“Efikasiteti i procesit legjislativ duhet të shoqërohet me standarde të larta transparence, përfshirjeje publike dhe debat parlamentar”, shkruhej në deklaratën e organizatave, të shpërndarë për mediat paraditen e 13 marsit.

Organizatat theksojnë se në procesin e integrimit evropian rëndësi ka jo vetëm ritmi i përafrimit të legjislacionit, por edhe cilësia e procesit dhe përfshirja e aktorëve të interesit.

“Korniza e monitorimit të Komisionit Evropian vlerëson jo vetëm ritmin e përafrimit të legjislacionit, por edhe cilësinë dhe përfshirjen e grupeve të interesit si pjesë e funksionimit të institucioneve demokratike”, theksuan organizatat. 

Në deklaratë ngrihen dy shqetësime kryesore që lidhen me projektvendimin për ndryshime në Rregulloren e Kuvendit. Sipas organizatave, përdorimi i procedurës së përshpejtuar për legjislacionin e integrimit evropian dhe mungesa e garancive të qarta për transparencë dhe konsultim publik mund të ndikojnë në cilësinë e procesit legjislativ.

Ndryshimet e propozuara në Rregulloren e Kuvendit synojnë të vendosin një procedurë të përshpejtuar për shqyrtimin e legjislacionit që lidhet me procesin e integrimit evropian. Sipas draftit, kjo procedurë do të zbatohej për projektligjet që lidhen me integrimin, duke synuar përshpejtimin e procesit të përafrimit të legjislacionit shqiptar me procesin “acquis” të Bashkimit Evropian.

Organizatat paralajmërojnë se mënyra e konceptimit të procedurës së përshpejtuar mund të ndikojë në funksionimin e procesit parlamentar dhe në cilësinë e shqyrtimit të legjislacionit.

“Sipas draftit, procedura e përshpejtuar do të zbatohet automatikisht për të gjithë kategorinë e projektligjeve që lidhen me integrimin europian, pa një shqyrtim parlamentar rast pas rasti. Kjo shmang filtrin procedural që aktualisht kërkon që urgjenca të propozohet, të arsyetohet dhe të miratohet nga Kuvendi për çdo projektligj të veçantë. Në mungesë të kësaj garancie, ekziston rreziku që procedura e përshpejtuar të kthehet në mënyrën standarde të miratimit të një numri gjithnjë e më të madh ligjesh – shumë prej të cilave janë teknikisht komplekse dhe me ndikim të rëndësishëm institucional dhe shoqëror. Drafti gjithashtu nuk parashikon afat minimal për shqyrtim në komisione dhe nuk ka mekanizëm rikthimi në procedurë të zakonshme kur kompleksiteti kërkon shqyrtim më të thelluar”, theksohet në deklaratë.

Organizatat shprehin gjithashtu shqetësim për mungesën e garancive për konsultimin me shoqërinë civile dhe transparencën publike në procedurat e përshpejtuara.

“Projekt-ndryshimet e propozuara nuk përfshijnë dispozita që garantojnë konsultimin me shoqërinë civile dhe grupet e interesit, angazhimin e ekspertëve apo transparencën publike në kontekstin e procedurës së përshpejtuar […]”, thuhet në deklaratë.

Organizatat i bëjnë thirrje Kuvendit që, përpara miratimit të projektvendimit, të marrë në konsideratë disa garanci procedurale për të ruajtur transparencën dhe rolin e shqyrtimit parlamentar në legjislacionin e integrimit europian. Sipas deklaratës, procedura e përshpejtuar nuk duhet të zbatohet automatikisht për të gjitha projektligjet, por të kërkojë një vendim të arsyetuar parlamentar për çdo rast, duke garantuar një periudhë minimale shqyrtimi në komisione, konsultim të strukturuar publik dhe publikimin e akteve në platformën e konsultimit të Kuvendit, transparencë të plotë për legjislacionin e përshpejtuar, si dhe forcimin e rolit të komisioneve parlamentare sektoriale në shqyrtimin e projektligjeve që lidhen me procesin e integrimit evropian.

