“Ligji i ndryshuar nr. 21/2024 mund të rrezikojë biodiversitetin dhe habitatet e mbrojtura”, thuhet në kërkesën e organizatave të shoqërisë civile. 

Në kërkesën dorëzuar Kuvendit, organizatat shprehen se ndërhyrjet e planifikuara në zonat e mbrojtura dhe ndryshimet në kuadrin ligjor mund të kenë pasoja afatgjata për ekosistemet natyrore, duke vënë në pikëpyetje ruajtjen e habitateve dhe specieve të mbrojtura.

“Investimet turistike dhe infrastrukturore në zonat bërthamë (core zones) mund të sjellin pasoja afatgjata ekologjike”, thuhet më tej në kërkesë. 

Organizatat kërkojnë shfuqizimin e dispozitave që, sipas tyre, cenojnë mbrojtjen e zonave të mbrojtura, nisjen e një procesi gjithëpërfshirës konsultimi për harmonizimin e legjislacionit me standardet e Bashkimit Europian, si dhe pezullimin e dhënies së lejeve për zhvillime të reja deri në përfundimin e këtij procesi.

Shqetësimet e organizatave lidhen edhe me zhvillimet e fundit në Peizazhin e Mbrojtur Pishë Poro – Nartë, një prej zonave me rëndësi të veçantë për biodiversitetin në vend, ku gjenden mbi 35 habitate të mbrojtura, më shumë se 2,500 specie të florës dhe faunës, si dhe laguna e zona kënetore me vlera të njohura ndërkombëtarisht.

Në dokument ngrihen gjithashtu pikëpyetje mbi bazën ligjore dhe procedurat e ndjekura për zhvillimet e propozuara në zonë, ndërsa organizatat kërkojnë publikimin e plotë të dokumentacionit dhe rritjen e transparencës institucionale në proceset vendimmarrëse që prekin zonat e mbrojtura.

Organizatat shprehen se proceset vendimmarrëse që prekin zonat e mbrojtura duhet të shoqërohen me transparencë dhe konsultim publik, duke argumentuar se qytetarët duhet të informohen për çdo plan apo projekt që prek pasuritë natyrore të vendit.

“Informimi dhe përfshirja e qytetarëve në vendimmarrjen mjedisore nuk është çështje vullneti politik, por detyrim ligjor”, thuhet në kërkesë. 

Organizatat argumentojnë se ndryshimet e miratuara në vitin 2024 kanë zgjeruar mundësinë për zhvillimin e aktiviteteve turistike dhe infrastrukturore brenda zonave të mbrojtura, duke ndryshuar qasjen e deritanishme që vendoste në plan të parë ruajtjen e habitateve dhe biodiversitetit.

Sipas tyre, ndryshimet ligjore krijojnë hapësira për ndërhyrje në zona me vlera të larta natyrore dhe mund të dobësojnë mekanizmat e mbrojtjes që synojnë ruajtjen afatgjatë të ekosistemeve.

Kërkesa e organizatave vjen në një kohë kur debatet mbi zhvillimet në zonat e mbrojtura janë rikthyer në qendër të vëmendjes publike, nga Zvërneci deri te shqetësimet e ngritura për projekte turistike në zona të ndjeshme ekologjikisht, si Rrjolli.

Rastet ka nxjerrë në pah shqetësimet mbi mënyrën se si po zbatohen ndryshimet në ligjin për zonat e mbrojtura, duke paralajmëruar se zhvillime të ngjashme mund të shtrihen edhe në zona të tjera me rëndësi të veçantë ekologjike.

Debati është përqendruar kryesisht te projektet turistike të propozuara në zonë, ndërsa organizatat kërkojnë që çdo vendimmarrje të mbështetet në vlerësime të plota mjedisore dhe në respektimin e standardeve kombëtare dhe europiane për mbrojtjen e natyrës.

Organizatat argumentojnë se mbrojtja e zonave natyrore lidhet drejtpërdrejt me angazhimet që Shqipëria ka marrë në procesin e integrimit europian, duke theksuar se të gjitha zonat e mbrojtura të vendit janë propozuar si zona me interes për komunitetin europian dhe pritet të bëhen pjesë e rrjetit Natura 2000 pas anëtarësimit në Bashkimin Europian.

Sipas tyre, ruajtja e këtyre zonave nuk është vetëm një detyrim ligjor dhe mjedisor, por edhe një kusht për përmbushjen e standardeve europiane që lidhen me mbrojtjen e natyrës dhe biodiversitetit.

The post Rihapet debati për zonat e mbrojtura, organizatat civile kërkojnë rishikimin e ligjit first appeared on Amfora.

“Kjo është drejtoresha e BIRN Albania. Kristina, greke, promotorja kryesore e sulmit ndaj projektit të Zvërnecit, pasdite shan projektin e paradite na kërkon që mediat shtetërore dhe private shqiptare të japin emisione në greqisht”, shkroi deputeti socialist Ardit Bido, në një postim në rrjetin e tij social Facebook. 

