Mesazhi shoqërohet nga një zemër e kuqe, ndërsa në një tjetër dyqan lexohet thirrja: “Jemi me ju, mos na dëmtoni”.

Fletët janë vendosur në hyrjet e bizneseve përgjatë rrugëve ku kanë kaluar protestuesit. Fotografitë e siguruara nga Media Amfora tregojnë një mënyrë të veçantë me të cilën tregtarët shprehin solidaritet me të rinjtë, por njëkohësisht kërkojnë mbrojtjen e pronës së tyre.

Një tjetër biznes në Tiranë me qepenat e ulur dhe mesazhe solidariteti për protestuesit. Foto: Media Amfora

Prej 13 tetorit, Tirana është përfshirë nga protesta të studentëve dhe të rinjve, të cilët kanë shprehur pakënaqësi ndaj qeverisë dhe kanë kërkuar ndryshime, përfshirë dorëheqjen e kryeministrit Edi Rama.

Gjatë ditëve të para, tubimet u shoqëruan me përplasje mes protestuesve dhe forcave të policisë. Në disa rrugë të kryeqytetit u dëmtuan vitrina, dyer dyqanesh, ambiente bankare dhe prona të tjera publike e private.

Biznese me qepenat e ulur në Rrugën e Durrësit, Tiranë. Foto: Media Amfora

Mes zonave të prekura ishte edhe Rruga e Durrësit, ku disa biznese ulën qepenat dhe vendosën mesazhe që u kërkonin protestuesve të mos dëmtonin ambientet e tyre.

Ende nuk është publikuar një bilanc përfundimtar i vlerës së dëmeve të shkaktuara gjatë protestave.

Të shtunën, më 17 tetor, kryeministri Edi Rama vizitoi disa biznese të dëmtuara dhe, përmes një njoftimi zyrtar, prezantoi hapësirën “Dëmi im” në platformën e-Albania.

Ai njoftoi gjithashtu angazhimin e dhjetë grupeve të Drejtorisë së Përgjithshme të Tatimeve për verifikimin e dëmeve në terren, ndërsa premtoi mbështetje dhe kompensim pas përfundimit të procesit.

Ndërkohë, mesazhet në qepenat e dyqaneve vijojnë t’u drejtohen protestuesve me një kërkesë të thjeshtë: të ushtrojnë të drejtën e protestës, pa dëmtuar punën dhe pronën e të tjerëve.

The post “Jemi me ju, mos na dëmtoni”, bizneset solidarizohen në distancë me protestuesit  first appeared on Amfora.

Forca të Policisë së Rendit dhe Policisë Bashkiake u vendosën përreth godinës së Bashkisë, ndërsa në shesh numri i efektivëve ishte më i madh se ai i protestuesve.

Në tubim morën pjesë studentë dhe nxënës të shkollave të mesme. Pjesëmarrja ishte e kufizuar, megjithëse organizatorët kishin bërë thirrje në rrjetet sociale që protestës t’i bashkoheshin edhe prindër dhe qytetarë të tjerë. Prezenca e policisë nuk mungoi dhe jashtë godinave të shkollave, ku furgonë të policisë mbajtën nën monitorim territoret.  

Grumbulli i protestuesve përpara bashkisë kundërshtoi filmimin nga afër me frikën e identifikimit nga ana e policisë.

“Rama në burg, Berisha në burg” dhe “Hiqni kapelet” ishin disa prej thirrjeve të të rinjve gjatë grumbullimit.

Ndryshe nga protestat e javës së kaluar, tubimi i së hënës përfundoi pa përplasje me policinë dhe pa incidente të raportuara.

Gjatë ditëve të mëparshme, protestat në Durrës ishin shoqëruar me hedhje sendesh të forta dhe mjetesh piroteknike, dëmtime të pronës publike, si dhe persona të lënduar në radhët e protestuesve dhe të policisë.

Një ditë më parë, të dielën, Gjykata e Durrësit caktoi masat e sigurisë për 22 persona të arrestuar pas përplasjeve të së enjtes. Katër prej tyre u lanë në masën “arrest në shtëpi”, ndërsa për 18 të tjerët u vendos masa “detyrim për t’u paraqitur”.