Deklarata është nënshkruar nga 31 organizata të shoqërisë civile, mes tyre edhe Qendra Amfora, të cilat shprehen të gatshme për dialog me Kuvendin dhe institucionet përkatëse mbi çështjet e ngritura në këtë deklaratë.

Organizatat nënshkruese:

ㆍQendra Shkencë dhe Inovacion për Zhvillim (SCiDEV) 

ㆍAlbanian Woman in Audiovisual (AWA) 

ㆍPartners Albania 

ㆍAkademia e Studimeve Politike (ASP) 

ㆍQendra për Studimin e Demokracisë dhe Qeverisjes (CSDG) 

ㆍQendra “Aleanca Gjinore për Zhvillim” (GADC) 

ㆍKomiteti Shqiptar i Helsinkit (KSHH) 

ㆍQendra Shqiptare për Kërkime Ekonomike (ACER) 

ㆍInstituti i Studimeve Politike (ISP) 

ㆍAleanca Kundër Diskriminimit LGBTI 

ㆍQendra për të Drejtat e Fëmijëve në Shqipëri (CRCA-ECPAT Shqipëri) 

ㆍRrjeti Ballkanik për Gazetarinë Investigative Shqipëri (BIRN Albania) 

ㆍAsociacioni i Gazetarëve të Shqipërisë (AGSH/AJA) 

ㆍInstituti për Demokraci dhe Ndërmjetësim (IDM) 

ㆍFaktoje 

ㆍRrjeti Erasmus Tirana (ESN Tirana) 

ㆍFondacioni “Së Bashku”

ㆍInstituti për Bashkëpunim dhe Zhvillim (CDI) 

ㆍInstituti Shqiptar i Shkencës/ Open Data Albania 

ㆍRrjeti i Informimit dhe Qytetarisë Aktive 

ㆍKëshilli Shqiptar i Medias (KSHM) 

ㆍQendra Për Studime të Krahasuara dhe Ndërkombëtare (QSKN) 

ㆍQendra Amfora 

ㆍQëndresa Qytetare 

ㆍQendra Shqiptare për Gazetari Cilësore (ACQJ) 

ㆍShoqata Together for Life (TFL) 

ㆍQendra “Strehëza Edlira Haxhiymeri” 

ㆍRrjeti i Grave – Barazi në Vendimmarrje 

ㆍQendra për Mbrojtjen e Mjedisit dhe Zhvillim të Qëndrueshëm – All Green Centre 

ㆍLëvizja Europiane në Shqipëri (EMA) 

ㆍAWEN-Rrjeti i Fuqizimit të Gruas në Shqipëri

The post Shoqëria civile kundër procedurës së përshpejtuar për ligjet e integrimit evropian first appeared on Amfora.

“Përdorimi i gazit lotsjellës dhe ujit me presion në hapësira ku ndodheshin gazetarë dhe kameramanë përbën rrezik serioz për sigurinë e tyre dhe pengon ushtrimin e lirë të profesionit”, thuhet në deklaratën e rrjetit shpërndarë për mediat mesditën e 26 janarit. 

Sipas rrjetit, këto veprime krijojnë kushte të pasigurta për raportim dhe cenojnë të drejtën e publikut për t’u informuar në mënyrë të pavarur dhe të paanshme. 

“Autoritetet duhet të sqarojnë nëse protokollet për mbrojtjen e gazetarëve janë respektuar dhe të marrin masa për të parandaluar situata të ngjashme në të ardhmen”, sqaron deklarata. 

Protesta e 24 janarit në Tiranë, e organizuar nga opozita dhe e thirrur nga Partia Demokratike, u shoqërua me tensione mes protestuesve dhe forcave të rendit, ku policia ndërhyri për shpërndarjen e turmës. Gazetarë dhe kameramanë raportuan nga afër zhvillimet në terren, ndërsa në disa raste mjetet e ndërhyrjes u përdorën në zona ku ndodheshin edhe përfaqësues të mediave. 

Në deklaratë theksohet gjithashtu se përgjegjësi për sigurinë e gazetarëve kanë edhe redaksitë, të cilat duhet të sigurojnë pajisje mbrojtëse, trajnime dhe vlerësim paraprak të rrezikut për stafin që raporton nga protesta dhe ngjarje të tjera me rrezik të lartë. 