Bido nxori nga konteksti pjesëmarrjen e Vokos në një komision parlamentar – ku ai vetë ishte në cilësinë e sekretarit – duke e sulmuar mbi elemente identitare dhe duke shtrembëruar faktet mbi rolin e saj dhe të medias që ajo drejton në raport me protestat publike kundër projektit turistik në zonën e Zvërnecit.

“Ky postim nuk është thjesht një polemikë politike. Ai përbën linçim publik ndaj drejtueses së një organizate të pavarur që punon në fushën e medias, transparencës dhe llogaridhënies publike”, reaguan organizatat e shoqërisë civile. 

“Përmes shtrembërimit të një diskutimi të zhvilluar në Kuvend, postimi e paraqet një ndërhyrje legjitime dhe të bazuar në ligj si akt të dyshimtë, antikombëtar apo të lidhur me interesa të huaja”, shpjegoi ai më tej.

Kristina Voko foli më 8 qershor gjatë dëgjesës së organizatave të shoqërisë civile në Komisionin Parlamentar për të Drejtat e Njeriut dhe Mjetet e Informimit Publik, ku po diskutoheshin raportet vjetore të Autoritetit të Mediave Audiovizive (AMA) dhe Radio Televizionit Shqiptar (RTSH).

Gjatë fjalës së saj, Voko ngriti shqetësime për zbatimin e detyrimeve ligjore të transmetuesit publik ndaj pakicave kombëtare, duke theksuar se RTSH-ja duhet të ofrojë më shumë informim dhe përmbajtje për këto komunitete.

“Shqipëria ka detyrime ligjore dhe strategjike për përfshirjen e pakicave në media. Problemi nuk është vetëm gjuha e transmetimit, por edhe mungesa e raportimit për çështjet që prekin komunitetet pakicë”, deklaroi Voko gjatë dëgjesës me organizatat e shoqërisë civile mbi raportet vjetore të institucioneve të pavarura, përfshirë AMA-n dhe RTSH-në.

Megjithëse ajo foli për të drejtat e përfaqësimit të pakicave kombëtare në media sipas përcaktimeve ligjore, deputeti Bido e linçoi atë publikisht, duke e sulmuar mbi elemente identitare dhe duke aluduar mbi rolin e saj në raportimin e pavaruar të medias “Reporter.al“, pjesë e BIRN Albania – që është një media investigative e fokusuar tek korrupsioni, drejtësia, të drejatat e njeriut dhe çështjet me interes publik. 

Përmes postimit të tij, deputeti i Partisë Socialiste për Qarkun Vlorë, Ardit Bido, e cilësoi Vokon si promotore të sulmit ndaj projektit turistik të Zvërnecit, ndërkohë që media jofitimprurëse e drejtuar prej saj ka raportuar në mënyrë të pavarur mbi zhvillimet e protestës dhe për projektin.

Në postimin e tij, Bido e paraqiti ndërhyrjen e Vokos si një kërkesë për transmetimin e programeve në gjuhën greke edhe nga mediat private – megjithëse ajo u fokusua tek të drejtat e pakicave në tërësi. Reagimi i deputetit u kundërshtua nga organizata të shoqërisë civile, të cilat e cilësuan postimin si një shtrembërim të debatit të zhvilluar në Kuvend.

“Ky postim nuk është thjesht një polemikë politike. Ai përbën linçim publik ndaj drejtueses së një organizate të pavarur që punon në fushën e medias, transparencës dhe llogaridhënies publike”, shkruhet në deklaratën e tyre – me të cilën u bashkua edhe Qendra Amfora.

Sipas organizatave, diskutimi i zhvilluar në Komisionin Parlamentar kishte të bënte me detyrimet ligjore të RTSH-së për informimin dhe përfaqësimin e pakicave kombëtare, ndërsa paraqitja e këtij debati si kërcënim ndaj interesit kombëtar është, “e pasaktë, e rrezikshme dhe diskriminuese”. 

Deputeti vlerësoi se RTSH i ka përmbushur këto detyrime përmes programeve për pakicat, duke përmendur emisionet e transmetuara ndër vite nga Radio Gjirokastra dhe RTSH 2. Ndërsa Bido e paraqiti debatin si një çështje që lidhet me zgjerimin e programeve në gjuhët e pakicave, organizatat e medias dhe shoqërisë civile këmbëngulin se diskutimi i zhvilluar në komision kishte të bënte me zbatimin e detyrimeve ekzistuese të transmetuesit publik dhe përfaqësimin e pakicave në media.

Organizatat e shoqërisë civile i kanë bërë thirrje deputetit Ardit Bido të tërheqi postimin dhe të kërkojë ndjesë publike, duke argumentuar se pjesëmarrja në një proces parlamentar nuk mund të përdoret si material për sulme personale, etnike apo linçim publik. 

Ato i kanë kërkuar gjithashtu Kuvendit të Shqipërisë, kryetares së Kuvendit dhe Grupit Parlamentar të Partisë Socialiste të distancohen nga çdo gjuhë që shënjestron përfaqësues të medias, shoqërisë civile apo qytetarë mbi bazë etnie, gjuhe, origjine ose qëndrimi kritik. 