Gjykata kishte shqyrtuar më herët edhe rastet e dy të miturve të arrestuar gjatë protestave. Për njërin prej tyre, arrestimi u vlerësua i paligjshëm, ndërsa për të dy u caktua masa e detyrimit për t’u paraqitur.

Protesta e së hënës u zhvillua kështu me pjesëmarrje më të ulët dhe prani të shtuar të policisë pranë Bashkisë së Durrësit, pa u përsëritur incidentet e regjistruara gjatë javës së kaluar.

The post Durrësi nën masa të forta sigurie, policia rrethon Bashkinë dhe godinat e shkollave first appeared on Amfora.

Në deklaratën zyrtare, Komisioni dënoi përdorimin e dhunës në Tiranë dhe qytete të tjera, duke përfshirë zjarrvëniet dhe sulmet ndaj institucioneve shtetërore.

“Dhuna nuk ka vend në një shoqëri demokratike dhe përgjigjja ndaj saj duhet të mbetet brenda ligjit dhe proporcionale”, shkruhet në deklaratë.

Institucioni evropian kërkoi gjithashtu që personat përgjegjës për aktet e dhunës të mbajnë përgjegjësi përmes një procesi të rregullt ligjor.

Krahas dënimit të dhunës, Komisioni Evropian theksoi rëndësinë e mbrojtjes së lirive themelore të qytetarëve, përfshirë të drejtën e tubimit dhe të shprehjes.

“Liria e tubimit dhe e shprehjes janë të drejta themelore dhe vlera thelbësore evropiane, që duhen respektuar dhe ushtruar në mënyrë paqësore”, shkruhet në reagim.

Komisioni mirëpriti angazhimin e autoriteteve shqiptare për mbrojtjen e së drejtës për protestë, ndërsa kërkoi që pakënaqësitë e qytetarëve të trajtohen përmes dialogut.

Në deklaratë përmendet edhe procesi i integrimit evropian të Shqipërisë. Komisioni e përshkruan vendin si kandidat të angazhuar në procesin e anëtarësimit në Bashkimin Evropian dhe që po shënon përparim në këtë drejtim.

Sipas institucionit, në këtë kontekst, shqetësimet dhe pakënaqësitë duhet të adresohen përmes dialogut konstruktiv dhe mjeteve paqësore.

Reagimi vjen pas disa ditësh protestash të të rinjve në Shqipëri, gjatë të cilave janë raportuar përplasje me policinë, persona të lënduar, arrestime dhe dëmtime të pronës në disa qytete.

Përmes deklaratës, Komisioni Evropian kërkon njëkohësisht përgjegjësi për aktet e dhunës, respektimin e ligjit nga autoritetet dhe garantimin e së drejtës së qytetarëve për të protestuar paqësisht.

The post Komisioni Evropian dënon dhunën në protestat e studentëve first appeared on Amfora.

Në deklaratën publike, të titulluar “Deklaratë e një grupi pedagogësh”, nënshkruesit shprehen të shqetësuar për trajtimin e studentëve gjatë protestave dhe për atë që e cilësojnë shkelje të të drejtave të njeriut.

“Të tronditur nga dhuna e pajustifikuar e ushtruar ndaj studentëve tanë dhe shkelja e dëshmuar e të drejtave të njeriut gjatë protestës”, shrkuhet në hyrje të deklaratës.

Një prej thirrjeve kryesore u drejtohet punonjësve të policisë dhe strukturave të tjera përgjegjëse për ruajtjen e rendit.

Pedagogët kërkojnë që të ndalet çdo akt dhune ndaj studentëve dhe që efektivët të mos zbatojnë urdhra të paligjshëm.

“Mos harroni se ata që ju japin këto urdhra sot, nesër do t’i mohojnë, ndërsa përgjegjësia do të mbetet mbi ju që jeni dokumentuar nga filmimet e qytetarëve dhe mediave”, shkruhet në deklaratë.