Sipas deklaratës, raportimet në media për përdorimin e spray-t ndaj një fotoreporteri dhe përdorimin e ujit me presion ndaj një gazetareje gjatë ushtrimit të detyrës ilustrojnë rreziqet me të cilat përballen gazetarët gjatë mbulimit të tubimeve publike. 

Rrjeti nënvizon se çdo rrezikim i gazetarëve përbën kërcënim për lirinë e medias dhe funksionimin e demokracisë.

Deklarata është publikuar nga Rrjeti SafeJournalists dhe është firmosur nga organizatat anëtare të rrjetit në Shqipëri, Kosovë, Serbi, Mal të Zi, Bosnje dhe Hercegovinë dhe Maqedoninë e Veriut.

The post Rrjeti në mbrojtje të gazetarëve: Siguria u rrezikua gjatë protestës së 24 janarit  first appeared on Amfora.

Raporti u prezantua nga komisionerja për zgjerim, Marta Kos, e cila u shpreh se, “Viti 2025 ishte një vit me progres të dukshëm në zgjerim”. Kos bëri të qartë se vendi më afër anëtarësimit në BE është Mali i Zi, që sipas saj do t’i mbyllë negociatat brenda vitit 2026 dhe do të anëtarësohet në BE në vitin 2028. Kos gjithashtu theksoi se krahas Malit të Zi, Shqipëria, Ukraina dhe Moldavia kanë “shkëlqyer” në raport me implementimin e reformave të nevojshme për anëtarësim në BE.

Përgatitja dhe progresi i Shqipërisë

Raporti vlerëson zgjedhjet në Shqipëri si të lira, të ndershme dhe të mbajtura në mënyrë profesionale, pavarësisht garës së pabarabartë dhe abuzimit me burimet publike. Kjo e ngjashme me përfundimet e raportit përfundimtar të ODIHR mbi zgjedhjet e 11 majit.

Raporti i BE-së evidentoi se Parlamenti është efektiv dhe se qeveria shqiptare shfaq dedikim për integrimin në BE. Sidoqoftë vërehet edhe ekosistemi i vështirë në të cilin organizatat e shoqërisë civile operojnë. Sipas BE-së shoqëria civile në Shqipëri përballet me kufizime në fonde, fushata shpifjeje e presion nga partitë politike. Raporti përmend presionet ligjore në formën e “padive strategjike kundër pjesëmarrjes publike” (SLAPP) si mjet për të goditur punën investigative e në mbështetje të interesit publik të organizatave të shoqërisë civile. BE gjithashtu është e bindjes se reforma në administratën publike ka funksionuar, por se rekomandimet e vitit të kaluar për Shqipërinë janë zbatuar pjesërisht.

Raporti i progresit vlerësoi reformën në drejtësi, punën e SPAK dhe përgatitjen që sistemi i drejtësisë shqiptar ka për konvergjencën me atë të BE-së. Në raport me luftën ndaj korrupsionit dhe krimit të organizuar, komisioni vlerëson progresin pozitiv të Shqipërisë. 

Por pavarësisht arritjeve në sistemin e drejtësisë dhe luftës ndaj korrupsionit, vërehet nga organizatat ndërkombëtare se fusha si liria dhe pluralizmi mediatik, e drejta e pronës dhe të drejtat e pakicave mbeten problematike dhe me progres të kufizuar. Për më tepër, komisioni vëren se Shqipëria ka bërë progres të kufizuar në raport me lirinë e shprehjes.

Raporti i progresit theksoi se pavarësia e medias është vënë në rrezik nga ndërthurja e interesave të biznesit dhe politikës, e gjithashtu rekomandimet e vitit të kaluar nuk janë vënë në zbatim. Ato vijojnë të jenë në fuqi duke përfshirë forcimin e transparencës së pronësisë së medias, pluralizmin e medias dhe pavarësinë editoriale, forcimin e transparencës së financimit të medias nga burime private dhe shtetërore, forcimin e autonomisë së rregullatorit të medias dhe pavarësinë e transmetuesit shtetëror, shfuqizimin e plotë të dispozitave penale mbi fyerjen dhe shpifjen, si edhe përafrimin e aspekteve civile të shpifjes me standardet evropiane.