Gjithashtu Asociacioni i Gazetarëve të Shqipërisë (AGSH) i kërkoi deputetit të tërheqi deklaratat e publikuara në rrjetet sociale dhe të kërkojë falje publike, duke i cilësuar ato si deformim të deklaratave të Kristina Vokos dhe sulm të papranueshëm ndaj medias.

“Znj. Voko ka ngritur një debat që lidhet me zbatimin e dispozitave ligjore dhe standardeve për programet në gjuhët e pakicave në median publike”, shkruhen në reagimin e AGSH-së. 

Organizatat e medias gjithashtu i bënë thirrje Komisionerit për Mbrojtjen nga Diskriminimi që të vlerësojë këtë rast në kuadër të kompetencave të tij ligjore, duke marrë në konsideratë përdorimin e përkatësisë etnike si mjet shënjestrimi, delegjitimimi dhe linçimi publik nga një përfaqësues i zgjedhur.

Organizatat nënshkruese të deklaratës:

1. Qendra Shkencë dhe Inovacion për Zhvillim (SCiDEV)
2. Fondacioni Së Bashku
3. Qëndresa Qytetare
4. Qendra Shqiptare për Kërkime Ekonomike (ACER)
5. Qendra Shqiptare për Gazetari Cilësore (ACQJ)
6. Asociacioni i Gazetarëve të Shqipërisë (AGSH)
7. Citizens.al
8. Komiteti Shqiptar i Helsinkit (KSHH)
9. Këshilli Shqiptar i Medias (KSHM)
10. Faktoje.al
11. Rrjeti i Informimit dhe Qytetarisë Aktive (INAC)
12. Gruaja Shqiptare në Audiovizual (AËA)
13. Partnerët Shqipëri për Ndryshim dhe Zhvillim (Partners)
14. Qendra për të Drejtat e Fëmijëve në Shqipëri (CRCA-ECPAT Shqipëri)
15. Qendra Amfora
16. Civil Rights Defenders Shqipëri
17. Lëvizja Europiane Shqipëri (EMA)
18. Akademia e Studimeve Politike (ASP)
19. Qendra “Aleanca Gjinore per Zhvillim” (GADC)
20. Instituti i Studimeve Politike (ISP)
21. Qendra për Mbrojtjen e Mjedisit dhe Zhvillim të Qëndrueshëm – All Green Centre
22. Shoqata Together for Life (TFL)
23. Qendra ResPublica 
24. Aleanca Kundër Diskriminimit LGBTI
25. Qendra “Education for Change” 
26. Shoqata “Përtej Barrierave”
27. Fondacioni Shqiptar për të Drejtat e Personave me Aftësi të Kufizuara (ADRF)
28. Qendra për Studimin e Demokracisë dhe Qeverisjes (CSDG)
29. Të Ndryshem & Të Barabartë
30. Qendra për Drejtësi Gjinore në Shqipëri
31. Qendra Burimore e Mjedisit në Shqipëri
32. Rrjeti i Fuqizimit të Gruas në Shqipëri (AËEN)
33. Qendra Europiane për Lirinë e Medias dhe Shtypit (ECPMF).

The post Bido sulmon drejtoreshën e BIRN Albania dhe shtrembëron deklaratat e saj, reagojnë organizatat  first appeared on Amfora.

Vendimi i gjykatës u mor pas kërkesës së prokurorëve të posaçëm, të cilët argumentojnë se vila ndodhet në pronësi indirekte të Ballukut dhe se janë kryer veprime të dyshuara si fiktive për të fshehur pronësinë reale të saj.

Hetimi lidhet me një procedurë prokurimi për rikonstruksionin e godinës teknologjike të “Albcontrol”-it, me fond limit rreth 88.6 milionë lekë (ose rreth 886 mijë euro), si dhe me një shtesë kontrate prej më shumë se 14 milionë lekësh. Sipas SPAK, gjatë fazës së hartimit të dokumenteve të tenderit dhe zhvillimit të procedurës janë krijuar avantazhe të padrejta për kompaninë fituese “Eurocol” sh.p.k., e cila më pas ka përfituar edhe parapagim në masën 50% të kontratës.

Prokuroria pretendon se në këmbim të këtij favorizimi, Balluku ka kërkuar dhe marrë një vilë me vlerë 145 mijë euro në resortin “White Rocks”, një projekt i zhvilluar nga e njëjta kompani. Sipas hetimit, kërkesa për përfitimin e pasurisë është bërë gjatë periudhës kur kompania po përfitonte procedurat publike të lidhura me Albcontrol.

Në qendër të hetimit nuk është vetëm përfitimi i dyshuar, por edhe mënyra sesi pasuria është fshehur. SPAK thotë se janë përdorur kontrata dhe marrëdhënie juridike të dyshuara si fiktive për të shmangur identifikimin e pronarit real të vilës. Në dosje përmendet një kontratë porosie e vitit 2018 mes Igli Tares – ish-kapiteni i Kombëtares shqiptare dhe aktualisht drejtori sportiv i Milanit – dhe pronarit të “Eurocol”, si edhe një kontratë qiraje e vitit 2022, e ndryshuar më vonë me amendime. Sipas prokurorëve, këto veprime janë përdorur për të maskuar origjinën e pasurisë.