Thirrja për shmangien e dhunës u drejtohet edhe protestuesve. Pedagogët kërkojnë që pjesëmarrësit në tubime të mbrojnë bizneset, pronën publike dhe atë private, duke shmangur veprime që mund të përdoren për të justifikuar ndërhyrjen e forcave të rendit.

Në dokument u bëhet thirrje edhe përfaqësive diplomatike në Tiranë që të reagojnë publikisht për respektimin e të drejtave të qytetarëve.

Pedagogët i drejtohen gjithashtu kryeministrit Edi Rama, duke i kërkuar të dëgjojë kërkesat e studentëve dhe të hapë rrugën për qetësimin e situatës. Në deklaratë kërkohet dorëheqja e tij dhe krijimi i një qeverie kujdestare, e cila, sipas pedagogëve, duhet të sigurojë stabilitetin institucional dhe respektimin e vullnetit të qytetarëve.

Një tjetër thirrje u drejtohet qytetarëve të Tiranës, të cilëve pedagogët u kërkojnë t’u bashkohen studentëve, duke iu referuar edhe protestave të vitit 1991.

“Nëse ne jemi liderë në auditorët e universiteteve, sot studentët janë liderë tanë në shesh”, shkruhet në fund të deklaratës, e cila mbyllet me një ftesë për pedagogë të tjerë që t’i bashkohen nismës.

Deklarata vjen pas disa ditësh protestash të të rinjve në qytete të ndryshme të Shqipërisë, të shoqëruara me përplasje mes protestuesve dhe forcave të policisë, persona të lënduar dhe dëmtime të pronës.

Përmes reagimit të tyre, pedagogët kërkojnë ndalimin e dhunës ndaj studentëve, përgjegjësi nga strukturat e rendit dhe shmangien e veprimeve të dhunshme gjatë protestave.

The post Pedagogët kërkojnë ndalimin e dhunës ndaj studentëve dhe respektimin e së drejtës për protestë first appeared on Amfora.

Vendimi u mor gjatë seancës së zhvilluar të shtunën, kur gjykata caktoi ndaj të miturit masën e sigurisë “detyrim për t’u paraqitur”. Ai dyshohet për kundërshtim të punonjësve të policisë dhe pjesëmarrje në një grumbullim të paligjshëm pas paralajmërimit për shpërndarje.

Për të miturin tjetër, gjykata e vlerësoi të ligjshëm arrestimin, por caktoi gjithashtu masën e sigurisë “detyrim për t’u paraqitur” në policinë gjyqësore. Akuzat ndaj tij lidhen me goditjen e punonjësve të policisë për shkak të detyrës dhe pjesëmarrjen në një grumbullim të paligjshëm pas paralajmërimit për shpërndarje.

Ndërkohë, mëngjesin e së dielës, më 18 tetor, prania e forcave të policisë ishte shtuar pranë Gjykatës së Durrësit, ku pritet të shqyrtohen masat e sigurisë për 22 protestues të tjerë të arrestuar gjatë përplasjeve të së enjtes.

Përpara gjykatës kishte prezencë të shtuar të uniformave blu, ndërsa seanca do të drejtohet nga gjyqtari Orgent Nazaj.  Për shtatë prej të arrestuarve Prokuroria ka kërkuar masën e sigurisë “arrest në burg”.

Të arrestuarit janë pjesë e grupit të protestuesve të ndaluar pas përplasjeve të 15 tetorit në Durrës, kur të rinjtë u përballën me forcat e policisë dhe u regjistruan dëmtime të pronës publike.

Protestat vijuan edhe gjatë dy ditëve pasuese, ndërsa të rinjtë kërkuan lirimin e personave të shoqëruar dhe të arrestuar nga policia.

The post Gjykata e Durrësit shpall të paligjshëm arrestimin e një të mituri, 22 protestues përpara togave të zeza  first appeared on Amfora.

Në deklaratën me titull “Ndaloni dhunën, mbroni jetën dhe të drejtën për protestë paqësore”, organizatat theksojnë se mbrojtja e jetës, shëndetit dhe dinjitetit të protestuesve, punonjësve të policisë, gazetarëve dhe kalimtarëve duhet të jetë përparësi.