Raporti vlerëson progresin që Shqipëria ka bërë në zhvillimin e një ekonomie funksionale tregu, megjithëse evidenton se sundimi i dobët i ligjit është barrierë për këtë zhvillim. Komisioni shqetësohet nga norma e lartë e NEET-it (përqindja e popullsisë që nuk merr pjesë as në arsim, as në punësim, e as në trajnim).

Në raport nënvizohet përmbushja që Shqipëria i ka bërë parametrave të nevojshëm të stabilitetit ekonomik, financiar, buxhetor e monetar të nevojshme për anëtarësimin në BE. Rritja ekonomike e Shqipërisë vijon të mbetet e qëndrueshme, rreth 4% në vit, ndërkaq progres raporti nënvizon se qeveria vijon të jetë e dedikuar ndaj stabilitetit makroekonomik dhe rritjes së qëndrueshme.

Rënia e inflacionit në targetin 3% të Bankës së Shqipërisë, si edhe konsolidimi fiskal, përmenden si faktorë emancipimi të ekonomisë shqiptare në përputhje me standardet e BE-së. Sidoqoftë, BE përmend se mjedisi i të bërit sipërmarrje në Shqipëri është sfidues, ndërsa tregu i punës vijon të vuajë nga ekzistenca e barrierave strukturore. Një faktor pozitiv në konvergjencën e standardeve ekonomike të Shqipërisë me ato të BE-së është fakti se ajo vijon të mbetet partneri më i madh i Shqipërisë me 57.4% të importeve që vijnë nga unioni.

Për sa i përket mbrojtjes së mjedisit, raporti parashtron vërejtje për Shqipërinë. Rekomandimet përfshijnë nevojën për implementimin e direktivave të BE-së në fusha si cilësia e ajrit, ujit, mbrojtja e habitatit, ndotjes industriale, menaxhimi i mbetjeve e zhurmave, për të cilat raporti nuk sheh progres nga ana e Shqipërisë.

Së fundmi, anëtarësimi i Shqipërisë në BE vlerësohet si i afërt, në përputhje me planin e zgjerimit, të nxitur nga një sërë faktorësh, duke përfshirë nevojën për një Evropë më të madhe përballë një agresioni të mundshëm.

Metodologjia

Raporti i progresit me rreth 100 faqe analizon progresin e Shqipërisë si dhe fushat për përmirësim në 6 grupkapituj: “Themelet e procesit të anëtarësimit”, “Tregu i brendshëm”, “Konkurrueshmëria dhe rritja gjithëpërfshirëse”, “Agjenda jeshile dhe lidhja e qëndrueshme”, “Burimet, agrikultura dhe kohezioni”, si edhe “Marrëdhëniet me jashtë”.

Progresi në këto grup kapituj u shtjellua në raport me kapitujt respektivë. Themelet e procesit të anëtarësimit u vlerësuan në bazë të kapitujve politikë, si demokracia, reforma në administratën publike, drejtësia dhe të drejtat themelore, drejtësia, liria, siguria, por edhe kritereve ekonomike, si ekzistenca e një ekonomie funksionale tregu, kapaciteti për të përballuar fuqinë konkurruese dhe forcat e tregut në BE, prokurimet publike, statistikat dhe kontrollin financiar.

Tregu i brendshëm u vlerësua në kapituj si lëvizja e lirë e mallrave, lëvizja e lirë e punëtorëve, e drejta e krijimit të biznesit dhe liria e ofrimit të shërbimeve, lëvizja e lirë e kapitalit, ligji i kompanive, ligji për pronën intelektuale, politikat e konkurrueshmërisë, shërbimet financiare, mbrojtja e konsumatorit dhe shëndetit.

Konkurrueshmëria dhe rritja gjithëpërfshirëse vlerësohet në kapituj si transformimi digjital e media, taksimi, politikat ekonomike dhe monetare, politikat sociale e punësimi, sipërmarrja dhe politikat industriale, shkenca dhe kërkimi, arsimi e kultura dhe bashkimi kufitar.