Përveç Ballukut, SPAK përmend në skemën e dyshuar edhe Evis Berberin, në atë kohë përgjegjës për prokurimet në Albcontrol, si dhe anëtarë të njësisë së prokurimit të identifikuar me inicialet S.P., E.N. dhe A.M. Në hetim përmenden gjithashtu persona të tjerë që sipas organit të akuzës kanë shërbyer për realizimin e veprimeve juridike të dyshuara si fiktive.

Çështja përbën një zhvillim të ri në procedimin penal nr. 136/2025, ku Balluku është marrë më herët e pandehur për akuzën e shkeljes së barazisë së pjesëmarrësve në tendera dhe ankande publike. Në muajt e fundit, SPAK ka zgjeruar hetimet edhe për procedura të tjera prokurimi të lidhura me ish-ministren e Infrastrukturës dhe Energjisë.

The post SPAK sekuestron vilën në Dhërmi dhe zgjeron hetimet ndaj Ballukut first appeared on Amfora.

“Nga të shtënat humbi jetën inspektori Enea Mekolli, 34 vjeç, pjesë e Forcës së Posaçme ‘Shqiponja’ pranë Drejtorisë Vendore të Policisë Korçë. Gjatë sulmit mbeti i plagosur edhe inspektori Edison Adri, 36 vjeç, gjithashtu efektiv i së njëjtës strukturë”, u njoftua për mediat.

Sipas njoftimit të Policisë së Shtetit, operacioni u zhvillua në Malin e Bodenit në kuadër të arrestimit të personave në kërkim, por duke dërguar aty një ekip të forcave “Shqiponja” dhe jo njësitë speciale të policisë për operacione të kësaj shkalle dhe rrezikshmërie.

“Rreth orës 07:30, forcat policore rrethuan stanin ku dyshohej se fshihej Violand Braçellari, 43 vjeç”, u njoftua një deklaratë për mediat.

Sipas policisë, ai ishte një person me rrezikshmëri të lartë shoqërore, i dënuar në vitin 2017 me 9 vite burg për veprën penale “Prodhimi dhe shitja e narkotikëve”. Ndërkohë, në vitin 2011 ndaj tij ishte caktuar masa e sigurisë “Arrest në burg” për veprën penale “Kultivimi i bimëve narkotike”.

Policia njoftoi se efektivët i kanë bërë thirrje Braçellarit të dorëzohej, por ai nuk iu bind urdhrit dhe hapi zjarr në drejtim të punonjësve të policisë. Gjatë shkëmbimit të zjarrit mbeti i plagosur edhe i kërkuari, Violand Braçellari, i cili më pas u arrestua nga policia.

Presidenti Bajram Begaj shprehu ngushëllimet për humbjen e efektivit Enea Mekolli dhe uroi shërim të shpejtë për policin e plagosur, duke theksuar se Policia e Shtetit do të vijojë me vendosmëri luftën kundër krimit.

Ndërsa ministri i brendshëm, Besfort Lamallari, vizitoi efektivin e plagosur në Spitalin e Traumës dhe deklaroi se ngjarja do t’i nënshtrohet një hetimi të thelluar për të përcaktuar përgjegjësitë dhe për të garantuar sigurinë e punonjësve të policisë.

Grupi hetimor nën drejtimin e Prokurorisë dhe në bashkëpunim me Agjencinë e Mbikëqyrjes Policore, po vijon veprimet për dokumentimin e plotë të rrethanave të ngjarjes.

Ngjarja shënon një nga episodet më të rënda për Policinë e Shtetit në vitet e fundit, duke i marrë jetën një efektivi gjatë ushtrimit të detyrës dhe duke lënë të plagosur një tjetër gjatë një operacioni për arrestimin e një personi në kërkim.

The post Vritet efektivi në Maliq gjatë operacionit për kapjen e një të kërkuari first appeared on Amfora.

“Nga tërësia e provave të administruara rezulton se të pandehurit, Erdit Hazizaj, Shkëlzen Ruska dhe Ervis Alisinaj, në vazhdimësi, gjatë vitit 2020, në kundërshtim me detyrimet ligjore dhe funksionale, si punonjës policie kanë kryer veprime dhe mosveprime që kanë cenuar rëndë funksionimin e rregullt të strukturave policore, duke mos ndërmarrë masa për parandalimin dhe goditjen e veprimtarive kriminale në kultivimin dhe trafikimin e narkotikëve apo veprime të tjera të kundraligjshme”, shkruhej në njoftimin e SPAK.

Sipas SPAK, hetimet kanë dokumentuar aktivitetin e një grupi të strukturuar kriminal që vepronte në zonën e Sarandës dhe që merrej me transportimin e lëndëve narkotike drejt Greqisë.

“Hetimet kanë dokumentuar rastin e trafikimit, më 7 mars 2020 përmes pikës së kalimit kufitar në Qafë Botë, të një sasie prej 1144.9 kg cannabis sativa të papërpunuar, 4.068 kg cannabis të përpunuar (çokollatë) dhe 0.916 kg cannabis i përpunuar (vaj), me vlerë rreth 1.700.000 euro. Kjo sasi u është sekuestruar dy shtetasve italianë të dënuar në Greqi”, shkroi SPAK.