“Mbrojtja e jetës, shëndetit dhe dinjitetit të protestuesve, punonjësve të policisë, gazetarëve dhe kalimtarëve duhet të jetë përparësia absolute”, shrkuhet në deklaratë.

Organizatat kujtojnë se protesta paqësore është një e drejtë themelore, e garantuar nga neni 47 i Kushtetutës së Shqipërisë, neni 11 i Konventës Europiane për të Drejtat e Njeriut dhe neni 21 i Paktit Ndërkombëtar për të Drejtat Civile dhe Politike.

Ato u bëjnë thirrje pjesëmarrësve në protesta të shmangin sulmet ndaj personave dhe shkatërrimin e pronës, ndërsa theksojnë se autoritetet kanë detyrimin të lehtësojnë zhvillimin e tubimeve paqësore dhe të parandalojnë lëndimet.

Sipas deklaratës, çdo përdorim i forcës nga policia duhet të jetë i ligjshëm, rreptësisht i nevojshëm dhe proporcional, duke u dhënë përparësi mjeteve paqësore.

“Aktet e dhunës së individëve të veçantë nuk justifikojnë ndërhyrje pa dallim ndaj protestuesve paqësorë”, theksojnë organizatat.

Në dokument dënohet çdo përdorim i pajustifikuar ose disproporcional i forcës nga strukturat policore. Organizatat shprehen se ruajtja e rendit publik nuk mund të përdoret si justifikim për cenimin e integritetit fizik, dinjitetit dhe të drejtave të qytetarëve.

Një tjetër kërkesë lidhet me trajtimin e personave të lënduar dhe të ndaluar gjatë protestave. Organizatat kërkojnë ndihmë të menjëhershme mjekësore për të lënduarit, mbrojtje të posaçme për të miturit dhe respektimin e të drejtave të çdo personi të ndaluar.

Ato kërkojnë gjithashtu që çdo pretendim për dhunë apo përdorim të paligjshëm të forcës të hetohet shpejt, në mënyrë të pavarur dhe të paanshme.

Deklarata u drejtohet edhe përfaqësuesve politikë dhe drejtuesve të institucioneve shtetërore, të cilëve u kërkohet të shmangin retorikën nxitëse dhe të krijojnë hapësirë për dialog.

Mes 18 organizatave nënshkruese është edhe Qendra Amfora, së bashku me “Civil Rights Defenders Shqipëri”, “SCiDEV”, “Rrjeti AWEN”, “Qendra Aleanca Gjinore për Zhvillim”, “Faktoje”, “Albanian Institute of Science”, “BIRN Albania”, “Citizens.al”, “Partners Shqipëri”, Qendra Shqiptare për Gazetari Cilësore dhe organizata të tjera të shoqërisë civile.

Thirrja vjen pas disa ditësh protestash të të rinjve në qytete të ndryshme të Shqipërisë, të cilat janë shoqëruar me përplasje, dëmtime të pronës dhe ndërhyrje të forcave të policisë.

“Respektoni të drejtën e protestës paqësore. Mbroni jetën dhe dinjitetin e çdo personi. Asnjë jetë nuk duhet vënë në rrezik”, përfundon deklarata e përbashkët e organizatave.

The post Organizatat e shoqërisë civile bëjnë thirrje për ndalimin e dhunës dhe mbrojtjen e të drejtës së protestës first appeared on Amfora.

Në sheshin “Liria”, grumbullimet e të rinjve shpërndaheshin nga punonjësit e policisë, ndërsa qendra e qytetit mbahej nën vëzhgim nga efektivë me uniformë, punonjës të maskuar dhe Policia Bashkiake.

Godinat e Bashkisë dhe Prefekturës së Durrësit u vendosën nën masa sigurie, me forca policore të dislokuara në perimetrin e tyre.

Gjatë paradites, një grup të rinjsh u mblodh në qendër të qytetit dhe marshoi në disa rrugë, ndërsa në zona të ndryshme u regjistruan djegie të koshave të mbeturinave dhe dëmtime të pronës publike.