Grupkapitulli i katërt, ai i agjendës jeshile dhe lidhjes së qëndrueshme, u raportua nëpërmjet politikave të transportit, energjisë, rrjeteve transevropiane, mjedisit dhe ndryshimeve klimatike. Grupkapitulli i burimeve, agrikulturës dhe kohezionit u vlerësua nëpërmjet fushave si politikat mbi sigurinë ushqimore, veterinare dhe fitosanitare, peshkimin e akuakulturën, politikat rajonale dhe koordinimin e instrumenteve strukturale, si dhe nëpërmjet dispozitave financiare e buxhetore. Grupkapitulli i fundit, ai i marrëdhënieve me jashtë, u vlerësua në kapitullin me të njëjtin emër, si dhe në politikat e jashtme, të sigurisë e të mbrojtjes.

Studimi i këtyre kategorive është bërë nëpërmjet komponentëve si vlerësimit të përgatitjeve por dhe progresit në raport me rekomandimet e kaluara të BE-së. Vlerësimi i përgatitjes varion nga “faza fillestare” në “plotësisht e përgatitur”, me Shqipërinë që vlerësohet kryesisht si “mesatarisht e përgatitur” gjatë raportit. Ndërkaq progresi i vendeve në raport me rekomandimet e BE-së varion nga “pa progres” në “progres i mirë”, me Shqipërinë që asociohet kryesisht me termat “progres i kufizuar” ose “disi progres” gjatë raportit.

The post BE: Shqipëria me progres të dukshëm, por liria e medias mbetet plagë e hapur first appeared on Amfora.

Përmes transmetimit në mbi 40 gjuhë të ndryshme të botës, Zëri i Amerikës arrinte më shumë se 275 milionë njerëz çdo javë përmes platformave të saj, përfshirë radion, televizionin dhe mediat digjitale.

Por kjo “antentë” e fuqishme e përcjelles së vlerave të demokracisë dhe simotrat e saj, u godit rëndë në errësirën e 14 marsit, duke e kthyer në një të premte të zezë për të gjithë punonjësit me kohë të plotë në Zërin e Amerikës dhe Zyrën për Transmetimin e Kubës, e cila drejton Radio dhe Televizionin Martí.

Urdhëri ekzekutiv të premten mbrëma i presidentit amerikan Donald Trump, për agjencinë mëmë, e quajtur Agjencia Amerikane për Media Globale (USAGM), preku më shumë se 1000 punonjës dhe i kërkoi asaj që të eleminojë të gjitha aktivitetet që nuk kërkohen me ligj. 

Një situatë kaotike, ku mijëra punonjës të USAGM janë ende të paqartë për fatin e tyre. Përveç kësaj, ajo ka shkëputur të gjitha kontratat për transmetuesit e tjerë ndërkombëtarë, përfshirë Radio Evropa e Lirë/Radio Liberty, Radio Azia e Lirë dhe Rrjetet e Transmetimeve të Lindjes së Mesme.

Deri më tani zyrtarisht përmes urdhërit ekzekutiv të parë një pjesë e punonjësve janë “lënë në pushim të paguar”, deri në një njoftim të dytë. Por ata duket se do të kenë të njëjtin fat me kolegët e USAID-it, që pezulloi përfundimisht programet e saj. Mbyllja aty u zbut përmes denoncimit të administratës së re për projekte që nuk ishin në përputhje me qëllimet e SHBA-së, por procesi që u kthye në qesharak nuk përmendi anën tjetër të medaljes, me mijëra projekte që kanë forcuar demokracitë në mbarë botën dhe pozitën e SHBA-së. 

Si në çdo veprimtari ka vend për përmirësim, ku mund të zbulohen edhe abuzime apo mashtrime në kurriz të amerikanëve, por kurrësesi që përgjegjësia të jetë kolektive, duke mos e zgjidhur problemin, por thjesht duke u fshehur pas tij me një të rënë të lapsit.

Zëri i Amerikës (VOA) është kritikuar për rolin e tij përgjatë mandatit të parë të Presidentit Amerikan Donald Trump dhe për raportimin mbi pandeminë e COVID-19, po megjithatë moto e saj, “Një shtyp i lirë ka rëndësi”, e kishte shpëtuar nga çdo ide e çmendur për ta kufizuar në raportim.