Sipas SPAK, grupi i trafikantëve nuk vepronte i vetëm. Hetimet tregojnë se drejtuesit e tij kishin krijuar lidhje me punonjës të Policisë së Shtetit, të cilët dyshohet se u jepnin informacione dhe i ndihmonin të shmangnin kontrollet e autoriteteve.

Një prej tyre, sipas hetimeve, dyshohet se është Erdit Hazizaj, i cili në atë kohë ishte specialist në Sektorin e Hetimit në Mbulim pranë Drejtorisë së Forcës së Posaçme Operacionale. Prokuroria pretendon se ai mbështeste drejtuesit e grupit kriminal me informacione dhe këshilla për zhvillimin e aktivitetit të tyre.

Hetimet e SPAK kanë dokumentuar edhe veprimtarinë e një grupi tjetër kriminal në zonën Tepelenë-Gjirokastër, i përfshirë në kultivimin e bimëve narkotike. Sipas dosjes, gjatë një operacioni të zhvilluar në tetor të vitit 2020 u zbuluan dhe u sekuestruan 1360 bimë narkotike të kultivuara nga ky grup.

Prokuroria pretendon se drejtuesi i grupit kishte krijuar lidhje edhe me Shkëlzen Ruskën, i cili në atë kohë shërbente në Drejtorinë Vendore të Policisë Gjirokastër. Sipas SPAK, ai i ofronte drejtuesit të grupit informacione dhe garanci për vijimin e aktivitetit të kundërligjshëm. Përveç shpërdorimit të detyrës, Ruska akuzohet edhe për pjesëmarrje në grup të strukturuar kriminal lidhur me kultivimin e bimëve narkotike.

Ndërkohë, ish-punonjësi i policisë Ervis Alisinaj është dërguar për gjykim për veprën penale të shpërdorimit të detyrës.

The post SPAK çon në gjyq tre ish-policë për lidhje të dyshuara me grupet e drogës first appeared on Amfora.

“Është një element i rëndësishëm i këtij rasti, jo vetëm goditja e këtij aktiviteti të krimit të organizuar të drogës, por dhe produkti i krijuar nga ky aktivitet i paligjshëm”, tha Kreu i SPAK, Klodjan Braho gjatë konferencës për shtyp në Bari të martën.

Operacioni i përbashkët mes autoriteteve shqiptare dhe italiane u shtri në disa shtete dhe çoi në ekzekutimin e masave të sigurisë ndaj personave të dyshuar si pjesë e rrjetit kriminal.

“SPAK ka lëshuar 10 masa sigurimi personal, ndërsa 5 të tjera janë lëshuar nga autoritetet gjyqësore italiane. Këto masa janë vendosur ndaj 11 shtetasve shqiptarë, 4 italianë, përfshirë 4 gra, të vendosura nën masën e arrestit në shtëpi dhe detyrim paraqitje”, shkroi SPAK në njoftimin për shtyp.

Masat u ekzekutuan në bazë të një urdhri arresti ndërkombëtar në Tiranë, Fier, Vlorë, në Barletta, në burgun e Romës dhe Agnani, si dhe në Madrid.

Hetimet që bashkuan autoritetet shqiptare dhe italiane u përqendruan në zbardhjen e vrasjes së Francesco Diviesti-t, ngjarje e ndodhur më 25 prill 2025 në Canosa di Puglia, në jug të Italisë, e cila çoi në zbulimin e organizatës kriminale shqiptare të përfshirë në trafikun ndërkombëtar të drogës dhe pastrimin e parave nga Italia në Shqipëri.

Autoritetet italiane thanë se provat e mbledhura deri tani mbështesin dyshimet ndaj tre personave të përfshirë në vrasjen e Francesco Diviesti: një shtetasi shqiptar, i dyshuar si autor i krimit, dhe dy italianëve nga Barleta, një burrë dhe një grua, të cilët akuzohen se ndihmuan në fshehjen e gjurmëve dhe nuk e raportuan ngjarjen tek autoritetet.

Sipas hetimeve, Francesco Diviesti, një 26-vjeçar italian nga Barletta që sipas mediave italiane punonte si berber në biznesin e familjes së tij, u përfshi në një konflikt në një bar mbrëmjen e 25 prillit dhe më pas u dërgua në një zonë të izoluar në Canosa di Puglia, ku u vra me armë zjarri dhe trupi i tij u dogj për të fshehur gjurmët e krimit. Për shkak të mënyrës së ekzekutimit, çështja u mor në hetim nga autoritetet antimafia të Barit, të cilat nisën bashkëpunimin me autoritetet shqiptare për dyshimet mbi përfshirjen e të akuzuarve.

Më 25 qershor, shtetasi shqiptar i dyshuar për përfshirje në krim, i cili ishte larguar dy ditë pas ekzekutimit të 26-vjeçarit, u arrestua në qytetin Roshe të Hungarisë, jo për vrasje, por për posedim të 24 kilogramëve kokainë të pastër, në kuadër të procedimit të Prokurorisë së Tranit. Drejtoria Antimafia e Barit i kishte dërguar provat kësaj prokurorie për të bërë të mundur arrestimin e tij si i dyshuar për krimin. Në të njëjtën kohë, tek familjarë të tij u sekuestruan mbi 412 mijë euro cash, si dhe u dokumentua përfshirja e tre shtetasve italianë në këtë çështje penale në hetim.