Situata u shoqërua me tensione edhe pranë filialit të Postës Shqiptare, ku një grup protestuesish dëmtoi xhamat e jashtëm të godinës. Pas incidentit, forcat e policisë ndërhynë për të shpërndarë pjesëmarrësit dhe nisën shoqërimin e disa të rinjve.

Sipas raportimeve nga terreni, gjatë protestës së të shtunës u shoqëruan 25 persona, mes tyre tre të mitur. Efektivë me uniformë dhe punonjës me veshje civile ndoqën grupet e protestuesve edhe në rrugicat e qytetit.

Masa të shtuara policore ishin marrë edhe gjatë dy ditëve të mëparshme të protestave në Durrës.

Të enjten, më 15 tetor, marshimi i studentëve dhe gjimnazistëve u shoqërua me incidente në sheshin “Liria”, ndezjen e zjarreve dhe dëmtime të godinës së Prefekturës.

Një ditë më pas, të premten, të rinjtë vijuan protestën duke marshuar drejt Drejtorisë Vendore të Policisë së Durrësit me thirrjet “Lironi çunat!”, në mbështetje të personave të shoqëruar gjatë tubimit të mëparshëm.

Sipas të dhënave të raportuara nga Policia e Durrësit për dy ditët e para, të enjten ishin shoqëruar 35 persona dhe të premten 25 të tjerë.

Ndryshe nga dy ditët e mëparshme, të shtunën prania policore ishte përqendruar në disa prej hapësirave kryesore të qytetit, ku grupet e të rinjve shpërndaheshin pas grumbullimit.

The post Policia blindon Durrësin, pengohen grumbullimet e të rinjve first appeared on Amfora.

“Protestuesit i vendosin flakën Bashkisë së Shkodrës”, ishin fjalët që shoqëronin një video të publikuar nga faqja “newspiranjat” në Instagram.

Pamjet tregonin disa persona që lëviznin pranë godinës gjatë mbrëmjes, por nuk dokumentonin një zjarr që kishte përfshirë ndërtesën. Deri në momentin e monitorimit, publikimi kishte marrë rreth 1200 pëlqime dhe 27 komente.

Ngjarja u paraqit si zjarrvënie edhe nga media të tjera. Në një publikim në Instagram, “oranews.one” shkruante: “Bashkia e Shkodrës në flakë, godina sulmohet me molotovë nga disa persona të maskuar”.

Videoja shfaqte flakë pranë pjesës së jashtme të godinës dhe disa persona që lëviznin në shesh. Publikimi kishte marrë rreth 3 300 pëlqime dhe 131 komente.

Ndryshe nga mënyra si u paraqit ngjarja në titujt e mediave, në njoftimet e shqyrtuara të Policisë së Shtetit nuk konfirmohet se godina e Bashkisë së Shkodrës është përfshirë nga flakët gjatë protestës së 16 tetorit. Një konfirmim i tillë nuk rezulton as nga informacionet e Bashkisë të shqyrtuara deri në momentin e verifikimit.

Gazetarja Emi Kalaja konfirmoi për Media Amfora se gjatë protestës ishte hedhur një mjet piroteknik pranë godinës së Bashkisë së Shkodrës, por nuk kishte pasur zjarr në ndërtesë.

“Godina e Bashkisë nuk është përfshirë nga flakët”, tha Kalaja për Amforën.

Raportimet për zjarrin në Bashkinë e Shkodrës vijuan edhe në portale të tjera informative.

“Sulmohet Bashkia e Shkodrës, persona të maskuar i vënë flakën”, shkruhej në titullin e një artikulli të Publik.al, të publikuar më 16 tetor.

Edhe portali KOHA.net e raportoi ngjarjen me titullin “Objekti i Bashkisë së Shkodrës në flakë, sulmohet me molotov”.

Në përmbajtjen e artikullit thuhej se një bombë molotov kishte shpërthyer pranë derës së hyrjes së institucionit, ndërsa nuk raportoheshin persona të lënduar. Edhe në këtë rast, informacioni i dhënë në tekst nuk konfirmonte se ndërtesa ishte përfshirë nga flakët.