Gjatë vizitës në studion e Zërit të Amerikës në Washington D.C., gazetarët veteranë që pritën grupin tonë të vizitorëve si pjesë e programit “International Visitor Leadership Program (IVLP)”, tregonin se si ruanin në çdo rast pavarësinë e tyre editoriale megjithëse financoheshin nga buxheti federal.

Kujdesi për detajet ishte mbresëlënës, në çdo rast ata merrnin masa që të financonin udhëtimet e tyre të punës, të ruanin reputacionin e gazetarëve, etikën, aq sa kur ftoheshin të raportonin duke udhëtuar me presidentin e SHBA-së në “Air Force One”, këmbëngulnin që të paguanin një kuotë, me qëllim që të mos shfrytëzonin asetet presidenciale, për të cilin do të raportonin në mënyrë të balancuar.

Prandaj VOA kishte arritur ndër dekada të siguronte mbështetjen e të dyja palëve, republikanëve dhe demokratëve, duke shkuar gjithmonë tek faktet dhe e vërteta. Parime dhe norma që zbatoheshin me rigorozitet edhe nga agjencitë e tjera të USAGM.

“Traditat amerikane dhe etika amerikane kërkojnë që ne të jemi të vërtetë, por arsyeja më e rëndësishme është se e vërteta është propaganda më e mirë dhe gënjeshtra është më e keqja”, janë fjalët e gazetarit Edward R. Murrow, kur drejtonte Agjencinë e Informacionit të Shteteve të Bashkuara në vitet 1961-1964.

Por më të shqetësuar kanë qenë gjithmonë drejtuesit kinez, që kritikonin raportimin etik dhe të pavarur të “Radio Free Asia”. Ndërsa autokratët në Rusi dhe aleatët e tyre, kanë shprehur gjithmonë zemërimin për raportimin e Radios Evropa e Lirë/Radio Liberty, aq sa gazetarët e rrjetit janë burgosur ose ndaluar në Rusi, në Krimenë e kontrolluar prej, në Bjellorusi dhe Azerbajxhan.

Por pezullimi dhe dukshëm më vonë mbyllja e këtyre shërbimeve, nuk mund të bëhet duke u fshehur pas “abuzimeve dhe keqpërdorimit të parave të taksapaguesve “, të cilët nuk u shprehën në asnjë protestë, reagim apo peticion kundër këtyre agjencive shtetërore amerikane.

Nëse dalim nga portofoli i gjerë i Agjencisë Amerikane për Media Globale dhe mbetemi tek rasti i “Zërit të Amerikës”, patjetër që ky ishte një simbol i fjalës së lirë dhe mbrojtjes së interesit të kombit shqiptar përgjatë historisë.

Zëri i Amerikës nisi transmetimin në gjuhën shqipe një vit pas krijimit të tij. Plot 82 vite më parë, më 13 maj të vitit 1943, nga studiot e atëhershme të Nju Jorkut, Zëri i Amerikës foli për herë të parë në shqip. 

Ndërsa bota po përjetonte mizoritë e Luftës së Dytë Botërore, folësi i emisionit të parë të Zërit të Amerikës, William Hale, e hapi programin me fjalët që kanë hyrë tashmë në histori: “Ju flet Zëri i Amerikës! Lajmet mund të jenë të mira, ose të këqija për ne, por ne do t’ju themi të vërtetën”. 

Misioni i VOA-s që të përcillte informacione nga vendet ku liria e shtypit ishte e kufizuar, ose nuk ekzistonte, vijoi edhe përballë ashpërsisë së regjimit komunist shqiptar. Ai ishte pranë nesh në ngjarjet më të rëndësishme, si ardhja e pluralizmit politik apo Lufta e Kosovës, duke raportuar me profesionalizëm tiranitë kundër shqiptarëve.

Në një situatë ku polarizimi politik në vendin tonë ka arritur kulmin, mikrofoni i VOA-s shpesh ishte e vetmja dorë e zgjatur pas zhvillimeve të shoqërisë civile, konferencave për të drejtat e njeriut, duke raportuar atë që media tradicionale në vend as nuk e ka në agjendë, fuqizimin e vlerave të demokracisë.