Personat nën hetim akuzohen për një sërë veprash penale, mes tyre vrasje me paramendim me metoda mafioze, tentativë zhvatjeje, armëmbajtje pa leje, favorizim të autorëve të krimit, shkelje të masave parandaluese dhe pastrim të produkteve të veprës penale nga Italia në Shqipëri.

Lidhur me personat nën hetim, Gjykata e Posaçme kundër Korrupsionit dhe Krimit të Organizuar (GJKKO) ka urdhëruar sekuestrimin e 4 shoqërive tregtare, 8 automjeteve, 10 llogarive bankare dhe mbi 680 mijë euro cash, të sekuestruara nga Policia e Shtetit në Pikën Kufitare të Muriqanit në nëntor të vitit 2024, pas informacioneve të marra nga autoritetet antimafia në Bari.

Operacioni i bërë publik paraditen e 26 qershorit është pjesë e një bashkëpunimi disa-vjeçar mes SPAK dhe Drejtorisë Distriktuale Antimafia të Barit (DDA) kundër trafikut ndërkombëtar të kokainës dhe heroinës, të menaxhuar nga organizata kriminale shqiptare. Hetimet lidhen edhe me operacionet e mëparshme të koduara “Shefi”, “Kulmi”, “Shpirti” dhe “Ura”.

Nga viti 2018 deri në vitin 2025, këto operacione kanë çuar në 170 masa sigurimi, sekuestrimin e pasurive me vlerë miliona euro dhe kapjen e më shumë se 7 tonëve drogë, përfshirë kokainë, heroinë dhe kanabis. Sipas SPAK, në disa prej këtyre çështjeve janë dhënë dënime deri në 20 vite burg.

The post Operacion i SPAK dhe antimafias italiane në tre shtete first appeared on Amfora.

“Gjatë një kontrolli të ushtruar në vijën e dytë u konstatuan dhe u ndaluan një sasi objektesh të dyshuara si pjesë e trashëgimisë kulturore, mes tyre sende dhe monedha antike”, shkroi Dogana e Durrësit në një njoftim të publikuar në faqen e saj zyrtare në rrjetet sociale.

Në fotot që shoqërojnë njoftimin vihen re dhjetëra monedha, objekte metalike dekorative dhe disa sende që ngjajnë me enë apo objekte përdorimi. Mes tyre dallohen edhe objekte me reliev dhe punime të detajuara, të cilat do t’i nënshtrohen verifikimeve nga autoritetet kompetente.

E pyetur nga Media Amfora, Policia e Durrësit tha se rasti nuk lidhet me strukturat vendore të policisë, por me Policinë Kufitare që operon në Portin e Durrësit.

Autoritetet nuk kanë bërë të ditura më shumë detaje mbi mënyrën e zbulimit apo destinacionin e objekteve.

Media Amfora ka raportuar më herët mbi problematikat që lidhen me identifikimin dhe verifikimin e objekteve të dyshuara si pjesë e trashëgimisë kulturore, mes mungesës së ekspertëve të profilizuar dhe rasteve kur hetimet për trafik të veprave të artit nuk janë provuar nga ekspertizat.

The post Sekuestrohen në Portin e Durrësit objekte të dyshuara të trashëgimisë kulturore first appeared on Amfora.

“Ne u detyrohemi këtyre njerëzve tre gjëra: së pari, një vend kujtese për jetët e humbura dhe heroizmin e atyre që mbijetuan; së dyti, drejtësi për ta dhe për familjet e atyre që u vranë; dhe së treti, dëmshpërblim, sepse dëmshpërblimi është një mënyrë konkrete për të njohur vuajtjen e shkaktuar dhe për të rikthyer dinjitetin e tyre”, tha ambasadori i Bashkimit Evropian në Shqipëri, Silvio Gonzato.

I pranishëm në aktivitetin përkujtimor të organizuar në ish-burgun e Spaçit, Gonzato tha se kujtesa, drejtësia dhe dëmshpërblimi mbeten vlera thelbësore që Bashkimi Evropian i mbron dhe i përfaqëson.

“Sot u ktheva në Burgun e Spaçit, dy vite pas vizitës sime të parë, një vizitë që la gjurmë të pashlyeshme në kujtesën time. Vetëm duke ardhur në këtë vend, mund të kuptosh vërtet përmasat e dhunës dhe mizorisë së regjimit komunist”, u shpreh ai.

Aktiviteti i zhvilluar në ish-kampin burg të Spaçit u organizua nga Shoqata Antikomuniste e të Përndjekurve Politikë të Shqipërisë në bashkëpunim me institucione vendore e qendrore dhe solli në vëmendje revoltën e majit 1973, kur të burgosurit ngritën flamurin kombëtar pa yllin komunist, në një akt që konsiderohet simbol i qëndresës ndaj diktaturës komuniste.