Ndërkohë, Policia e Shtetit, në një deklaratë të drejtorit të Departamentit për Sigurinë Publike, Dhimitraq Ziu, më 16 tetor, njoftoi se në Shkodër ishin proceduar penalisht në gjendje të lirë nëntë persona.

Sipas policisë, procedimet lidheshin me kundërshtimin dhe goditjen e punonjësve të rendit, si dhe dëmtimin me sende të forta dhe zjarr të institucioneve shtetërore dhe pronave publike e private.

Në deklaratë raportohej gjithashtu plagosja e rëndë e një punonjësi të Policisë së Rendit, i cili ishte dërguar për trajtim në Spitalin e Traumës në Tiranë.

Megjithatë, deklarata nuk identifikonte godinën e Bashkisë së Shkodrës si objekt të përfshirë nga zjarri dhe nuk përcaktonte dëme konkrete në këtë ndërtesë.

Publikimet e shqyrtuara përdorën pamje nga protesta dhe nga shpërthimi i një mjeti pranë institucionit, duke e paraqitur ngjarjen në tituj si zjarrvënie ndaj godinës. Ndërsa raportimet për një mjet të hedhur pranë hyrjes përputhen me përshkrimet e incidentit, pretendimi se Bashkia e Shkodrës mori flakë nuk mbështetet nga informacionet e mbledhura dhe shkaktoi momente paniku tek qytetarët.

The post Bashkia e Shkodrës në “flakë”, lajmet e pavërteta shoqërojnë protestën first appeared on Amfora.

Në një deklaratë publike, Ziu njoftoi se në Tiranë janë arrestuar 127 persona dhe janë proceduar penalisht në gjendje të lirë 244 të tjerë, të dyshuar për ushtrim dhune ndaj punonjësve të policisë, dëmtim të institucioneve shtetërore dhe shkatërrim të pronës publike e private.

Sipas policisë, gjatë protestave në kryeqytet janë dëmtuar edhe bankomate, kamera sigurie, automjete dhe rrethime metalike.

Në Durrës, policia raportoi 23 persona të arrestuar në flagrancë dhe 12 të proceduar penalisht për kundërshtim dhe goditje me sende të forta të punonjësve të policisë, si dhe dëmtim të institucioneve shtetërore dhe pronave publike e private.

Në Korçë janë arrestuar dy persona dhe janë proceduar në gjendje të lirë 23 të tjerë. Sipas deklaratës, ata dyshohen për kundërshtim dhe dhunë ndaj efektivëve, si dhe dëmtime me sende të forta dhe zjarr të godinave të institucioneve shtetërore dhe pronave publike.

Në Vlorë, 20 persona janë proceduar penalisht në gjendje të lirë për pengim të procesit mësimor në disa shkolla, kundërshtim të punonjësve të policisë dhe dëmtim të pronës publike.

Ndërkohë, në Shkodër janë proceduar në gjendje të lirë nëntë persona për kundërshtim dhe goditje të punonjësve të policisë, si dhe dëmtime të institucioneve shtetërore dhe pronave publike e private. Gjatë protestës në Shkodër mbeti i plagosur rëndë një punonjës i Policisë së Rendit, i cili, sipas Ziut, ndodhet në Spitalin e Traumës në Tiranë. Policia deklaroi se autori i dyshuar është identifikuar, por nuk është arrestuar për shkak të moshës. Në deklaratën e Policisë së Shtetit nuk bëhet i ditur numri i protestuesve të plagosur gjatë përplasjeve me forcat e rendit

Në Elbasan janë proceduar penalisht gjashtë persona për dëmtimin e xhamave të një institucioni shtetëror, sinjalistikës rrugore dhe tabelave reklamuese, ndërsa në Kukës janë proceduar dhjetë persona për dëmtimin e sinjalistikës dhe tabelave.

Sipas bilancit të Policisë së Shtetit, në total rezultojnë 152 persona të arrestuar dhe 324 të proceduar penalisht në shtatë qytetet e përmendura në deklaratë.

Ziu bëri të ditur gjithashtu se gjatë protestave në Tiranë, Durrës, Lezhë, Shkodër dhe Kukës janë dëmtuar 120 punonjës policie.

