi se gazetari ishte marrë në pyetje për artikujt që janë publikuar nga ai dhe që përmbanin bisedat e bashkëpunëtorit të drejtësisë, Nuredin Dumani, të cilat i kishte realizuar përmes platformës së kriptuar “Sky ECC”.

“…në ambientet e punës u gjetën dhe u sekuestruan dokumente dhe sende elektronike tek të cilat dyshohet të ketë gjurmë të veprës penale që po hetohet”, sqaroi deklarata e SPAK për mediat, duke shtuar se kishte arritur të gjurmonte dhe të sekuestronte edhe dy telefeonat celularë të gazetarit Qyno.

The post Marrja në pyetje nga SPAK dhe kontrolli i banesës së Elton Qynos ngre shqetësime për gazetarët shqiptarë first appeared on Amfora.