Në Tiranë, aktiviteti përkujtimor bëri bashkë të mbijetuar të revoltës, ish-të burgosur politikë dhe përfaqësues të organizatave antikomuniste, të cilët kujtuan qëndresën e të burgosurve të Spaçit dhe simbolikën e revoltës. 

Gjatë aktivitetit, presidenti i Unioni Mbarëkombëtar i ish-të përndjekurve politikë, Besim Ndregjoni, tha se revolta e Spaçit shënoi një prej akteve të para publike të kundërshtimit ndaj regjimit komunist dhe e lidhi mesazhin e saj me thirrjet për liri dhe demokraci të viteve që pasuan në Shqipëri.

“Në atë revoltë u hodh për herë të parë slogani i demokracisë dhe i lirisë ‘E duam Shqipërinë si gjithë Europa’”, tha Ndregjoni gjatë aktivitetit përkujtimor.

Në Elbasan, Instituti për Demokraci, Media & Kulturë (IDMC) organizoi në Teatri Skampa aktivitetin letrar “Poezia si Kujtesë”, ku nxënës dhe studentë interpretuan krijime të shkruara nga të burgosurit e Spaçit, në një përpjekje për të sjellë pranë brezit të ri kujtesën dhe dëshmitë e së kaluarës komuniste.

Revolta shpërtheu më 21 maj 1973 në burgun famëkeq të regjimit totalitar në Spaç, ku të burgosurit politikë u ngritën kundër dhunës dhe kushteve çnjerëzore në kamp. Gjatë revoltës, ata ngritën dhe valëvitën flamurin kombëtar pa yllin komunist, ndërsa disa prej organizatorëve u dënuan me vdekje dhe u pushkatuan pas shtypjes së saj.

Aktivitetet përkujtimore, të organizuara nga institucione, organizata dhe përfaqësues të ish-të përndjekurve politikë, do të vijojnë deri më 23 maj me homazhe, takime dhe veprimtari kushtuar kujtesës së revoltës dhe viktimave të regjimit komunist.

The post 53 vite nga Revolta e Spaçit, aktivitete përkujtimore në disa qytete first appeared on Amfora.

“Pavarësisht strukturës që i është vendosur, ka pasur një rënie të saj, çka nuk e mban më këmbën e urës, por duket se rrezikohet edhe vetë struktura”, tha Elsa Sula, aktiviste pranë Qendrës “Sebastia”.

Pas inspektimeve në terren dhe evidentimit të problematikave pranë strukturës së urës, aktivistët nisën kërkesa për informacion drejtuar institucioneve përgjegjëse për të siguruar dokumentacionin mbi ndërhyrjen emergjente dhe monitorimin e objektit.

“Pas reshjeve të shumta në fund të janarit dhe asaj që pamë në terren, bëmë shumë kërkesa për informacion”, tha ajo për Median Amfora.

Sipas dokumentacioneve të mbërritura pranë Qendrës “Sebastia” nga Ministria e Turizmit, Kulturës dhe Sportit, “Ura e Zogut” ka vijuar të ndiqet nga Drejtoria Rajonale e Trashëgimisë Kulturore Shkodër edhe pas përfundimit të ndërhyrjes emergjente. Dokumentet tregojnë se në muajt janar dhe shkurt 2026 janë kryer inspektime të reja në terren dhe janë hartuar procesverbale mbi gjendjen e monumentit.

Në deklaratën publike organizata kërkoi publikimin e plotë të dokumentacionit teknik, auditim institucional dhe ndërhyrje të reja, të menjëhershme dhe të mirëstudiuara, nëse ekspertët konfirmojnë se objekti vijon të jetë i rrezikuar.

“Transparencë të plotë financiare mbi çdo qindarkë të investuar në ‘Urën e Matit’, nga projektimi, zbatimi, mbikëqyrja dhe çdo amendim kontrate”, shkroi Shoqata “Sebastia” në deklaratën publike.

Monumenti i Kulturës “Ura e Matit”, i njohur ndryshe si “Ura e Zogut”, prej vitesh konsiderohet në gjendje kritike. Në vitin 2022 ura u përfshi nga organizata “Europa Nostra” në listën e 7 monumenteve më të rrezikuara në Europë, ndërsa një vit më pas ekspertë të organizatës inspektuan objektin në terren pas alarmit të ngritur nga aktivistët dhe specialistët e trashëgimisë kulturore.

Projekti për ndërhyrjen emergjente për urën u miratua me vendim të Këshillit Kombëtar të Trashëgimisë Kulturore Materiale në vitin 2023, ndërsa projekti teknik u hartua nga Universiteti Politeknik i Tiranës. Zbatimi i punimeve iu dha bashkimit të operatorëve ekonomikë “ANK” shpk dhe “Ad Star” shpk dhe u realizua gjatë vitit 2024. Sipas dokumenteve zyrtare, mbikëqyrja teknike e ndërhyrjes u realizua nga Universiteti Politeknik i Tiranës dhe DRTK Shkodër.

Dokumentet zyrtare tregojnë se për ndërhyrjen emergjente në këtë monument janë investuar mbi 55 milionë lekë me TVSH nga fondet publike dhe  projekti është konsideruar ndërhyrje prioritare për mbrojtjen e objektit, ura vazhdon të mbetet në rrezik. 

