Procesi i Berlinit deri më tani ka prodhuar marrëveshje të rëndësishme për lëvizshmërinë akademike dhe njohjen e kualifikimeve në Ballkanin Perëndimor, por realiteti në terren mbetet larg objektivave të synuar. Pengesat burokratike dhe zvarritja e zbatimit kanë vënë në pikëpyetje suksesin e këtij procesi.
Shqipëria vijon të përjetojë humbje të thellë të kapitalit njerëzor si pasojë e emigrimit të profesionistëve të rinj dhe të arsimuar. “Largimi i trurit” ndikohet nga mungesa e perspektivës profesionale, liria e kufizuar akademike dhe dështimi i institucioneve për të zbatuar politikat ekzistuese. Ndërsa vendet e Ballkanit Perëndimor kanë përparuar në integrimin në programet kërkimore të BE-së, Shqipëria vijon të mbetet në fund të listës për pjesëmarrje dhe përfitime reale.