Protestat nisën në Tiranë më 13 tetor dhe u shtrinë më pas në qytete të tjera. Në Tiranë, tubimet u shoqëruan me përplasje mes demonstruesve dhe policisë, ndërsa në Durrës u regjistruan zjarre në sheshin “Liria” dhe dëmtime në godinën e Prefekturës.

Të dhënat e publikuara nga Policia e Shtetit përfaqësojnë bilancin e raportuar deri më 16 tetor. Arrestimet dhe procedimet penale lidhen me dyshime për kryerjen e veprave penale dhe nuk përbëjnë vendime përfundimtare për fajësinë e personave të përfshirë.

The post Protestat në Shqipëri, policia arreston 152 persona dhe procedon penalisht 324 të tjerë first appeared on Amfora.

Drejtori i Departamentit për Rendin dhe Sigurinë Publike, Dhimitraq Ziu, në një deklaratë publike bëri të ditur se strukturat e Hetimit të Krimit Kibernetik dhe Antiterrorit kanë monitoruar komunikimet në hapësirën virtuale, krahas veprimeve të kryera në terren gjatë protestave.

“Janë identifikuar disa kanale dhe grupe komunikimi, nëpërmjet të cilave janë shpërndarë mesazhe me përmbajtje të drejtpërdrejtë kriminale, ndër to, thirrje për kryerje të akteve ekstreme dhe terroriste, si dhe kërcënime direkte kundër jetës së punonjësve të Policisë së Shtetit”, deklaroi Ziu.

Sipas tij, për këto veprime është regjistruar një procedim penal, ndërsa hetimet po zhvillohen në bashkëpunim me agjenci partnere ndërkombëtare, për të identifikuar adresat IP, administratorët e kanaleve dhe përdoruesit që dyshohet se kanë shpërndarë mesazhet.

Ziu paralajmëroi se përdorimi i llogarive anonime në rrjetet sociale nuk mund të shërbejë për nxitjen e dhunës dhe të akteve terroriste, duke deklaruar se persona brenda dhe jashtë Shqipërisë janë objekt i një hetimi të detajuar.

“Përdorimi i rrjeteve sociale nëpërmjet llogarive anonime nuk duhet dhe nuk do të lejohet t’i shërbejë rrymave apo shtetasve me prirje terroriste, ekstremiste dhe të dhunshme, brenda dhe jashtë vendit”, u shpreh ai.

Drejtori i Rendit nuk bëri publikë emrat e kanaleve të komunikimit, platformat ku ato funksiononin apo identitetet e personave që dyshohet se kanë shpërndarë mesazhet. Në deklaratë nuk u paraqitën as përmbajtjet konkrete të komunikimeve që policia i ka cilësuar si thirrje për akte terroriste.

Gjatë deklaratës, Ziu reagoi edhe ndaj përhapjes së informacioneve të pavërteta në rrjetet sociale, të cilat, sipas Policisë së Shtetit, synojnë të shfrytëzojnë ndjenjat nacionaliste dhe të krijojnë një klimë konfliktuale.

“Policia e Shtetit shpreh keqardhjen për përhapjen e lajmeve të pavërteta dhe dashakeqe që synojnë të shfrytëzojë ndjenjat nacionaliste për të krijuar klimë konfliktuale dhe për të cenuar besimin e qytetarëve te Policia e Shtetit”, deklaroi ai.

Reagimi vjen pas përhapjes së pretendimeve në rrjetet sociale për praninë e policëve dhe mercenarëve serbë gjatë protestave në Tiranë, të cilat u përgënjeshtruan nga Policia e Shtetit dhe nuk u mbështetën nga provat e paraqitura në publikimet e shqyrtuara nga Amfora.

Megjithatë, në deklaratën e 16 tetorit, policia nuk sqaroi nëse kanalet e komunikimit të përfshira në hetimin për thirrje terroriste kanë lidhje me llogaritë që shpërndanë pretendimet për policët serbë

The post Policia identifikon kanale komunikimi me thirrje për akte terroriste gjatë protestave first appeared on Amfora.