Nga Shkodra në Tiranë, e më tej në Gjirokastër, korrespondentët e VOA-s mbanin ende pishtarin e gazetarisë lokale profesionale. Në një kohë kur gazetaria lokale është në gramat e fundit të raportimit cilësor, VOA transmetonte ngjarje në rajonin verior e jugor të vendit, duke mbajtur përgjegjës abuzuesit e pushtetit dhe censuruesit e demokracisë.

Ndoshta për Washingtonin përtej oqeanit duket banal raportimi që kam pasur nderin të përcjell tek VOA, për ndërrimin e matësve të ujit në Tiranë dhe për kanalizimet e “ujërave të zeza” (përdorura) në Durrës, por që ishin shumë më shumë se kaq.

Në thelb ato lidheshin me korrupsionin kapilar të niveleve të larta të politikës, biznesit dhe krimit të organizuar. Aktorë që jo vetëm po minojnë demokracinë tonë, por më shumë se kaq, po abuzojnë me financat kombëtare dhe ndërkombëtare, përmes kredive, huave dhe që shkelin hapur të drejtat e njeriut.

“Ditari i Zërit të Amerikës”, ishte një zakon për shqiptarët kudo në botë, që ndiqnin shqipfolësit në studiot qendrore dhe kronikat e korrespondentëve që në orën 18:00 (me orën tonë), përcillnin informacionet në interesin publik të SHBA-së dhe shqiptarëve.

“Zëri i Amerikës, një fener shprese dhe të vërtete për qindra miliona anembanë globit, u hesht sot në emër të reduktimit të burokracisë federale”, komentoi ish-drejtori për Euroazinë në Zërin e Amerikës, gazetari shqiptaro-amerikan Elez Biberaj, përmes një postimin në rrjetin social “Facebook”.

“Vendimi për të çmontuar një nga pasuritë më të mëdha kombëtare të Amerikës do të shkaktojë dëm të thellë në imazhin e SHBA-së, interesat e saj globale dhe promovimin e vlerave demokratike – dëm që asnjë kundërshtar nuk mund ta arrijë kurrë”, shtoi Biberaj.

Demokracia amerikane e frymëzuar nga Greqia dhe Roma e lashtë nuk mund të funksionojë kurrësesi pa lajmësit e saj. Nëse agjencitë e saj botërore, me fokus në Evropën Lindore, Azinë dhe Afrikën, do të reshtin së pushuari, zëri i “perandorisë” nuk do të arrijë më të përcillet në kohë dhe i pacenuar.

“Zëri i Amerikës do të paraqesë politikat e Shteteve të Bashkuara në mënyrë të qartë dhe efektive, si dhe do të paraqesë diskutime dhe opinione të përgjegjshme për këto politika”, ishte shënimi i shkruar në murin e studios qendrore të VOA-s, një deklaratë transparente dhe që e poziciononte atë si një prej elementeve të fuqisë amerikane.

Madhështia e SHBA-së ngrihej edhe mbi kolonat e VOA-s dhe të gjitha agjencive të USAGM-së, prandaj nëse Amerika do të jetë përsëri “e Madhe”, ajo nuk duhet të shuaj burimet e fuqisë së saj të butë.

The post Fundi i një epoke të artë: Shuarja e zërave të lirisë  first appeared on Amfora.

Pasditen e së mërkurës dhjetra të rinj protestuan në qytetin e Durrësit kundër kundër Shembjes së Teatrit Kombëtar dhe dëmtimit të arkeologjisë në qytetin bregdetar. Aktivistët e pajisur me maska dhe doreza protestuan duke ruajtur distancën me njëri-tjetrin dhe pa ngjyrime partiake.

Organizimi tërhoqi vëmendjen e shumë qytetarëve që ju bashkuan në distancë protestës e cila kërkoi mbrojtjen e trashëgimisë kulturore, me fokus arkeologjinë në qytetin e Durrësit. Protesta paqësore përfundoi me shoqërimin në polici të dy prej organizatorëve, të cilët u liruan pas pak orësh.

The post Të rinjtë e Durrësit protestojnë kundër Shembjes së Teatrit Kombëtar dhe dëmtimit të arkeologjisë first appeared on Amfora.