 “Ajo është trashëgimi kombëtare. Humbja apo degradimi i saj do të ishte një dështim institucional përballë historisë, komunitetit dhe brezave që vijnë”, mbyllet deklarata e organizatës.

The post Ndërhyrja në “Urën e Zogut” nuk shpëton Monumentin e Kulturës first appeared on Amfora.

“Deklarata i është nisur Presidencës, Kryeministrisë, Kuvendit të Shqipërisë, Bashkisë Durrës, Kontrollit të Lartë të Shtetit, Ministrisë së Turizmit, Kulturës dhe Sportit, Institutit Kombëtar të Trashëgimisë Kulturore, si dhe institucioneve të tjera qendrore e lokale, përfshirë për dijeni edhe Fondacionin Shqiptaro-Amerikan për Zhvillim (AADF)”, shkruhet në përmbajtjen e deklaratës.

Deklarata është firmosur nga drejtori ekzekutiv i Qendrës Amfora, Geri Emiri, ekspertët arkitektë dhe urbanistë Entela Koja-Spahivogli dhe Artan Kacani, ndërsa në përmbajtjen e saj kërkohet transparencë e plotë dokumentare, auditim i pavarur procedural dhe mbrojtje e trashëgimisë kulturore në zonën historike të Durrësit.

“Pezullimin e menjëhershëm të çdo ndërhyrjeje të pakthyeshme në zonën historike të Durrësit deri në përfundimin e procesit të verifikimit procedural, transparencës dokumentare dhe vlerësimit të pavarur profesional”, shkruhet në deklaratë.

Deklarata vjen pas forumit qytetar të organizuar nga Qendra Amfora më 28 shkurt në Durrës, ku ekspertë të urbanistikës, trashëgimisë kulturore, përfaqësues të shoqërisë civile dhe qytetarë diskutuan ndikimin e projektit TID Durrës në zonën historike të qytetit. Forumi u zhvillua me synimin për të nxitur transparencën publike, debatin profesional dhe përfshirjen qytetare në vendimmarrjet që lidhen me trashëgiminë kulturore dhe zhvillimin urban.

Në deklaratë kërkohet gjithashtu rritje e transparencës institucionale dhe përfshirje e ekspertëve të pavarur e qytetarëve në proceset vendimmarrëse që lidhen me projektin TID.

“Garantimin e aksesit publik mbi dokumentacionin teknik dhe procedurat vendimmarrëse që lidhen me projektin TID Durrës, si dhe përfshirjen e ekspertizës së pavarur dhe konsultimit qytetar në çdo ndërhyrje që prek trashëgiminë kulturore dhe identitetin historik të qytetit”, shkruhet më tej në deklaratë.

Në deklaratë shpjegohet se shqetësimet e ngritura gjatë forumit qytetar e kanë bërë të nevojshëm reagimin publik dhe institucional të Qendrës Amfora ndaj projektit TID Durrës, për shkak të mungesës së transparencës dhe paqartësive mbi procedurat që prekin zonën historike të qytetit. Ekspertët e përfshirë në deklaratë ngrenë shqetësime për ndërhyrje që mund të cenojnë trashëgiminë kulturore, identitetin urban dhe integritetin historik të Lagjes “Kala”, duke theksuar nevojën për verifikim të pavarur profesional dhe respektim të standardeve të mbrojtjes së trashëgimisë. Në deklaratë theksohet se çdo ndërhyrje në zonat historike duhet të garantojë mbrojtjen e interesit publik, memories urbane dhe identitetit kulturor të qytetit.

Projekti TID Durrës po realizohet nga Fondacioni Shqiptaro-Amerikan për Zhvillim (AADF) në bashkëpunim me Ministrinë e Turizmit, Kulturës, Rinisë dhe Sporteve dhe Bashkia Durrës, si pjesë e një ndërhyrjeje urbane dhe kulturore në zonën historike të qytetit. Projekti synon restaurimin e trashëgimisë kulturore, rikualifikimin urban dhe zhvillimin turistik të zonës historike, por prej rreth nëntë muajsh është kundërshtuar me protesta nga një pjesë e banorëve të lagjes “Kala”, të cilët kanë ngritur shqetësime për mungesë transparence, procesin e konsultimit publik dhe ndërhyrjet që prekin banesat e tyre dhe identitetin historik të zonës.

Në deklaratë theksohet se Qendra Amfora do të vijojë ndjekjen publike dhe institucionale të projektit TID Durrës përmes monitorimit, angazhimit qytetar dhe bashkëpunimit me ekspertë të fushës së trashëgimisë kulturore dhe urbanistikës. Dokumenti thekson gjithashtu nevojën për dialog institucional, transparencë të vazhdueshme dhe përfshirje të komunitetit lokal në çdo proces vendimmarrës që prek zonën historike dhe identitetin urban të Durrësit, duke kërkuar që çdo ndërhyrje të mbështetet në standarde profesionale dhe ekspertizë të pavarur.

The post Qendra Amfora kërkon transparencë dhe auditim për projektin TID Durrës first appeared on Amfora.